Egaununo 16

Yininke musinke yomulyo po?

EZUVA limwe, mugara gumwe kwa wizire kwaJesus. Age ga divire asi Jesus kwa kere nounongo wounene, makura ta mu tantere asi: ‘Murongi, tantera mukurwange a penge ko yininke yimwe eyi ga kara nayo.’ Mugara kwa gazarere asi a gwane ko yininke yimwe eyi ga kara nayo mukurwendi.

Ngano nyove Jesus, yinke ngano wa uyungire?— Jesus ga mwene asi mugara gwina kwa kere noudigu. Nye udigu womugara kapi wa kere asi ga hepere sili eyi ga kere nayo mukurwendi. Udigu wendi kwa kere asi kapi ga divire yininke yomulyo po meparu.

Tu ze tu gazadare ko kuhamena eyi. Yininke musinke nayi hepa kukara nomulyo po kwetu? Ayo kuna kara nye yidaneso yoyiwa ndi yikoverero yoyipe ndi nayimwe ngoso ndi?— Hawe, pwa kara sininke simwe esi sa kara nomulyo unene. Aso kuna kara sirongwa esi ga here kuronga Jesus. Yipo nye ga simwitilire esimwititi lyokuhamena mugara ogu ga divarere Karunga. Ono hara ni li ku simwitire ndi?—

Mugara ogu kwa kere ngawo zonene. Age kwa wekere mapya noyihete. Nombuto edi ga kunine kwa yimine unene. Kapi ga kere noyihete yokugwanena po mokupungwira nombuto dendi nadinye. Makura yinke eyi ngano ga rugene? Age kwa litanterere mwene asi: ‘Tani zungurura po yihete yange ni tungire po yoyinene. Makura yipo ngani ture mo muzangu gwange noyininke yange nayinye.’

Mugara gongawo kwa gazarere asi eyi kuna kara yininke yoyiwa po kurugana. Age kwa ligazarere mwene asi munandunge mokulipungwira yininke yoyinzi. Ta litantere mwene asi: ‘Nina kara noyininke yoyiwa yoyinzi eyi nina lipungwire. Ayo ngayi twara nge konomvhura dononzi. Ngesi tani pwizumuka tupu nye. Tani li nokunwa nokulihafesa nyamwange.’ Nye magazaro gomugara ogu gongawo kwa kere gepuko. Ono diva asi epuko musinke?— Age kwa ligazarere tupu mwene ntani nokulihafesa. Age kwa divarere Karunga.

Yipo nye Karunga ga uyungisire mugara gongawo asi: ‘Egova ove. Masiku ganaina to fu. Yalye nye ngayi kara yininke eyi wa lipungwira?’ Mugara gongawo gwina ga vhulire kuruganesa yininke oyo konyima zonomfa dendi ndi?— Hawe, muntu gwapeke ga yi ruganesere. Jesus ta tanta asi: “Yimo nye ngayi mu kara ogu a lipongaikire emona, age ga hana kungawopa mwaKarunga.”—Rukasa 12:13-21.

Nove ono hara kukara ngwendi mugara gwina gongawo ndi?— Sitambo sendi sosinene meparu kwa here kugwana emona lyenzi. Aso kwa kere sepuko. Age nkenye apa kwa here kukara neyi yoyinzi. Nye age kapi ga ‘ngawopere mwaKarunga.’

Sinzi sovantu kwa kara ngwendi mugara gwina gongawo. Awo nkenye apa kuhara kukara neyi yoyinzi. Nye eyi kuvhura kutwaredera komaudigu gomanene. Pasihonena, wa kara noyidaneso ndi?— Tantera nge asi yidaneso musinke wa kara nayo?— Ngapi nsene kaume koge gumwe ga kara nombara ndi sipopisa ndi sidaneso esi wa dira kukara naso? Ngano nayi wapa mokusininika vakurona woge va ku randere ndi?—

Pamwe kuvhura sidaneso si moneke ngwendi asi mulyo unene. Nye konyima zosiruwo, yinke nayi vhura kusihorokera?— Aso kuvhura si kurupe. Ndi kuvhura si teke, makura kapi to si hara hena. Yosili, wa kara nosininke esi sa kara nomulyo unene kupitakana yidaneso. Ono diva asi sininke musinke oso?—

Aso kuna kara eparu lyoge. Eparu lyoge kwa kara nomulyo unene, morwa pwa hana alyo, kwato eyi no vhura kurugana. Nye alyo kwa korera mokurugana eyi ayi hafesa Karunga, ndi ngapi?— Yipo nye, kapisi tu kare ngwendi mugara gwina gongawo gomugova ogu ga divarere Karunga.

Vanona kapisi velike tupu ava vhuru kurugana yininke yougova ngwendi mugara gwina gongawo. Sinzi sovakondi nawo kuyirugana. Vamwe nkenye apa kuhara yininke yoyinzi kupitakana eyi va kara nayo. Awo kuvhura va kare nonondya dokugwanena po noyikoverero yokudwara nevango lyokukara. Nye awo kuhara yoyinzi. Awo kuhara kukara noyikoverero yoyinzi ntani nomambo gomanene. Yininke oyo kupura yimaliwa yoyinzi. Yipo nye awo kurugana unene mokugwana yimaliwa yoyinzi. Ano moomu vana kugwana yimaliwa yoyinzi, yimo hena vana kuhara kukara neyi yoyinzi.

Vakurona vamwe kurugana unene yipo va gwane yimaliwa, makura kapi ava gwana siruwo sokukara kumwe nomapata gawo. Ntani kapi ava gwana siruwo sokuruganena Karunga. Kuvhura yimaliwa yawo yi va parure ndi?— Hawe. Kuvhura va ruganese yimaliwa yawo konyima zonomfa dawo ndi?— Hawe. Morwa vafe nokuvhura si kurugana yuma.—Muudisi 9:5, 10.

Eyi kutanta nye asi epuko kukara noyimaliwa ndi?— Hawe. Ose kuvhura kuruganesa yimaliwa mokuranda nondya noyikoverero. Bibeli kutanta asi ayo kupopera. (Muudisi 7:12) Nye nsene tu kara neharo lyokuhara yimaliwa, ose kuna kulitwara moudigu wounene. Ngatu kara ngwendi mugara gwina gongawo gomugova ogu ga lipongaikilire emona, ano kapi ga ngawopere mwaKarunga.

Yinke ayi tanta kungawopa mwaKarunga?— Ayo kutanta asi kutura Karunga muhowo momaparu getu. Vantu vamwe kutanta asi awo va pura mwaKarunga. Awo kugazara asi kupura yiko kwelike kwa hepa po. Nye awo sili kwa ngawopa mwaKarunga ndi?— Hawe, awo kuna kara ngwendi mugara gwina gongawo ogu ga divarere Karunga.

Jesus kapi ga divarere Guhwe gemeguru. Age kapi ga hetekerere ko kugwana yimaliwa yoyinzi. Ntani kapi ga wekere yininke yoyinzi. Jesus ga divire yininke yomulyo po meparu. Ono diva asi yininke musinke oyo?— Ayo kuna kara kungawopa mwaKarunga.

Ngapi omu natu vhura kungawopa mwaKarunga?— Ose kuvhura kungawopa mwaKarunga pokurugana eyi ayi mu hafesa. Jesus ga tente asi: “Ame kurugana nkenye apa eyi ga hara.” (Johanesa 8:29) Karunga kumuhafesa nsene tu rugana yininke eyi ana tu harere tu rugane. Omu ono kugazara, yininke musinke no vhura kurugana mokuhafesa Karunga?— Yimo, kuvhura o rese Bibeli nokuza komapongo goSikriste nokukanderera kwaKarunga ntani nokuvatera vapeke va lironge kumuhamena. Oyo yiyo yininke yomulyo po meparu.

Morwa Jesus kwa ngawopere mwaKarunga, Jehova ga mu pakerere mbili. Ga pere Jesus mfuto zokuparuka narunye. Nsene tu kara ngwendi Jesus, Jehova nga tu hara ntani nokutupakera mbili. Yipo nye, ngano tu kare ngwendi Jesus, kapisi ngwendi mugara gwina gongawo ogu ga divarere Karunga.

Pana kara matjangwa gamwe moBibeli aga aga likida omu natu kara nomutaro gomuwa kemona: Yisewe 23:4; 28:20; 1 Timoteusa 6:6-10; ntani Vahebeli 13:5.

[Efano pepenuno 87]

Udigu musinke ga kere nawo mugara ogu?

[Efano pepenuno 88]

Yininke musinke ga gazarere mugara ogu gongawo?

[Efano pepenuno 89]

Yisinke wa kara nayo eyi ya kara nomulyo po kupitakana yidaneso?

[Mafano pepenuno 91]

Yininke musinke yomulyo po eyi ana kurugana ogu munona?