Egaununo 37

Kudiworoka Jehova naMunwendi

TU TANTE ASI gumwe ana ku pe uhwi wouwa. Ngapi omu no lizuvha kuhamena uhwi owo?— Ove kuvhura nye o uyunge tupu asi mpandu nokudivara ogu ana u ku pe ndi? Ndi ove no mu diworoka neyi ana ku ruganene?—

Jehova Karunga kwa tu pa uhwi wouwa. Age kwa tumine Munwendi pevhu mokuyatufira. Ono diva asi morwasinke Jesus ga ya tu fililire ndi?— Esi kuna kara sininke simwe somulyo unene esi twa hepa kukwata egano.

Ngamoomu twa lirongere mEgaununo 23, Adamu kwa zonene pokuteza po veta zaKarunga zokusikilira mo. Ano yipo twa pingire nzo zaAdamu, guhyetu natuvenye. Omu ono kugazara, yinke twa hepa?— Twa hepa guhya gomupe ogu ga ya kere ana sikilire mo meparu lyendi nalinye apa pevhu. Yilye ogu ono kugazara na vhura kukara guhya gokufana ngoso?— Jesus.

Jehova kwa tumine Jesus pevhu yipo a ya vhure kukara ngwendi guhyetu mevango lyaAdamu. Bibeli kutanta asi: “‘Muntu gopomuhowo Adamu, kwa mu ungire a kare nomwenyo gwendi.’ Ano Adamu gomoruhura ogo Mpepo ezi azi gava mwenyo.” Yilye ga kere Adamu gopomuhowo?— Yimo, muntu ogu ga ungire Karunga nombundu zevhu. Yilye ga kere Adamu gwauvali?— Jesus. Bibeli kuyilikida eyi apa azi uyunga asi: ‘Adamu muntu gopomuhowo kwa mu rugana nombundu zevhu, nye muntu gwauvali, Hompa Jesus ogu ga tunda meguru.’—1 Vakolinte 15:45, 47; Genesis 2:7.

Mokumona asi Karunga kwa rundwilire eparu lyaJesus lyemeguru momukoga gwaMariya, Jesus kapi ga pingire nkenye nzo kwaAdamu. Eyi yiyo nye Jesus ga karerere muntu gokusikilira mo. (Rukasa 1:30-35) Eyi yiyo hena muengeli ga tantererere vasita apa Jesus va mu hampurukire asi: “Gaaga masiku ngesi aga vana mu hampurukire Muzowoli.” (Rukasa 2:11) Nye mukeke Jesus mokukara Muzowoli gwetu, yisinke ya hepere po?— Age ga hepere kukura a kare mugara ngwendi Adamu. Makura Jesus ga ya vhulire kukara ‘Adamu gwauvali.’

Jesus, Muzowoli gwetu, nga kara hena “Guhya Gwanarunye.” Yimo ava mu tumbura ngoso moBibeli. (Jesaya 9:6, 7) Jesus gokusikilira mo kuvhura kukara guhyetu mevango lyaAdamu, ogu ga ya dilire kusikilira mo apa ga zonene. Ose kuvhura kuhorowora ‘Adamu gwauvali’ mokukara guhyetu. Yimo, Jesus mwene kuna kara MunwaJehova Karunga.

Pokulironga kuhamena Jesus, ose kuvhura kumutambura ngoMuzowoli gwetu. To diworoka asi kosinke twa hepa kutuzowora?— Yimo, kononzo nokonomfa edi twa pinga kwaAdamu. Eparu lyokusikilira mo eli ga geve Jesus kulitumbura asi sizoweseso. Jehova kwa geve sizoweseso yipo va vhure kutudongwenena po nonzo detu.—Mateusa 20:28; Varoma 5:8; 6:23.

Yosili kapi tuna hara kudivara eyi ga tu ruganena Karunga naMunwendi, ndi kapisi yimo?— Jesus kwa likidire vasikuli vendi nkedi zokulikarera ezi nazi vhura kutuvatera mokudiworoka eyi ga tu ruganena. Tu ze tu zogere yuma oyo.

Ligazara tupu ngwendi nove kuna kara konzugo zekeguru moJerusarema, masiku. Jesus novarongwa vendi kuna kara kositafura. Ano positafura, kuna kara po nyama zonzwi zokudosa, ntani nonomuhwi donomboroto novhinyu zongeha. Awo kuna kara nomurarero gokulikarera. Ono yi diva asi morwasinke?—

Murarero ogu gokuvadiworokesa eyi ga rugene Jehova nomvhura mafere ga ka pita apa vantu vendi, Vaisraeli, va kere moupika moEgipite. Posiruwo sina Jehova kwa tanterere nkenye epata asi: ‘Dipageni nzwigona nokukwita honde koyikuravero yononzugo deni.’ Makura ta tanta hena asi: ‘Zendeni mononzugo deni mu ka lire mo nzwigona.’

Vaisraeli yimo va rugene. Masiku googo, muengeli gwaKarunga kwa gendere mosirongo saEgipite. Momambo gomanzi, muengeli kwa dipagere nombeli. Nye apa muengeli ga mwene honde zonzwigona koyikuravero, makura ta pitakana embo olyo. Momambo ogo, kwato munona ga fire mo. Farawo, hompa gwaEgipite, kwa mu tukukisire unene eyi ga rugene muengeli gwaJehova. Yipo nye Farawo ga tanterere Vaisraeli asi: ‘Muna manguruka. Katukeni mu tunde mo moEgipite!’ Awo makura tava rondeke nomurongero dawo ponongameru nopoyindongili tava tundu mo.

Jehova kapi ga here vantu vendi va divare omu ga va mangwilire. Yipo nye ga tente asi: ‘Rumwe momvhura mwa hepa kulya murarero ngwendi ogu muna li masiku ganaina.’ Awo kwa tumbwire murarero ogu gokulikerera asi Paska. Nkango Paska kwa tunda ko nkango ezi azi tanta asi ‘kupitakana.’ Ano masiku ogo muengeli gwaKarunga kwa pitakanene mambo aga va kwitire honde.—Exodus 12:1-13, 24-27, 31.

Jesus novapositoli vendi kwa gazarere kuhamena eyi apa va lire murarero goPaska. Konyima zoyo, Jesus kwa rugene sininke somulyo unene. Nampili ngoso, komeho zokusirugana, age kwa pwagesere mo mupositoli Judasa gokudira kulimburukwa. Makura Jesus ta gusa muhwi gomboroto ogu gwa hupire ko, ta kanderere, ta gu bamagura makura ta pe varongwa vendi. Ta tanta asi: “Guseni mu lye.” Makura ta va tantere hena asi: ‘Mboroto ezi kufanekesa rutu rwange oru ngani gava apa ngani mu fira.’

Jesus ta gusa hena nkinda zovhinyu zongeha. Ta kanderere hena, ta zi pe varongwa vendi, makura ta tanta asi: “Nwaa-nweni mo namuvenye.” Ano ta va tantere asi: ‘Vhinyu ezi kufanekesa honde zange. Ntaantani ngani tjisange honde zange mokumumangurura kononzo deni. Omu yi rugane mokudiworokera nge po.’—Mateusa 26:26-28; 1 Vakolinte 11:23-26.

Ono koneke asi Jesus kwa tente asi varongwa va hepa kuyirugana mokumudiworokera po ndi?— Awo hena kapi va hepere kulya murarero goPaska. Nye, rumwe momvhura awo ngano va hepere kulya murarero ogu gokulikarera mokudiworoka Jesus nonomfa dendi. Murarero ogu kugutumbura hena asi Murarero gwaHompa. Naina ose kugutumbura asi Ediworoko. Morwasinke?— Morwa ago kutudiworokesa eyi ga tu ruganenene Jesus noGuhwe, Jehova Karunga.

Mboroto za hepa kutuninkisa tu gazare rutu rwaJesus. Age ga lizamberere mokugava rutu rwendi yipo ngano tu gwane mwenyo gwanarunye. Nye ngapi kuhamena vhinyu zongeha?— Azo za hepa kutudiworokesa mulyo gohonde zaJesus. Azo mulyo unene kupitakana honde zonzwigona zoPaska moEgipite. Ono yi diva asi morwasinke?— Bibeli kutanta asi honde zaJesus kuvhura kudongonona po nonzo detu. Ano apa ngava dongonona po nonzo detu nadinye, ose kapi ngatu vera hena nokukurupa ntani nokufa. Twa hepa kugazara eyi apa atu kara pEdiworoko.

Kuvhura nkenye gumwe a lye komboroto nokunwa kovhinyu pEdiworoko ndi?— Jesus kwa tanterere ava ava li ko nokunwa ko asi: ‘One ngomu ka hamena moUhompa wange nokukahingira poyipundi meguru kumwe name.’ (Rukasa 22:19, 20, 30) Eyi kutanta asi awo ngava za meguru mokukakara vahompa kumwe naJesus. Yipo nye, vaava tupu va kara nehuguvaro lyokukapangera kumwe naJesus meguru yiwo va hepa kulya komboroto nokunwa kovhinyu.

Nye nampili ava ava dili kulya komboroto ndi kunwa kovhinyu nawo va hepa kukara po pEdiworoko. Ono diva asi morwasinke?— Morwa Jesus nose ga tu fililire. Pokukara pEdiworoko, ose kuna kulikida asi kapi twa divara. Ose kuna kudiworoka uhwi wouwa ou ga tu pere Karunga.

Matjangwa aga aga likida mulyo gosizoweseso saJesus kuna kara 1 Vakolinte 5:7; Vaefeso 1:7; 1 Timoteusa 2:5, 6; ntani 1 Peturusa 1:18, 19.

[Mafano pepenuno 193]

Ngapi omu va lifene oAdamu naJesus, ntani morwasinke ya karerere nomulyo asi va lifane?

[Efano pepenuno 194]

Ngapi omu honde zonzwigona za poperere Vaisraeli?

[Efano pepenuno 194]

Yisinke nazi vhura kuturuganena honde zaJesus, ezi ga fanekesere kovhinyu?