Egaununo 42

Eyi twa hepera kurugana

YISINKE wa hara po unene, kurugana ndi kudanauka?— Yosili, kapi pwa kara epuko mokudanauka. Bibeli kwa uyungire kuhamena Jerusarema asi “mononzira ngamu zura hena vamati novakadona wokudanena mo.”—Sakaliya 8:5.

Murongi goMunene ga yi haferere mokutarera vanona vana kudanauka. Komeho a wize pevhu, age kwa tente asi: ‘Ame ponyonga zaKarunga na kere ngonkurungu, . . . tani pembura nkenye apa komeho zendi.’ Pokutumbura Jesus ‘nkurungu’ kulikida asi age kwa rugene kumwe naJehova meguru. Ano apa ga kere meguru, age kwa tente asi: “Tani hafa kumwe norudi rovantu.” Ngamoomu twa yi lirongere nare, Murongi goMunene kwa litulire mo unene mwankenye ogu, kukwatera mo vanonagona.—Yisewe 8:30, 31.

Omu ono kugazara, Jesus nga danauka apa ga kere munona ndi?— Yimo. Nye mokumona asi age kwa kere ‘nkurungu’ meguru, ga ya rugene hena pevhu ndi?— Jesus ngava mu tumbura asi “munwamuhongi goyikungu.” Age ngava mu tumbura hena asi “muhongi goyikungu.” Yinke yina kulikida eyi?— Josefa, ogu ga rerere Jesus ngamunwendi, ga mu rongere. Yipo nye Jesus nage ga ya kere muhongi goyikungu.—Mateusa 13:55; Marukusa 6:3.

Muhongi musinke ga ya kere Jesus?— Mokumona asi age ga kere ‘nkurungu’ meguru, ga ya kere hena muhongi gomunene pevhu ndi?— Koneka omu sa kere udigu unene sirugana sokukara muhongi goyikungu posiruwo sina. Jesus nampo ga hepere kuza nokukateta yitji nokuyitwara kembo, ano konyima ta yi saha nokuyirugana yitafura noyipundi ntani noyininke yimwe hena.

Omu ono kugazara, Jesus ya mu reterere ruhafo yirugana oyo ndi?— Nsene no vhura kupangera yitafura noyipundi noyininke yimwe eyi ava ruganesa vantu, no hafa ndi?— Bibeli kutanta asi ayo ya wapa komuntu ‘mokubodjana eyi ga ruganena.’ Yirugana kureta ruhafo oru no dira kugwana pokudanauka.—Muudisi 3:22.

Yosili, yirugana kuturetera uwa panandunge noparutu. Vanona wovanzi kwa hara tupu kuhingira nokusimwitira ntani nokudanauka novakwawo. Makura tava ya kara udwa nondino ntani awo kapi ava ya kara sili noruhafo. Awo hena kapi ava retere vakwawo ruhafo. Yisinke twa hepa kurugana mokukara noruhafo?—

Twa lirongere mEgaununo 17 mobuke ezi asi kugava, nokurugana yininke mokuvatera vapeke, kureta ruhafo. (Yirugana 20:35) Bibeli kutumbura Jehova asi Karunga goruhafo. Ngamoomu tuna resa moYisewe, Jesus nga “pembura nkenye apa komeho zendi.” Morwasinke ga haferere Jesus?— Age ga geve konda zimwe apa ga uyungire asi: ‘Tate kurugana narunye, name yimo ngorooro ani rugana.’—Johanesa 5:17.

Apa Jesus ga kere pevhu, kapi ga kere muhongi goyikungu meparu lyendi nalinye. Jehova Karunga kwa mu pere sirugana sokulikerera mokurugana pevhu. Ono diva asi sirugana musinke oso?— Jesus kwa tente asi: ‘Ame nyame tupu kukaudisa mbudi zongwa zoUntungi waKarunga, yeeyi yiyo va tumina nge.’ (Rukasa 4:43) Poyiruwo yimwe apa Jesus nga zuvhisire vantu, ngava pura mwendi nokutantera ko vakwawo yininke eyi nga uyunga, ngamoomu ga yi rugene mukadi ogu goMusamaliya ana kara pefano.—Johanesa 4:7-15, 27-30.

Ngapi omu ga lizuvhire Jesus pokurugana sirugana esi? Omu ono kugazara, ga here kusirugana ndi?— Jesus kwa tente asi: “Nondya dange dedi dokurugana mpango zogu ga tuma nge nedi dokusikisa mo sirugana sendi.” (Johanesa 4:34) Ngapi omu o lizuvhu nsene to li nondya edi wa hara unene?— Eyi tayi ku ninkisa o kwate egano omu Jesus ga here sirugana esi ga mu pere Karunga a rugane.

Kulironga kurugana kuturetera ruhafo, yimo ga tu unga Karunga. Age kwa tanta asi sigava esi ga pa muntu kuna kara “a bodjane eyi ga ruganena.” Nsene o lironga kurugana ove simpe o munona, ove ngo hafa unene meparu lyoge nalinye.—Muudisi 5:19.

Eyi kapi yina kutanta asi munona kuvhura a rugane yirugana yomukondi, nye natuvenye kuvhura kurugana yirugana yongandi. Vakurona woge kuvhura va rugane nkenye ezuva yipo va gwane nondya. Ano, ngamoomu wa yi diva, pwa kwara yirugana yoyinzi eyi ya hepa po mokuzeresa embo.

Yirugana musinke no vhura kurugana membo eyi nayi retera uwa epata nalinye?— Kuvhura o vatere mokukuhwa yiyaha ndi kukavheta mema ndi kukatjava yitare ntani nokudamagura yidaneso yoge. Nampo ove kurugana ko yininke yimwe oyo. Yirugana oyo yosili kuretera epata uwa.

Tu ze tu tare omu yirugana yangoso ayi reta uwa. Nsene ono mana kudanauka, wa hepa kukapungura yidaneso yoge. Omu ono kugazara, morwasinke ya karera nomulyo eyi?— Kuninkisa embo li kare lina zere ntani hena kukandana po yiponga. Nsene o dira kudamagura yidaneso yoge, ezuva limwe onane woge ngava wiza membo awo vana simbi nomurongero dononzi makura tava lyata posidaneso simwe. Kuvhura va lipundure nokuliganda makura tava remana. Nampo kuvhura hena va ze kosipangero. Aso ngano kapi nasi kara sininke sosiwa, ndi ngapi?— Yipo nye, nsene o pungura yidaneso yoge konyima zokudanauka, ayo kuretera uwa navenye.

Pwa kara hena sirugana simwe sovanona. Pasihonena, yirugana yokosure. Kosure ove kulironga omu no resa. Vanona vamwe kuhafera kuresa, ano vapeke kuvadigopera. Nampili yi kare udigu pomuhowo, ove ngo hafa nsene o lironga kuresa nawa. Nsene o diva kuresa, ove ngo vhura kulironga yininke yoyiwa yoyinzi. Ove ngo vhura kuresa nyamoge Bibeli, buke zokutunda kwaKarunga. Nsene o rugana nawa yirugana yoge yokosure, ayo sili kureta uwa, ndi kapisi yimo?—

Poveli vantu vamwe va dira kuhara kurugana. Nampo wa diva ko muntu gumwe gwangoso. Mokumona asi Karunga kwa tu unga tu rugane, twa hepa kulironga kuhafera yirugana. Ngapi omu ga haferere Murongi goMunene sirugana sendi?— Age kwa si haferere ngwendi kuna kulya nondya edi ga here unene. Sirugana musinke ga rugene?— Sokutantera ko vapeke kuhamena Jehova Karunga ntani nomu nava vhura kugwana mwenyo gwanarunye.

Pana kara eyi nayi tu vatera mokuhafera yirugana. Lipura nyamoge asi: ‘Morwasinke sina hepere kusirugana sirugana esi?’ Nsene wa diva eyi sirugana sa karera nomulyo, ngayi ku tumangeda unene mokusirugana. Si kare asi sirugana oso udigu ndi ureru, si rugana nelituromo. Nsene o yi rugana, ngo gwanena mo ruhafo mweyi ngo rugana, ngwendi Murongi gwetu goMunene.

Bibeli kuvhura kuvatera muntu a kare murugani gomuwa. Resa eyi za uyunga moYisewe 10:4; 22:29; Muudisi 3:12, 13; ntani Vakorosi 3:23.

[Efano pepenuno 217]

Yisinke ga haferere Murongi goMunene komeho zokuwiza pevhu?

[Mafano pepenuno 218]

Yirugana musinke ga rugene Jesus apa ga kere pevhu?

[Efano pepenuno 221]

Morwasinke ya karera nomulyo mokupungura yidaneso yoge konyima zokuyidanesa?