Egaununo 22

Eyi natu dilira kukumbagera

TU TANTE nye asi munona gomukadona ta tantere ozina asi: “Apa tupu nani ka pwaga kosure tani ka wiza kembo.” Nye age konyima zosure ta kara nokudanauka novakwawo makura ta ya tantere ozina asi: “Apa tuna pwaga kosure mitili gwange yige ana ninki nge ni kare kosure.” Ayo ya wapa mokuuyunga yininke yangoso ndi?—

Ndi tu tante asi munona gomumati ta tantere oguhwe asi: “Kapi nina sangere mbara membo.” Nye ngapi nsene asi yige ana yi rugana sili? Ayo nayi kara epuko mokutanta asi kapi ana yi rugana ndi?—

Murongi goMunene ga tu likidire eyi ya hungama kurugana. Age kwa tente asi: ‘“Nhi” zeni zi kare Nhi, ano “Hawe” zeni zi kare Hawe. Ano eyi ya pita opo kwa tunda moMudona.’ (Mateusa 5:37, NW) Yisinke ga tembe Jesus?— Age kwa tembe asi twa hepa kurugana eyi tuna tanta.

MoBibeli mwa kara esimwititi eli ali likida omu ya kara nomulyo mokutanta usili. Alyo kuna kara esimwititi lyovantu vavali owo va tente asi awo varongwa vaJesus. Tu ze tu tare eyi ya horokere.

Kapi pwa pitire makwedi gavali konyima zonomfa daJesus, vantu wokutunda komavango gokoure kwa wizire koJerusarema kosipito somulyo soVajuda esi ngava tumbura asi Pentekoste. Mupositoli Peturusa kwa geve siuyungwa sosiwa omu ga tanterere vantu kuhamena Jesus, ogu ga pindwire Jehova koufe. Esi kwa kere sikando sokuhova va ya lirongere vantu wovanzi ava va wizire koJerusarema kuhamena Jesus. Ano va here kudiva ko yoyinzi. Yisinke va rugene?

Awo kwa kere mo siruwo sosire. Konyima zosiruwo, vamwe yimaliwa yawo tayi pu, ano va hepere evatero yipo va vhure kuranda nondya. Varongwa womoJerusarema kwa here kuvatera vagenda. Makura sinzi sawo tava randesa yininke eyi va wekere nokutwara yimaliwa kovapositoli vaJesus. Ano vapositoli tava gava yimaliwa kowo va hepere evatero.

Ananiyasa namukadendi Safira womombungakriste zomoJerusarema kwa randesere epya lyawo. Kwato ogu ga va pangerere asi va li randese, nye vene va yi tokwere. Eyi va rugene oAnaniyasa naSafira kapi va yi ruganene asi morwa va here varongwa vaJesus wovape. Nye kwa here kulimonekesa kovantu asi awo vantu wovawa. Makura tava tokora kuuyunga asi tava gava yimaliwa yawo nayinye mokuvatera vapeke, nye awo kwa geve ko tupu yimwe. Ngapi omu ono kugazara ko koyininke oyo?—

Konyima Ananiyasa kwa ya zire kovapositoli. Makura ta va pe yimaliwa. Karunga ga yi divire asi Ananiyasa kuna kugava tupu yimwe. Makura Karunga ta tantere mupositoli Peturusa asi Ananiyasa kapi ana kutanta usili.

Makura Peturusa ta tanta asi: ‘Ananiyasa, yinke yokusigilira Satana, a ku ninkise o rugane eyi? Epya lyoge lya kere. Kapi pwa kere hepero zokulirandesa. Apa ono li randesa, alyo etokoro lyanyamoge asi yinke no vhura kuruganesa yimaliwa. Yinke nye ono lininkisire asi ove kuna kugava yimaliwa nayinye nye siruwo oso ove kuna gava ko tupu yimwe? Kapi ono kumbagere vantu, Karunga ono kumbagere!’

Azo kwa kere nzo zonene, morwa Ananiyasa kwa kumbagerere! Age kapi ga rugene eyi ga tente. Age kwa lininkisire tupu. Bibeli ta zi tu tantere eyi ya horokere asi: ‘Ananiyasa apa ga zuvhire nonkango daPeturusa, makura ta liganda ta fu.’ Karunga ga dipagere Ananiyasa! Konyima, simpu sendi tava si pwagesa va ka si vhumbike.

Konyima zonovili ntatu ngoso, Safira nage ta wiza. Kapi ga divire eyi ya horokerere mugara gwendi. Makura Peturusa ta mu pura asi: ‘Yimaliwa eyi muna randesa epya, yipo yina huru paapa ndi?’

Safira ta limburura asi: “Nhi, yipo yina huru poopo.” Nye age kwa kumbagerere! Awo kwa horekere ko yimaliwa yimwe eyi va randesere epya yi kare yawo. Makura Karunga ta dipaga hena Safira.—Yirugana 5:1-11.

Yisinke twa hepa kulirongera ko kweyi ya horokerere oAnaniyasa naSafira?— Ayo kuturonga asi Karunga kapi ga hara vanayimpempa. Age kuna hara tu tante nkenye apa usili. Nye vantu wovanzi kuuyunga asi kapi ya kara epuko mokukumbagera. Omu ono kugazara, vantu owo mouhunga vana kara ndi?— Wa yi diva asi mauvera nokukora nakunye nonomfa kwa wiza po pevhu morwa kukumbagera ndi?—

Diworoka asi Muzonaguli kwa kumbagerere mukadi gokuhova, Eva. Age kwa tanterere Eva asi kapi na fa nsene a dira kulimburukwa kwaKarunga ntani nokulya kosiyimwa esi ga mu silikire Karunga. Eva ga pulire yoMuzonaguli makura ta li siyimwa. Ta ninkisisa Adamu nage a lye. Makura tava ya kara vananzo, ano vana vawo navenye tava va reta nononzo. Ano morwa awo vananzo, vana vaAdamu navenye kuhepa nokufa. Ngapi omu rwa wiza po ruhepo oro?— Aro kwa wiza po morwa kukumbagera.

Jesus yiyo yooyo ga uyungilire asi Muzonaguli “munayimpempa, age hena guhyayo”! Yige ga hovere kutanta yimpempa. Apa muntu a kumbagere, age kuna kurugana eyi ga hovere kurugana Muzonaguli. Nkenye apa natu lizuvha ezedo mokukumbagera twa hepa kugazadara ko kuhamena eyi.—Johanesa 8:44.

Siruwoke no vhura kulizuvha ezedo mokukumbagera?— Paapa o rugana yininke yepuko, ndi ngapi?— Mpamwe kapi ono yi ndindire, makura kuvhura o teze sininke. Makura nsene va ku pura, ove ngano no tanta asi mumbyoge ndi mukuroge ana yi rugana ndi? Ndi kuvhura o lininkise asi kapi ono diva ogu ana si teza?—

Ngapi nsene ono kara neruganenombo nye o tjange ko tupu yimwe? Kuvhura o tante asi ono mana kutjanga nayinye, nye ove kapi ono yi rugana ndi?— Twa hepa kudiworoka Ananiyasa naSafira. Awo kapi va tente usili naunye. Yipo Karunga ga va dipagere mokulikida asi eyi va rugene nzo zonene.

Yi kare asi yisinke tuna rugana, ose kuvhura tu gwederere ko koudigu nsene tu kumbagera, ano twa hepa kutanta usili naunye. Bibeli kutanta asi: ‘Omu uyunge usili.’ Azo kutanta hena asi: “Walye omu litantere-tantere yimpempa.” Jehova age narunye kuuyunga usili, ntani age kuna kutundindira nose tu rugane yokulifana.—Vaefeso 4:25; Vakorosi 3:9.

Twa hepa kutanta nkenye apa usili. Yiso sitwa va tumbura mwaExodus 20:16; Yisewe 6:16-19; 12:19; 14:5; 16:6; ntani Vahebeli 4:13.

[Efano pepenuno 117]

Yininke musinke yepuko ana rugana ogu mumati?

[Efano pepenuno 118]

Yimpempa musinke Ananiyasa ga tanterere Peturusa?

[Efano pepenuno 119]

Yisinke ya horokerere Ananiyasa morwa kukumbagera?

[Efano pepenuno 120]

Yilye ogu ga uyungire Jesus asi yige ga hovere kutanta yimpempa, ntani yitundwamo musinke ya kweme ko?

[Efano pepenuno 121]

Siruwoke no vhura kulizuvha ezedo mokukumbagera?