Mawapaiko gomavango goukareli

VAKARELI wousili vaJehova kwa va pangera va ponge kumwe va lironge oku tava likorangeda. (Heb. 10:23-25) Evango lyokuhova lyoukareli wovantu vaKarunga, Vaisraeli, kwa kere ‘Nkongoronzugo zoMagwanekero.’ (Ex. 39:32, 40) Konyima, Saromo, munwaNdafita ta tungu nzugo ndi ntembeli mokufumadekera po Karunga. (1 Vah. 9:3) Konyima zapa ntembeli va zi zonagwire po momvhura 607 komeho a wize Jesus pevhu, Vajuda kwa tulire po mawapaiko va pongere momatungo ngava tumbura asi nosinagoge mokukarera Karunga. Mwaza siruwo, ntembeli kwa zi tungwilire hena, ano yimo ngava ruganene ukareli wousili. Jesus nga rongere monosinagoge nomontembeli. (Ruk. 4:16; Joh. 18:20) Jesus nga ruganene epongo nampili pondundu paapa.—Mat. 5:1–7:29.

² Konyima zapa ga fire Jesus, Vakriste ngava pongere momavango gamwe nomomambo mokuronga Matjangwa nokuhafera ukaume novapuli vakwawo. (Yirug. 19:8, 9; Rom. 16:3, 5; Koros. 4:15; Fir. 2) Poyiruwo yimwe, ngava pongere komavango gokuhorama yipo ava ngava va hepeke va dire kuvagwana. Yosili, vakareli vaKarunga wovalimburukwi vanare va kere neharo lyokuponga kumwe momavango goukareli yipo Jehova a va ‘ronge.’—Jes. 54:13.

³ Naina, Vakriste kuruganesa mavango gamwe ntani mambo va pongere mo. Momambo unene po kuruganena mo mapongo gomokuzuvhisa. Ava ava gava mambo gawo va pongere mo, awo kuyihafera. Wovanzi kulizuvha asi elikwatakano lyawo naJehova kwa ya nkondopara morwa kugava mambo gawo va pongere mo.

SINYANGA SOUHOMPA

⁴ Mavango aga ava pongere Nombangi daJehova kugatumbura asi Sinyanga soUhompa. Awo kuranda evango nokutungira po Sinyanga soUhompa ndi kuwapukurura etungo eli lya kara po nare. Mokurerupika yininke nokusesupika mukoso, pamwe Sinyanga simwe kusiruganesa nombungakriste dongandi nsene hepero. Ano komavango gamwe, kuhundira etungo limwe va pongere mo. Yinyanga yoyipe ntani neyi ava wapukurura kuyitungika. Ano nsene yoyinunu tupu vana wapukurura ko koSinyanga oso, kapisi hepero va si tungike hena.

⁵ Sinyanga soUhompa kapisi va si tunge morupe rokulimonekesa kovantu womomukunda. Nampili yi lisige kuliza nonomukunda, sitambo soyinyanga simwe tupu. (Yirug. 17:24) Kuliza nomaukaro gomomukunda, aso sa hepa kukara sokuwapera ntani omu nava vhura kupongera vantu.

⁶ Nombungakriste nadinye doNombangi daJehova kugava yigava yokuruganesa koSinyanga soUhompa esi ava pongere. MoSinyanga kapi ava rugana mo sumina ndi mu kare yikumba yoyigava. Amo kwa kara mo yikesa yipo ava ava wiza komapongo va ture mo yigava eyi ava ruganesa koyihepwa yombungakriste. Awo kugava kutundilira komutjima kapisi komusininiko.—2 Kol. 9:7.

⁷ Navenye womombungakriste kuyihafera pokugava yigava ntani nokulizambera mokuzeresa Sinyanga soUhompa nokusiwapeka. Mukuronambunga ndi mukwafimbunga yiwo ava wapaike elikwamo lyokuzeresa sinyanga. Nkenye kambunga koyirugana yokuzuvhisa kukara norufo rokuzeresa sinyanga, ano mupitisili gokambunga oko ndi muvateli yige a pitisire. Va hepa kuzeresa monda noponze zoSinyanga soUhompa, morwa eyi kuyererepeka Jehova nombunga zendi.

⁸ MoSinyanga esi adi pongere nombungakriste dononzi, vakuronambunga womonombunga odo kutulisa po Komitiye zepakerombili Sinyanga, ezi azi pakere mbili yininke nayinye yomosinyanga. Mbunga zovakuronambunga kuhorowora munazinyetu gumwe gomugara a kare muwapaiki goKomitiye ozo. Mepitisiro lyombunga zovakuronambunga, komitiye ozo kudivilisa asi sinyanga kuna kusizeresa nawa nokusiruganesa monaruwa ntani asi yokuruganesa nokuzeresesa sinyanga yina gwanene po. Eyi kutanta asi nombungakriste edi adi pongere mo da hepa kuruganena kumwe.

⁹ Nsene Sinyanga kusiruganesa nombungakriste dononzi, vili zomapongo kuvhura kuzirundurura-rundurura. Vakuronambunga kutura po elikwamo lyangoso monkedi zeharo, pokugazadara ko vapuli vakwawo. (Fil. 2:2-4; 1 Pet. 3:8) Kwato mbungakriste ezi nazi vhura kutokwera po nombungakriste nonkwawo. Apa mutareli gonombunga a ya dingura mbungakriste, nombungakriste nonkwawo edi adi ruganesa sinyanga oso kurundurura ezuva lyepongo lyawo lyomosivike oso.

¹⁰ MoSinyanga soUhompa kuvhura kuruganena mo yilika yomakwareko ndi yonomfa, nye va hepa kugwana epulisiro koKomitiye zoYirugana yomoMbungakriste. Vakuronambunga womokomitiye ozo, kutarurura nawa ehundiro olyo nokutokora kuliza nomavyukiso gokutunda koBeteli.

¹¹ Ava ava pulisire kuruganesa Sinyanga, va hepa kukara nonkareso zongwa ezi azi likida asi awo Vakriste wousili. MoSinyanga kwato kuruganena mo yininke eyi nayi pundukisa womombungakriste nokuswaukisa Jehova ndi mbungakriste. (Fil. 2:14, 15) Mepitisiro lyoBeteli, moSinyanga kuvhura kuruganena mo yilika yimwe yopampepo ngwendi Sikora zoYirugana yoUhompa ntani Sikora zoVazuvhisi wokukarerera.

¹² Evango eli atu pongere twa hepa kulifumadeka. Ndwareso nonkareso zetu ya hepa kulikida efumadeko kwaJehova. (Muud. 5:1; 1 Tim. 2:9, 10) Pokutura pasirugana magano aga, ose ngoso kuna kulikida rupandu komapongo getu goSikriste.

¹³ Ayo ya kara nomulyo asi posiruwo sepongo pwa ha kara epiyagano. Vanonagona va hepa kuhingira novakurona vawo. Ayo ya wapa asi vakurona ava va kara novanonagona va hingire kevango oku nava dira kudonganesa vakwawo, pokukatauka va tware vanona kokasaise ndi ponze.

¹⁴ Vanavazinyetu wovagara vamwe wokuwapera kwa va pa situmbukira sokuvatera koSinyanga. Awo va hepa kuvangarara nokutekura vantu monkedi zongwa zombili. Yirugana yawo kwa kwatera mo kutambura vagenda nokulikida yipundi ava vana hulilire kepongo nokuvarura vantu ava ava wiza kepongo. Nsene hepero, awo kutantera vakurona va takamese nawa vana vawo va dire kudukagana mosinyanga ndi kudanena kositantara komeho ndi konyima zepongo. Muvateli kuvhura kutantera mukurona ogu ga kara nomunona goutwini a mu pwagese ponze yipo a dire kudonganesa vapurakeni. Yirugana yovatareli kuvatera navenye womombunga yipo va hafere mapongo. Nsene kuvhura, nayi wapa kuruganesa vakuronambunga ndi vakwafimbunga ngovavateli.

ETUNGO LYOYINYANGA

¹⁵ Posiruwo sovapositoli, Vakriste vamwe kwa kere nongawo ano vamwe nohepwe, eyi yiyo ya ninkisire mupostoli Paurusa a tjange asi: “Pwantaantani, one muna kara neyi yoyinzi. Sininke sosiwa po nsene mu yi kwafesa vanaruhepo. Nye none nsene ngomu kara moruhepo, nawo ngava mu kwafesesa kweyi va weka, makura yininke ngayi lize nye.” (2 Kol. 8:14) Ayo yina ‘lizi’ ndi yina lifana neyi yina kuhoroka naina. Yigava ava gava vanavazinyetu mouzuni mudima kuyiruganesa mokutunga Yinyanga yoUhompa nokuyiwapukurura. Mbungagendesi nonombungakriste kupandura unene koyigava eyi ava gava vanavazinyetu mouzuni mudima.

¹⁶ Kuliza nonomukunda, Beteli kutara asi moSinyanga musinke nazi hamena mbungakriste zongandi. Beteli yizo azi tokora asi kupi ko nava vhura kudikira Yinyanga yoUhompa ntani nokuwapukurura eyi ya kara po nare. Apa yimpagwa ayi horoka, Beteli kutulisa po ewapaiko lyokuwapukurura Yinyanga nononzugo dovanavazinyetu eyi sina zonagura simpagwa.

¹⁷ Beteli kuruganesa valizambeli va vatere mokuranda evango, nokufaneka omu ngasi kara Sinyanga, nokuhundira epulisiro lyokusitunga ntani nokusipakera mbili. Apo pwa hepa valizambeli wovanzi, morwa pana kara hepero zokutunga Yinyanga moyirongo yoyinzi. Vazuvhisi navenye ava va gwana ekuho ava vana wapere ntani vana hara kuvatera kuna kuvakorangeda mokuzwida foroma nokuzigava koKomitiye zoYirugana yomoMbungakriste zomomukunda gwawo. Nampili vazuvhisi ava va dira kugwana ekuho kuvhura kuvatera kokutunga ndi kokuwapukurura Sinyanga sawo.

YINYANGA YOYIGONGI

¹⁸ Vakriste vanare ngava pongo motumbungagona. Ano poyiruwo yimwe, ngava pongo “mbunga zonene.” (Yirug. 11:26) Mokulifana, vantu vaJehova naina kuponga mbunga zonene poyigongi yezuva limwe ntani yomazuva gatatu. Poyiruwo yimwe, kufutira mavango va ruganene mo yigongi, ano nsene kwato mavango gokuwapera, awo kutura po ewapaiko lyokutunga Sinyanga soYigongi.

¹⁹ Poyiruwo yimwe, kuranda etungo nokuliwapukurura makura tava li ruganesa ngoSinyanga soYigongi. Rorunzi, kuranda evango va tungire po sinyanga soyigongi. Kuliza noyihepwa yomonomukunda, Yinyanga yoYigongi kulisiga mounene. Konyima zokukonakona nayinye eyi ya hamena mo ntani yimaliwa eyi na lipura etungo olyo ndi evango olyo, makura Beteli tazi tura po matokoro nsene asi kuvhura va li rande ndi hawe.

²⁰ Beteli kuhorowora vanavazinyetu va pakere mbili Yinyanga yoYigongi. Poyiruwo noyiruwo, Beteli kutulisa po mawapaiko gokuzigida nombungakriste domomukunda di ya zerese nokuwapukurura oku kuna hepa ewapeko. Ya wapa kovanavazinyetu mokulizambera kosirugana esi. Yipo nye, kuna kukorangeda nombungakriste di kwatese ko mawapaiko gangesi nomutjima nagunye.—Epis. 110:3; Mara. 1:10.

²¹ Sinyanga soYigongi pamwe kusiruganesa konosikora doUkareli, ngwendi nosikora doBibeli ntani nomapongo govatareli wonombungakriste. Ngwendi Sinyanga soUhompa, Sinyanga soYigongi naso kuna kara evango lyoukareli wetu. Apa atu zi koSinyanga soYigongi, nkareso zetu nondwareso nomaliwapaiko getu ga hepa kulikida efumadeko ngwendi moomu atu yi rugana koSinyanga soUhompa.

²² Vantu wovanzi kuna kuwiza kombunga zaJehova pomazuva aga gopouhura. Eyi kuna kulikida asi Jehova kuna kutungika mbunga zendi. (Jes. 60:8, 10, 11, 22) Eyi yiyo nye tuna harere kukwatesa ko mawapaiko gokuzeresa mavango getu goukareli yipo ga kare gana wapa. Pokurugana eyi, ose ngoso kuna kulikida rupandu kositambo somavango aga mokutuvatera tu likorangede-korangede mokumona asi ezuva lyaJehova kuna kuhedera pepi.