Ndafita naSauru

Konyima zapa Ndafita ga dipagere Golyata, Sauru ta tura Ndafita a kare mupitisili govakwayita vendi. Ndafita kwa fundire moyita, makura ta divikwa unene. Apa nga tundu Ndafita koyita vakadi ngava pwaga va dane oku tava dimbi asi: ‘Sauru kwa dipaga mayovi nye Ndafita mayovi nomurongo.’ Sauru kwa zuvhilire mfudu Ndafita yipo ga here kumudipaga.

Ndafita kwa divire kusika siumba. Ezuva limwe Ndafita kwa sikilire Sauru siumba, makura Sauru ta mu zuguma egonga. Ndafita ta li tembe, tali ka kwata mekuma. Yikando yoyinzi, Sauru nga hetekere ko kudipaga Ndafita. Ndafita yipo ga dukilire momburundu a ka vande.

Sauru kwa zire novakwayita 3 000 va ka papare Ndafita. Sauru kwa ka hwililire mekombombo eli ga vende Ndafita novakwayita vendi. Vakwayita vaNdafita tava mu wowotere asi: ‘Esi yiso siruwo ono gwana sokudipaga Sauru.’ Makura Ndafita ta zi kwa Sauru ta tete kakehe kerwakani lyendi. Sauru kapi ga yi zuvhire. Konyima, Ndafita kwa lizuvhire udona morwa kapi ga likidire efumadeko kwahompa ogu ga horowere Jehova. Age kapi ga pulisilire vakwayita vendi va dipage Sauru. Age kwa zigilire Sauru nokumutantera asi ngano ga mu dipagere. Sauru ga hagekere kutjida Ndafita ndi?

Hawe. Sauru kwa twikilire kupapara Ndafita. Masiku gamwe Ndafita naAbisayi kwa zire mokamba zaSauru. Abineli ogu nga kungu Sauru kwa ponyokere. Abisayi ta tantere Ndafita asi: ‘Esi yiso siruwo! Ninka ni mu dipage.’ Ndafita ta limburura asi: ‘Jehova mwene nga dipaga Sauru. Tu guse tupu egonga nokavaza kendi komema tu ze ko.’

Ndafita makura ta rondo kondundu, nokuzigira asi: ‘Abineli, morwasinke ono dilire kupopera hompa goge? Kupi lina kara egonga lyaSauru nokavaza kendi?’ Sauru ta dimburura ezwi lyaNdafita ta tanta asi: ‘Ngano ono dipaga nge, nye kapi ono yi rugana. Nina diva asi nyove ngo kwama ko mouhompa.’ Sauru ta tengura kombara zendi. Kapisi navenye vemepata lyaSauru kwa nyengere Ndafita.