Egaununo 41

Vanona ava ava hafesa Karunga

OMU ono kugazara, munona musinke ga kere pevhu ogu ga hafesere unene Jehova?— Munwendi, Jesus. Tu ze tu zogere kuhamena yininke ga rugene Jesus mokuhafesa oGuhwe vemeguru.

Oku va tungire oJesus ngava gendi po sinano somazuva gatatu mokuza koJerusarema, oku kwa kere ntembeli zaJehova zongwa. Jesus kwa tumbwire ntembeli asi ‘nzugo zaTate.’ Age nepata lyawo ngava zi ko nkenye mvhura mokukakara posipito soPaska.

Mvhura zimwe, apa ga kere Jesus nonomvhura 12, epata lyawo kwa kere morugendo rokukatunda kosipito soPaska. Dogoro paapa va pwizumukire masiku ntani va nongwenene asi Jesus mwato movanekoro novakaume ava va gendere kumwe nawo. Poopo tupu oMariya naJosefa tava tengura koJerusarema va ka papare Jesus. Omu ono kugazara, kupi oku ga kere Jesus?—

Awo tava ka gwana Jesus montembeli. Age kuna kupurakena kovarongi oku tava pura mapuro. Ano apa varongi va mu pulire mapuro, age ga vhulire kuvalimburura. Awo kwa va tetukisire malimbururo gendi gomawa. Ono kwata nye egano eyi Karunga ga haferere Munwendi ndi?—

Yosili, apa oMariya naJosefa va ka gwene Jesus, awo kwa lizuvhire mbili. Nye Jesus kapi ga kere nosinka. Age ga divire asi ntembeli kwa kere evango lyewa lyokuvhura kukara. Age ta va limburura asi: ‘Kapi mwa diva asi, nyame tupu kukara monzugo zaTate ndi?’ Age ga divire asi ntembeli kwa kere nzugo zaKarunga, ntani ga haferere kukara mo.

Konyima zeyi, oMariya naJosefa tava twara Jesus kembo koNasareta. Omu ono kugazara, Jesus ga limburukwire vakurona vendi ndi?— Bibeli kutanta asi age ‘nga va zuvhu.’ Omu ono kugazara, yisinke yina kutanta oyo?— Ayo kutanta asi age nga va limburukwa. Yimo, age nga rugana eyi ngava mu tantere vakurona vendi a rugane, nampili yirugana yemembo ngwendi kukavheta mema ketope.—Rukasa 2:41-52.

Gazadara ko si kweyi: Nampili ngomu ga sikililire mo Jesus, age ga limburukwire vakurona vendi wokudira kusikilira mo. Eyi ya hafesere Karunga ndi?— Yimo, morwa Nonkango dendi kutantera vanona asi: “Omu limburukwe kovakurona veni.” (Vaefeso 6:1) Nove ngo hafesa Karunga nsene o limburukwa kovakurona woge, ngamoomu ga yi rugene Jesus.

Nkedi zimwe omu no hafesa Karunga kuna kara pokutantera ko vapeke kumuhamena. Vantu vamwe kuvhura va uyunge asi eyi kapisi yiyo va hepa kurugana vanona. Nye apa vantu va here kuhagekesa vamatigona mokuyirugana, Jesus kwa va tanterere asi: “Kapi mwa resa rumwe asi, ‘Ove kwa ronga vanona novakeke, va ku hamberere’?” (Mateusa 21:16) Yipo nye, nsene sili tuna hara, natuvenye kuvhura tu tantere ko vapeke kuhamena Karunga gwetu gomuwa, Jehova. Ntani nsene ngatu yi rugana eyi, ngatu hafesa Karunga.

Kupi oku atu lirongo yininke yokuhamena Karunga eyi natu vhura kutantera ko vapeke?— Melirongo lyetu lyoBibeli lyekembo. Nye ose kulironga yoyinzi kevango oku ava pongere vantu vaKarunga. Nye ngapi natu diva asi wolye vantu vendi?—

Yisinke ava rugana vantu owo komapongo gawo? Awo sili kuronga eyi ya kara moBibeli ndi? Awo kuresa moBibeli ntani nokuzogera ko kweyi ava resa mo ndi? Monkedi zangoso yimo atu purakene kwaKarunga, ndi kapisi yimo?— Ntani komapongo goSikriste, ose kundindira mokukapurakena eyi a tanta Karunga, ndi ngapi?— Nye ngapi nsene vantu va uyunga asi kapisi hepero koge mokuparuka kuliza neyi azi tanta Bibeli? Kuvhura nye o tante asi awo vantu vaKarunga ndi?—

Poyili hena yimwe twa hepa kugazadara. Bibeli kutanta asi vantu vaKarunga ngava kara ‘mbunga zedina lyendi.’ (Yirugana 15:14) Mokumona asi edina lyaKarunga yilyo Jehova, kuvhura tu pure vantu nsene Jehova yige Karunga gwawo. Nsene nava limburura asi hawe, ose ngatu yi diva asi awo nani kapisi vantu vendi. Vantu vaKarunga ngano ngava tantera ko hena vapeke kuhamena Uhompa waKarunga. Ntani awo ngano ngava likida eharo lyawo kwaKarunga pokusikisa mo yipango yendi.—1 Johanesa 5:3.

Nsene wa diva vantu ava ava rugana yininke oyo nayinye, wa hepa kuponga kumwe nawo mokukarera Karunga. Wa hepa kupurakena nawa komapongo ogo ntani nokugava malimbururo apa ava pura mapuro. Oyo yiyo ga rugene Jesus apa ga kere monzugo zaKarunga. Ntani nsene ngo yi rugana, ngo hafesa Karunga, ngamoomu tupu ga yi rugene Jesus.

Kuvhura o diworoke ko vanona vamwe ava va tumbura moBibeli va hafesere Karunga ndi?— Timoteusa kuna kara sihonena sosiwa unene. Oguhwe kapi va pulire mwaJehova. Nye ozina Eunike ntani nozinakuru Roise, kwa kere vapuli. Timoteusa nga va purakene ntani ga lirongerere ko kuhamena Jehova.

Apa ga kulire Timoteusa, mupositoli Paurusa kwa ya dingwire modoropa ezi ga tungire Timoteusa. Age ga nongwenene elituromo eli ga kere nalyo Timoteusa mokukarera Jehova. Paurusa yipo nye ga hundilire Timoteusa mokuza kumwe nendi mokukaruganena Jehova momunene. Awo ngava tantere ko vantu kuhamena Uhompa waKarunga naJesus, nkenye oku ngava zi.—Yirugana 16:1-5; 2 Timoteusa 1:5; 3:14, 15.

MoBibeli kwa kara mo tupu yihonena yovamatigona ava va hafesere Karunga ndi?— Hawe. Koneka sihonena somukadonagona goMuisraeli ogu ga hafesere Karunga. Posiruwo esi ga parukire, pwa kere unkore pokatji komuhoko gwaSiliya nomuhoko gwaIsraeli. Ezuva limwe Vasiliya kwa rwanesere Vaisraeli, makura tava kwata mukadonagona ogo. Age kwa mu twere kembo lyaNamani, mupitisili govakwayita. Makura ta ka kara mukareli gwamukadaNamani.

Namani kwa kere nouvera woyingondwe. Kwato ndokotora ogu ga vhulire kumuvatera. Nye mukadonagona ogo goMuisraeli ga kere nepuro asi mukareli gumwe gwaKarunga gokulikarera, muporofete, kuvhura a vatere Namani. Yimo, Namani namukadendi kapi ngava karere Jehova. Mukadonagona ogo ngano ga hepere nye kuvatantera eyi ga divire ndi? Ngano nyove, yinke ngano wa rugene?—

Mukadonagona kwa tente asi: ‘Nsene Namani ngano a za komuporofete gwaJehova moIsraeli, age ngano tava ka mu verura uvera wendi woyingondwe.’ Namani ga pulire eyi ga uyungire mukadona, makura ta zi komuporofete gwaJehova. Apa ga rugene eyi ga mu tanterere muporofete a rugane, age kwa verukire. Ano eyi ya ninkisire Namani a kare mukareli gwaKarunga gosili.—2 Vahompa 5:1-15.

Ngamoomu ga yi rugene mukadonagona gwina, nove ono hara kuvatera muntu a lironge kuhamena Jehova ntani neyi na vhura kurugana mokumuhafesa ndi?— Wolye ava ono kugazara no vhura kuvatera?— Yimo, pomuhowo vantu owo kuvhura va gazare asi kapi vana hepa evatero. Nye ove kuvhura o va tantere ko kuhamena yininke yoyiwa eyi a rugana Jehova. Ntani awo kuvhura va purakene. Ove kuvhura o kare nousili asi eyi ngayi hafesa Karunga.

Makorangedo gamwe kovadinkantu mokuvavatera va hafere kukarera Karunga kuvhura kugagwana mEpisarome 122:1; 148:12, 13; Muudisi 12:1; 1 Timoteusa 4:12; ntani Vahebeli 10:23-25.

[Mafano pepenuno 213]

Apa ga kere Jesus munona, ngapi omu ga hafesere Karunga?

[Efano pepenuno 215]

Yisinke ga here kurugana Timoteusa, nampili ngomu oguhwe va dilire kukara vapuli?

[Efano pepenuno 216]

Ngapi omu mukadona ogu goMuisraeli ga hafesere Karunga?