Egaununo 23

Eyi ava verere vantu

ONO diva ko muntu ogu ana kuvera ndi?— Nampo poyiruwo yimwe nove kuvera. Kuvhura o vere esakisa ndi ezimo lyoge kuvhura li kore. Nye vantu vamwe kuvera unene. Awo nokuvhura si kusikama pwa hana ogu ana kuvavatera. Eyi narunye kuhoroka apa vantu ava kurupa unene.

Poyiruwo yimwe natuvenye kuvera. Ono yi diva asi morwasinke vantu ava verere nokukurupa ntani nokufa ndi?— Ezuva limwe mugara ogu ga dilire kuvhura kugenda kwa mu retere kwaJesus, ano Jesus ga likidire eyi vantu ava verere nokufa. Tanko ni ku simiwitire ko eyi ya horokere.

Jesus kwa kere pembo modoropa ezi za kere pepi nEkurudiva lyaGalireya. Mbunga zovantu kwa wizire kwendi. Vantu wovanzi va wizire dogoro kapi kwa kere mpito zokuhwilira membo. Kwato gumwe ga vhulire kukasika pepi nevero. Nye simpe vantu kwa twikilire kuwiza! Mbunga zimwe zovantu kwa retere mugara gosirema ogu nga dili kugenda. Mokumusimbira pouro wendi, kwa hepere vagara vane.

Ono diva asi morwasinke va harerere kureta mugara ogu gokuvera kwaJesus?— Awo kwa kere nepuro asi Jesus kuvhura a mu vatere, nokumuverura kouvera wendi. Ono diva asi ngapi omu va ka sikisire mugara gwina gosirema kwaJesus nampili moomu mwa kere vantu wovanzi membo ndi?—

Efano eli ono kumona kulikida omu va yi rugene. Pomuhowo tava mu rondeke mugara pombando zonzugo. Azo kwa kere mbando zokulyalyakana. Makura tava tomona ekero lyenene pombando. Moruhura, awo kwa hegumwine mugara gokuvera monzugo pouro wendi kupitira mekero olyo va tomwene. Awo kwa kere nepuro lyononkondo!

Vantu navenye va kere membo kwa tetukire apa va mwene eyi ya horokere. Mugara gosirema ogu ga kere pouro kwa mu hegumwisire pokatji kawo. Jesus ga handukire apa ga mwene eyi va rugene vagara ndi?— Hawe! Age kwa hefe pokumona epuro eli va kere nalyo. Age kwa tanterere mugara gosirema asi: ‘Nonzo doge vana di ku dongwenene po.’

Vantu vamwe kwa gazarere asi kapi ya hungama kwaJesus mokuuyunga yangoso. Awo kapi va gazarere asi kuvhura a dongonone po nonzo. Pokuvalikida asi age kuvhura kuyirugana, Jesus ga tanterere mugara asi: “Katuka, o damune uro woge, o ze kembo.”

Apa ga uyungire Jesus eyi makura mugara ta veruka! Age kapi ga kere hena sirema. Age ga vhulire kukatuka mwene nokugenda. Vantu ava va mwene sitetu esi kwa tetukire. Kapi va mona rumwe sitetu sokufana ngesi meparu lyawo! Awo kwa hambererere Jehova mokuvapa Murongi goMunene ogu ga ya vhulire kuverura vantu komauvera gawo.—Marukusa 2:1-12.

Yisinke tuna lirongere ko kositetu esi?— Ose tuna lirongo asi Jesus kwa kara nononkondo dokudongwenena po nonzo ntani nokuverura vantu wokuvera. Ntani tuna lirongere ko sininke simwe somulyo unene. Tuna lirongo asi vantu kuvera morwa nzo.

Mokumona asi natuvenye poyiruwo yimwe kuvera, eyi kutanta nye asi natuvenye tu vananzo ndi?— Yimo, Bibeli kutanta asi natuvenye kwa tu reta nononzo. Ono diva asi yinke ayi tanta kukureta nononzo ndi?— Ayo kutanta asi ose kwa tu reta twa hana kusikilira mo. Poyiruwo yimwe, ose kurugana yininke yepuko, nampili kapi tuna hara kuyirugana. Ono diva asi ngapi natuvenye twa ya kara nononzo ndi?—

Ose kwa tu reta vananzo morwa Adamu, muntu gokuhova, kapi ga limburukwire kwaKarunga. Age kwa zonene apa ga tezere po veta zaKarunga. Ose natuvenye kwa pinga nzo zaAdamu. Ono diva asi ngapi omu twa pinga nzo zendi? Tu ze ni ku fatwilire monkedi omu no vhura kuyikwata egano.

Nampo wa mona muntu kuna kukanga nomboroto mosipana. Nsene sipana sa kara nemyantuko, yinke nayi horokera kwankenye munhwi gomboroto ogo vana ruganene mo? Ono yi diva ndi?— Nkenye munhwi tagu kara nemyantuko, ndi kapisi yimo?—

Adamu kwa fana ngwendi sipana, ano ose kwa fana ngwendi nomboroto. Apa ga tezere po veta zaKarunga, Adamu ta kara gokudira kusikilira mo. Age kwa fene ngwendi kuna gwana emyantuko ndi kudira kusikilira mo. Makura apa ga kere novana, ngapi omu va fene?— Awo navenye kwa gwene kudira kusikilira mo.

Sinzi sovanona kapi va va reta nediro kusikilira mo eli no vhura kumona. Awo kapi va pira kuwoko ndi kuguru. Nye ediro kusikilira mo lyawo simpe enene, nawo kuvera, ano konyima zosiruwo, tava fu.

Ngomu twa yi diva, vantu vamwe kuvera-vera kupitakana vakwawo. Morwasinke ya karera ngoso? Morwa awo kwa va reta nononzo dononzi ndi?— Hawe, natuvenye kwa tu reta nononzo dokulifana. Ntani ose natuvenye kwa tu reta twa hana kusikilira mo. Yipo nye, nkenye gumwe kuvhura a vere. Nampili vantu ava ava hetekere ko kulimburukwa noveta nadinye daKarunga ntani nokudira kurugana yoyidona, nawo kuvera.

Nye, morwasinke vantu vamwe ava vera-verere kupitakana vakwawo?— Pwa kara nokonda dononzi. Nampo kuvhura yi kare asi awo kapi ava gwana nondya donongwa dokugwanena po. Ndi kapi ava li nondya douhunga. Ndi awo kulya unene yininke youtovara. Ano konda zimwe nampo kuvhura zi kare asi awo kapi ava rara usimbu ntani kapi ava gwana nompofu dokugwanena po. Ndi awo nampo kapi ava dwara yikoverero yokuwapera apa aku kara kufu. Vantu vamwe marutu gawo kapi ga kara nononkondo ano kapi taga vhuru kurwanesa po uvera, nampili va hetekere ko kulipakera sinka vene.

Ngaku kara siruwo apa ngatu ka dira kukavera ndi? Ngatu ka manguruka ko kononzo ndi?— Yinke ga rugene Jesus komugara gwina gosirema?— Jesus ga mu dongwenene po nonzo dendi nokumuverura. Monkedi zangoso, Jesus ga likidire eyi nga ka ruganena ezuva limwe navenye ava ava kondjo mokurugana youhunga.

Nsene tu likida asi kapi tuna hara kuzona ntani twa nyenga yininke yoyidona, Jesus nga ka tu verura. Komeho, age nga ka gusa po kudira kusikilira mo kwetu oku twa kara nako ngesi. Age nga ka yi rugana eyi ngaHompa goUhompa waKarunga. Nonzo kapi ngava ka di gusa po posiruwo simwe tupu. Ado ngava ka di gusa po mwa za siruwo. Makura apa nonzo detu ngadi ka dongonokererera po, ose kapi ngatu ka vera hena. Natuvenye ngatu ka sikilira mo. Ee, ruhafo musi ngayi ka reta!

Komagano gamwe kuhamena omu nzo za tu kundama natuvenye, resa Joba 14:4; Episarome 51:5; Varoma 3:23; 5:12; ntani 6:23.

[Efano pepenuno 123]

Yinke ga tanterere Jesus mugara gosirema a rugane?

[Efano pepenuno 124]

Yinke tuna lirongere ko kositetu esi?

[Efano pepenuno 125]

Ngapi omu twa ya kara natuvenye vananzo?

[Efano pepenuno 126]

Apa nonzo detu ngadi ka dongonokererera, moukaro musinke ngatu ka kara?