Egaununo 19
Ayo ya wapa mokurwana ndi?
WA DIVA KO vamati ndi vakadona ava va hara kulimona asi kwa kara nononkondo ndi?— Ove kwa hara kukara kumwe nawo ndi? Ndi kwa hara kukara nomuntu gomuwa ogu ga hara mbili?— Murongi goMunene kwa tente asi: “Vanerago vava ava retesa po mbili movantu, yeeyi ngava va tumbura asi vana vaKarunga.”—Mateusa 5:9.
Nye poyiruwo yimwe vantu vamwe kurugana yininke eyi nayi vhura kutuhandukisa. Ndi kapisi yimo?— Ose kuvhura tu lizuvhe mokuvatengwidira kuwoko. Eyi kwa horokere kovarongwa vaJesus apa va gendere kumwe nendi va ze koJerusarema. Tanko ni ku simwitire sihorokwa esi.
Apa va gendere ko sinano songandi, Jesus ta tumu varongwa vendi vamwe komukunda gwaSamaliya mokukapapara evango eli nava ka pwizumukira. Nye vantu vamo kapi va va harerere va kare mo, morwa Vasamaliya kwa kere noukarelikarunga wokulisiga. Ntani awo kapi va here nkenye ogu nga zi kositata saJerusarema mokukakanderera.
Ngano nyove ya horokerere, yinke ngano wa rugene? Ngano wa handukire ndi? Ndi ngano wa va tengwidire kuwoko?— Eyi yiyo va here kurugana varongwa oJakopo naJohanesa. Awo tava tantere Jesus asi: “Ono hara tu hundire mundiro meguru, gu va hanagure po ndi?” Eyi yiyo ga va tumbwilire Jesus asi Vana wosindundumo somvhura! Nye Jesus kwa va tanterere asi ayo kapi ya wapa mokutekura vantu wopeke monkedi zangoso.—Rukasa 9:51-56; Marukusa 3:17.
Ayo usili asi vantu poyiruwo yimwe kuvhura va dire kukara nombili nose. Vanona vamwe kuvhura va dire kuhara tu dane kumwe nawo. Awo kuvhura va uyunge asi: “Kapi tuna hara kudanauka kumwe nove.” Nsene yi horoka yininke yangoso kuvhura yi tu handukise, ndi ngapi? Ose kuvhura tu lizuvhe ngwendi tu rugane ko yuma mokuvatengwidira kuwoko. Nye oyo ya wapa ndi?—
Gusa Bibeli zoge, tu penune moYisewe egaununo 24, velise 29. Azo kutanta asi: “Wa ha uyunga asi: ‘Tani mu tengwidire kuwoko! Ame tani kara nonkoko nendi!’”
Omu ono kugazara, yinke lina kutanta eli etjangwa?— Alyo kuna kutanta asi twa ha tengwida kuwoko. Twa ha handukisa muntu morwa yeeyi ana tu handukisa. Nye ngapi nsene gumwe ta hetekere ko kurwana nove? Age kuvhura a ku handukise pokukutemagura. Age kuvhura a ku zore ntani nokuuyunga asi ove woma. Tu tante nye asi ta ku tumbura asi ove ebotwa. Yinke wa hepa kurugana? Kuvhura o mu rwanese ndi?—
Tu ze hena tu tare eyi azi uyunga ko Bibeli. Penuna mwaMateusa egaununo 5, velise 39. Jesus kwa uyungire asi: “Walye omu lihokwa moyininke ya hana kuhungama. Nye nsene ana ku toona muntu ketama lyoge lyorulyo, mu pirwira nekwawo.” Omu ono kugazara, yinke ga tembe Jesus? Age kwa tembe nye asi nsene muntu ta ku toona nonyongo ketama limwe, wa hepa hena kumupulisira a ku toone noku kekwawo ndi?—
Hawe, oyo kapisi yiyo ga tembe Jesus. Age kwa tembe yininke ngwendi kukukapura rukusi ndi kukuzundura ndi kukungunyuna. Muntu kuvhura a tu zundure morwa ana hara tu handuke. Ano nsene tu handuka nokumuzundura, yisinke nayi horoka?— Ose nampo kuvhura tu tameke kurwana.
Nye Jesus kapi ga harerere vasikuli vendi va rwane. Yipo nye age kwa tente asi nsene muntu a tu zundura, nose twa ha mu zundura. Twa ha handuka nokutameka kurwana. Nsene tu yi rugana, ose kuna kulikida asi twa lifana nogu ana vareke kuturwanesa.
Nsene udigu u horoka, omu ono kugazara, yininke musinke yoyiwa kurugana?— Ose kuvhura tu tunde po. Muntu gumwe walye kuvhura a ku zundagure yikando yongandi. Nye age kuvhura a hageke konyima zokaruwogona. Nsene o tunda po, ayo kapi yina kutanta asi ove kwato nonkondo. Ayo kutanta asi ove kwa kara nononkondo mokurugana youhunga.
Nye ngapi nsene o tameka kurwana ntani nokutoona mukweni? Yisinke nayi vhura kuhoroka konyima?— Ogo ono toona kuvhura a ka tengwire ko novakaume vendi. Awo kuvhura nampo va ya ku remeke pokukutoona nonomuramu ndi pokukutwa nonombere. Ngesi ono kwata nye egano eyi Jesus ana dilire kutuharera tu rwane ndi?—
Yisinke natu vhura kurugana nsene natu mona vantu vapeke kuna kurwana? Kuvhura tu lihameke mo nokukwatesa ko gumwe ndi?— Bibeli kututantera eyi ya hungama po. Penuna moYisewe egaununo 26, velise 17. Azo kutanta asi: ‘Kulitura monompata da hana si sininke soge kwa fana ngwendi to zi konzira, to dere kutwi kombwa.’
Yisinke nayi horoka nsene o dera matwi gombwa? Ayo kuvhura yi korese mbwa, ntani azo kuvhura zi ku hume, ndi ngapi? Ngomu nazi hetekera ko kundundana, nove yimo no zi kwata unene komatwi ntani yimo hena nazi handuka unene. Nsene no zi siga, azo kuvhura zi ku hume unene. Nye ove kuvhura o zi kwaterere ngorooro komatwi ndi?—
Owo yiwo udigu ngatu kara nawo nsene ngatu litura mo movantu ava vana kurwana. Ose nampo kapi tatu diva ogu ana tameke kurwana ntani neyi vana kurwanena. Gumwe kuvhura va mu toone, nye nampo kuna vaka sininke samukwawo. Nsene natu mu vatera, ose ngano natu vatera muwidi. Ayo ngano kapi nayi vhura kuwapa, ndi ngapi?
Yinke wa hepa kurugana nsene no mona vantu kuna kurwana?— Nsene kosure, ove kuvhura o duke nokukatantera mitili. Nsene kapisi kosure, ove kuvhura o zigide mukurona goge ndi muporosi. Nampili nsene vantu vapeke vana hara kurwana, twa hepa kukara vanambili.
Varongwa vaJesus wousili kurugana ko yuma paapa va hulira mokunyokera po kurwana. Monkedi zangesi tatu likida asi ose kwa kara nononkondo mokurugana youhunga. Bibeli kutanta asi murongwa gwaJesus “kapi a kara nonompata. A kare nombili kovantu navenye.”—2 Timoteusa 2:24.
Ngesi tu ze tu ka tare mapukururo gamwe gomawa aga ngaga tu vatera tu dire kurwana: Varoma 12:17-21 ntani 1 Peturusa 3:10, 11.
[Efano pepenuno 102]
Yisinke va harerere oJakopo naJohanesa mokutegwidira kuwoko Vasamaliya?
[Efano pepenuno 104]
Yisinke twa hepa kurugana nsene gumwe ta tu hadagura tu rwane?
[Efano pepenuno 105]
Ngapi omu kulitura mo movantu vana kurwana ya fana ngwendi kuna kudera matwi gombwa?
Kuvhura o remane, wa ha yi rugana!
[Efano pepenuno 106]
Yisinke no vhura kurugana nsene no mona vantu kuna kurwana?