Ngapi atu vatere vanavazinyetu apa ava kara moyimpagwa?

Nsene simpagwa sina horoka, Nombangi daJehova kurugana ko yuma usimbu mokuvatera vanavazinyawo ava sina kundama. Yirugana yangoso kulikida eharo lyetu lyosili kovakwetetu. (Johanesa 13:34, 35; 1 Johanesa 3:17, 18) Mononkedi musinke atu livatere?

Ose kugava yimaliwa. Apa moJudeya mwa kere erumbu lyenene, Vakriste womoAntiyokiya kwa tumine yimaliwa koVakriste vakwaawo. (Yirugana 11:27-30) Mokulifana, apa atu zuvhu asi vanavazinyetu wokoyirongo yapeke kuna kuligwanekera noudigu, ose kutuma yimaliwa kupitira moyigava yomombungakriste yipo vanavazinyetu va ka livaterese ko.—2 Vakolinte 8:13-15.

Ose kulizambera mokuvatera. Vakuronambunga womomukunda omu sina horokere simpagwa kudivilisa asi vanavazinyawo vana va gwana ntani vawaawa. Komitiye zokuvatera kuvhura kugava nondya nomema gokunwa noyidwara nomararo nonomutji. Vanavazinyetu ava va kara noudivi, kulizambera va ze va ka vatere kukawapukurura mambo noYinyanga yoUhompa eyi yina zonauka. Uumwe ou atu hafere ngombunga ntani udivi ou twa gwana pokuruganena kumwe kutuvatera tu rugane ko yuma usimbu poyiruwo yoyidigu. Nampili ngomu atu vatere “vapuli vakwetetu,” nye simpe kuvatera nava wopeke ava va dira kuhamena koukareli wetu.—Vagarata 6:10.

Ose kugava ekorangedo lyomoBibeli. Ava ava ligwanekere noyimpagwa va hepa ehengagwido. Poyiruwo yangoso, ose kugwana ehengagwido kwaJehova, “Karunga ogu a kwafa nkenye apa.” (2 Vakolinte 1:3, 4) Ose kutantera ko owo vana guwu matumbwidiro gomoBibeli, pokuvahengagwida asi Uhompa waKarunga ntaantani ngau ka hagekese po yimpagwa nayinye eyi ayi reta po kukora noruhepo.—Ehororo 21:4.

• Morwasinke Nombangi adi vhulire kurugana ko yuma usimbu poyiruwo yoyimpagwa?

• Ehengagwido musinke lyomoBibeli natu gava kowo ayi kundama yimpagwa?