Egaununo 38

Eyi natu harera Jesus

GAZARA asi ove kuna kara mowato ou una kudama. Ove no ka hara ngano gumwe a ku popere ndi?— Ngapi nsene gumwe na lizambera mwene mokuyirugana ngoso?— Oyo yiyo ga rugene Jesus. Ngamoomu twa lirongere mEgaununo 37, age kwa geve eparu lyendi ngosizoweseso yipo tu vhure kuparuka.

Yimo, Jesus kapi a tu parura kokudama momema. To diworoka asi kosinke ga tu parwire?— Age kwa tu parura kononzo ntani nokonomfa edi twa pinga natuvenye kwaAdamu. Nampili ngomu vantu vamwe va rugana yininke yoyidona, nawo kwa va fililire Jesus. Ove ngano kuvhura o ture eparu lyoge mosiponga mokuparura vantu vangoso ndi?—

Bibeli kutanta asi: “Yokufira muntu gomuhungami, yidigu komuntu. Kufira muntu gomuwa mpamwe kuvhura kukulitokwera.” Nye Bibeli za faturura asi Jesus ‘ga fililire vadinikarunga.’ Oyo kwa kwatera mo nampili vantu ava ava dili kukarera Karunga! Bibeli za gwederera ko hena asi: “Apa twa kere tu vananzo [simpe kuna kurugana yininke yoyidona], Kristusa yipo ga tu fililire.”—Varoma 5:6-8.

Kuvhura o diworoke ko mupositoli gumwe ogu ga rugene nare yininke yoyidona ndi?— Mupositoli gwina kwa tjenge asi: ‘Jesus Kristusa kwa wizira mouzuni asi a ya parure vananzo. Ano ame, nyame munanzo gomunene po nye.’ Mupositoli ogu ga uyungire oyo yige Paurusa. Age kwa tente asi age kwa kere ‘nare mugova’ ntani kwa parukire “moyirwanangana.”—1 Timoteusa 1:15; Titusa 3:3.

Gazadara ko tupu asi eharo lyokusika kupi ga kere nalyo Karunga mokutuma Munwendi a ya fire vantu vangoso! Gusa Bibeli zoge tu rese kuhamena eyi mwaJohanesa egaununo 3, velise 16. Azo kutanta asi: “Yeeyi Karunga kwa here uzuni [kutanta asi vantu ava va kara pevhu] unene-nene, yiyo ga u pere Munwendi gelike a huru, asi nkenye ogu a mu pura a dire kuzonauka, nye a kare nomwenyo gwanarunye.”

Jesus ga yi likidire asi nage kwa tu hara ngwendi moomu va tu hara oGuhwe. Kuvhura o diworoke asi mEgaununo 30 mobuke ezi, twa resere kuhamena omu ga hepere Jesus momasiku gena va mu kwete. Age kwa mu twere kembo lyomupristeli gomunene Kayifasa, oku va ka mu pangwilire. Awo kwa retere mo nombangi doyimpempa edi da uyungire yimpempa kuhamena Jesus, ano vantu kwa mu toonene nononyongo. Apa yipo ga patanene Peturusa kuhamena Jesus asi kapi ga mu diva. Tu ninke nye asi nose yipo twa kere ntani twa mwene eyi yina kuhoroka.

Azo kwa kere ngurangura. Jesus kapi ga rere masiku nagenye. Morwa mpanguro ezi va rugene masiku kapi za kere paveta, vapristeli tava zigida usimbu-simbu masimbi goVajuda mokuyarugana hena mpanguro zimwe. Mompanguro ozo simpe tava rundire Jesus asi age kurwanesa Karunga.

Makura vapristeli tava manga Jesus, ntani tava mu twara kwaPiratusa, mupangeli goVaroma. Awo kwa tanterere Piratusa asi: ‘Jesus kuna kurwanesa epangero. Va hepa kumudipaga.’ Nye Piratusa ta yi nongonona asi vapristeli kuna kutanta yimpempa. Makura Piratusa ta va tantere asi: ‘Ame kapi na gwana mo unzoni momugara ogu. Tani mu mangurura a ze.’ Nye vapristeli novantu vapeke tava zigire asi: ‘Hawe! Mu dipaga!’

Konyima, Piratusa ta hetekere ko hena kutantera vantu asi ta mangurura Jesus a ze. Nye vapristeli tava ninkisa mbunga zi zigire asi: ‘Nsene o mu siga a ze, nove kuna kurwanesa epangero! Mu dipaga!’ Mbunga makura tazi zogerere unene. Ono yi diva asi yisinke ga rugene Piratusa?—

Age ya mu sumpilire. Pomuhowo age kwa geve Jesus va mu sopore. Makura ta mu gava kovakwayita va ka mu dipage. Awo kwa tulire nkata zomega pomutwe gwaJesus ntani nokumuswaura pokumutongamena. Makura tava pe Jesus sitji ndi ngundi zonene a zi simbe nokumutwara ponze zositata kevango oku ngava tumbura asi Evega lyoYikora. Oko yiko va ka pamparere mawoko nonompadi daJesus kositji. Awo makura tava si sikameke yipo Jesus a zenzerere ko. Age kwa pitire sili honde. Age kwa zuvhire hena kukora kokunene.

Jesus kapi ga fire poopo. Age kwa zenzererere tupu kooko kositji. Vapristeli wovanene kwa swawire Jesus. Ano ava va pitire monzira kwa tente asi: ‘Nsenesi o MunwaKarunga, liturura ko nyamoge kositji oko!’ Nye Jesus ga divire eyi va mu tuminine oGuhwe a ya rugane. Age ga divire asi ga hepa kugava eparu lyendi lyokusikilira mo yipo tu vhure kukagwana mwenyo gwanarunye. Moruhura, koyiha yovili zautatu kositenguko, Jesus ta zigire koGuhwe makura ta fu.—Mateusa 26:36–27:50; Marukusa 15:1; Rukasa 22:39–23:46; Johanesa 18:1–19:30.

Jesus kwa lisigire unene naAdamu! Adamu kapi ga likidire eharo kwaKarunga. Age kapi ga limburukwire Karunga. Ntani age kapi ga likidire eharo kwetu. Natuvenye kwa tu reta mononzo, morwa ga zonene. Nye Jesus kwa likidire eharo kwaKarunga noku kwetu. Age narunye nga limburukwa Karunga. Jesus kwa geve eparu lyendi yipo a vhure kugusa po kukora oku ga tu retera Adamu.

Nove kugavera rupandu kosininke sosinene esi ga ku ruganena Jesus ndi?— Apa o kanderere kwaKarunga, ove kumupandura pokutupa Munwendi ndi?— Mupositoli Paurusa kwa gaverere rupandu kweyi ga mu ruganenene Kristusa. Paurusa kwa tjenge asi MunwaKarunga ‘ga hara nge, yiyo ga gavera nge mwenyo gwendi panzambo.’ (Vagarata 2:20) Jesus kwa tu fira natuvenye nove name. Age kwa geve eparu lyendi lyokusikilira mo yipo tu gwane mwenyo gwanarunye! Yosili ozo kuna kara konda zonene zeyi natu harera Jesus.

Mupositoli Paurusa kwa tjangerere Vakriste womositata saKolinte asi: ‘Eharo eli ga tu hara nalyo Kristusa yilyo ali rugana mwetu.’ Ngapi omu ali rugana eharo lyaKristusa mwetu? Ngapi omu ono kugazara?— Koneka elimbururo lyaPaurusa: ‘Kristusa kwa fira navenye, asi ava va kara nomwenyo, kapisi va kerere po hena mwavene, nye va kerere po googu ga fa.’—2 Vakolinte 5:14, 15.

Kuvhura o gazadare ko nonkedi edi no vhura kulikida asi ove kuna karere po Kristusa ndi?— Nkedi zimwe kuna kara pokutantera ko vapeke kweyi wa lironga kuhamena Kristusa. Ndi gazadara ko kweyi: Ove kuvhura o kare nyovelike, ano onane ndi otate woge ndi muntu gwapeke kapi ana kumona eyi ono kurugana. Kuvhura o tarere malikwamo gokotivi ndi nampo o rugane yininke eyi ono diva asi ngano kapi nayi hafesa Jesus ndi?— Diworoka asi Jesus ngesi kuna kuparuka, ntani age kuvhura kumona nkenye eyi atu rugana!

Konda zapeke hena zeyi natu harera Jesus kuna kara asi tuna hara kutemwinina Jehova. Jesus kwa tente asi: ‘Tate ga hara nge.’ Ono diva asi morwasinke Jehova ga harera Jesus ntani neyi twa hepera kumuhara ndi?— Morwa Jesus kwa kere neharo lyokutufira yipo zi sike mo mpango zaKarunga. (Johanesa 10:17) Tu ruganeni eyi azi tu tantere Bibeli asi: “One mu vana vaKarunga, age kwa mu hara. Omu heteke nye kukara moomu ga kara age! Omu lihara-hare, moomu ga tu here Kristusa, yiyo ga tu ligavera mwene.”—Vaefeso 5:1, 2.

Mokugwederera rupandu rwetu kwaJesus ntani neyi ga tu ruganena, resa Johanesa 3:35; 15:9, 10; ntani 1 Johanesa 5:11, 12.

[Mafano pepenuno 199]

Yininke musinke va mu rugene Jesus apa ga tu filililire?

[Efano pepenuno 200]

Yisinke natu vhura kurugana mokulikida asi twa hara Jesus?

[Efano pepenuno 201]

Yilye gokuvhura kumona nayinye eyi atu rugana?