Diworoka mukadaRoto

Roto kwa tungire kumwe nahekurwendi Abirahamu, mosirongo saKanani. Awo kwa ya kere noyimuna yoyinzi ano evango eli va kere enunu. Abirahamu ta tantere Roto asi: ‘Tu ligaunuke, horowora oku ono hara kukatunga.’ Abirahamu kapi ga ligazarere mwene, morwa ga pere Roto a horowore pomuhowo.

Roto kwa tere oku kwa kere wayi wounzi nomema gomanzi, pepi nositata sedina Sodoma. Makura Roto nepata lyendi tava horowora evango olyo.

Vantu womositata saSodoma naGomora kwa kere wovadona. Morwa udona ou ngava rugana, Jehova kwa tokwere kuzonagura yitata oyo. Nye Karunga kwa here kupopera Roto nepata lyendi yipo ga tumine vaengeli vavali va ka va pukurure asi: ‘Genderereni kutunda mo, morwa Jehova ta ya zonagura po sitata esi.’

Nye Roto kapi ga genderere kutunda mo. Age kwa lirenge. Makura vaengeli tava kwata kewoko Roto namukadendi novana vawo vavali wovakadona, va va pwagese mo mositata. Tava va tantera asi: ‘Dukeni! Kapisi mu tare konyima, nsene nomu tara ko tomu fu!’

Apa va ka sikire kositata sedina Sowara, Jehova makura ta rokesere mundiro moSodoma naGomora. Yitata oyo yivali kwa yi zonagwire po. MukadaRoto kapi ga limburukwire makura ta tara konyima, ta lisitunuka siguru somungwa. Nye Roto novana vendi kwa parukire morwa va limburukwire Jehova. Nampo va guvire morwa mukadaRoto kapi ga limburukwire. Nye va hefe kweyi va purakenene komapukururo gaJehova.