Egaununo 20

Ove narunye kwa hara kukara gokuhova ndi?

WA DIVA KO muntu gumwe ogu ga hara kukara nkenye apa gokuhova ndi?— Age kuvhura a sindike mukwawo yipo a kare gokuhova momukweyo. Wa yi mona rumwe ta yi horoka ndi?— Murongi goMunene ga mwene nampili vakondi vana hara kukara wopomuhowo ndi kuhara mavango gomulyo po. Age kapi ga yi haferere. Tu ze tu tare eyi ya horokere.

Bibeli kututantera asi Jesus kwa mu zigidire kosipito sosinene kembo lyoMufalisayi, ogu ga kere mupitisili gomulyo moukerelikarunga. Konyima zapa ga ya sikire Jesus, ta tameke kunomena vagenda ava va wizire nokulihorowera mavango gomawa po. Makura ta simwitire esimwititi kowo va zigidire kosipito. Ono hara ni li ku simwitire ndi?—

Jesus kwa tente asi: ‘Nsene vana ku zigida kekwareko, wa ha ka hingira posipundi sokomeho ndi o lihorowere evango lyewa po.’ Ono diva asi morwasinke ga yi uyungilire oyo Jesus ndi?— Age kwa tente asi mpamwe pweli ogu ga ku pitakana mekuto vana zigida. Ngamoomu ono kuyimona pefano, mwenyasipito kwa wizire ta tanta asi: ‘Pa muntu ogu evega. Makura ove o ze o ka hingire pena.’ Ngapi omu ga lizuvhire mugenda gwina?— Age ga lizuvhire nomuga morwa vagenda navenye va mu mwene omu ana kutengura a ka hingire kevega lyokonyima.

Jesus kwa likidire asi kapi ya wapa mokuliharera evango lyokuzeruka. Yipo ga tente asi: ‘Nsene vana ku zigida kosipito sononkwara, zende o ka hingire kosipundi sokonyima, asi ogu ana ku zigida, a ku tantere asi, “Hewa, heda oku!” Ngoso ntani o gwana ekuto kwava muna hingire nawo kosiliro.’—Rukasa 14:1, 7-11.

Ono kwata egano esimwititi lyaJesus ndi?— Tu ze tu ruganese sihonena sapeke tu tare nsene ono yi kwata egano. Gazara asi ove kuna kuronda mombesa zina zura vantu. Kuvhura nye o genderere kukagwana sipundi nokusiga mukurona a sikame ndi?— Jesus kuvhura ngano a yi hafere nsene o yi rugana oyo ndi?—

Gumwe kuvhura a tante asi Jesus kapi ga kara nosinka seyi atu rugana. Nye wa yi pura oyo ndi?— Apa Jesus ga kere posipito sosinene pembo lyoMufalisayi, ga nomenene omu vantu vana kulihorowera yipundi yawo. Omu ono kugazara, age kapi a fire sinka eyi tuna kurugana naina ndi?— Ngomu ana kara ngesi meguru, eJsus kuna kara poukaro wouwa wokuvhura kutunomena.

Apa muntu a hetekere kukara gokuhova, ayo kuvhura kureta maudigu. Ayo narunye kukareta nompata ntani vantu kuhanduka. Eyi kuhoroka pamwe apa vanona ava zi kumwe mombesa. Nsene mavero gombesa vana ga zegurura, vanona kulirombera va ka lihove. Awo kuhara yipundi yoyiwa, eyi ya karera pepi nomakende. Yisinke nayi vhura kuhoroka?— Yimo, kuvhura va lihandukire vene-navene.

Kuhara kukara gokuhova kuvhura kureta maudigu gomanzi. Ayo ya retere hena maudigu nampili movapositoli vaJesus. Ngamoomu twa yi lirongere mEgaununo 6 mobuke ezi, awo kwa lipatanene mokatji kawo asi yilye gomunene po. Yisinke ga rugene Jesus?— Yimo, age ga va vyukisire. Nye konyima va ya kere nonompata hena. Tu ze tu tare omu da tamekere.

Vapositoli novantu vamwe kwa zire naJesus sikando sokuhulilira kositata saJerusarema. Jesus kwa uyungire nawo kuhamena Uhompa wendi, ano oJakopo naJohanesa kwa gazadarere ko kuhamena kukapangera kumwe nendi ngovahompa. Yipo va yi tanterere zinyawo Sarome. (Mateusa 27:56; Marukusa 15:40) Makura apa va zire koJerusarema, Sarome ta wizire Jesus nokuyatongeka nongoro komeho zendi nokumuhundira yuma.

Jesus ta mu pura asi: “Yisinke ono hara?” Age kwa limbwilire asi Jesus ngano a pulisire vana vendi va ka hingire nendi moUhompa wendi, gumwe korulyo rwendi ano mukwawo korumoho rwendi. Apa va yi zuvhire vapositoli vapeke eyi oJakopo naJohanesa va ninkire zinyawo a va hundilire, omu ono kugazara ngapi omu va lizuvhire?—

Yimo, awo kwa handukilire unene oJakopo naJohanesa. Makura Jesus ta pe vapositoli vendi navenye mapukururo gamwe gomawa. Jesus kwa va tanterere asi vapangeli wonomuhoko kwa hara kulimona nonkondo ndi mulyo. Awo kwa hara evango lyokuzeruka yipo nkenye ogu a vhure kuvalimburukwa. Nye Jesus kwa tanterere vasikuli vendi asi kapisi va kare ngoso. Jesus kwa tente asi: “Ogu ga hara kukara munene pokatji keni, a kare mukareli gweni.” Gazadara ko tupu kuhamena oyo!—Mateusa 20:20-28.

Wa diva asi yinke a rugana mukareli?— Age kukarera ndi kuruganena vantu vapeke ntani kapi a ndindire vapeke va mu karere. Mukareli kugusa evango lyenunu nye kapisi evango lyokuhova. Age kulinunupika ntani kapi a linenepeke. Ntani diworoka asi Jesus ga uyungire asi ogu ana hara kukara gokuhova ga hepa kukara ngwendi mukareli govakwawo.

Omu ono kugazara, yinke yina kutanta eyi kwetu?— Kuvhura mukareli ngano a lipatane nahekurwendi asi yilye na ka hingira posipundi sosiwa po ndi? Ndi kuvhura a lipatane nahekurwendi asi yilye na ka hova kukalya ndi? Ngapi omu ono kugazara?— Jesus kwa tente asi mukareli narunye kutura muhowo hekurwendi.—Rukasa 17:7-10.

Twa hana kuhetekera ko kukara gomuhowo, yisinke twa hepa kurugana?— Yimo, twa hepa kukara ngwendi mukareli kovakwetu. Eyi kutanta asi kutura vakwetu muhowo. Kutanta hena asi kutara vapeke asi awo mulyo unene kutupitakana ose. Kuvhura o gazadare ko nonkedi dimwe omu no vhura kutura vapeke muhowo ndi?— Tengura kepenuno 40 ntani 41 o tare nonkedi dimwe omu no tura vapeke muhowo pokuvaruganena.

Diworoka asi Murongi goMunene ga tulire vapeke muhowo pokuvaruganena. Masiku gokuhulilira aga ga kere kumwe novapositoli vendi, age ga kuhwire nompadi dawo. Nsene nose tu tura vapeke muhowo pokuvaruganena, ose ngatu hafesa Murongi goMunene ntani noGuhwe, Jehova Karunga.

Tu ze tu rese Matjangwa gamwe hena aga aga tu korangeda tu ture vapeke muhowo: Rukasa 9:48; Varoma 12:3; ntani Vafilipi 2:3, 4.

[Efano pepenuno 107]

Wa mona rumwe vantu vana kuhetekera ko kukara muhowo ndi?

[Mafano pepenuno 108, 109]

Sirongwa musinke ga rongere Jesus apa ga uyungire kuhamena owo va lihorowere mavango ndi yipundi yoyiwa po?

[Efano pepenuno 110]

Yisinke ga hundilire Sarome Jesus, ntani yitundwamo musinke ya kere?