Jonatana, mulimburukwi ntani uradi

Jonatana mbeli zaSauru, kwa kere ependa. Ndafita kwa tente asi Jonatana nga genderere kupitakana ekuvi ntani kwa kere nonkondo kupitakana nyime. Ezuva limwe, Jonatana kwa mwene vakwayita woVafilisiti 20 kondundu. Tatantere ogu nga simbi yirwiso yendi asi: ‘Natu va homokera nsene Jehova natu pa sidiviso. Nsene Vafilisiti nava tu tantera tu ze kwawo, aso tasi kara sidiviso sokuvahomokera.’ Vafilisiti tava zigire asi: ‘Wizeni oku!’ Makura Jonatana nogu ngamu simbire yirwiso tava rondo nokukadipaga vakwayita.

Jonatana ngano yige ga kweme oguhwe mouhompa, morwa yige mbeli. Nye ga divire asi Jehova ga horowora Ndafita a kare hompa goVaisraeli, nampili ngoso, kapi ga kere nomfudu. Jonatana naNdafita kwa ya kere vakaume wovanene. Tava litumbwidire asi ngava lipopera. Jonatana kwa pere Ndafita erwakani norufuro ntani nouta wonkanza ngo sidiviso soukaume wawo.

Apa Ndafita ga dukire Sauru, Jonatana kwa zire kwendi ta ka mu tantera asi: ‘Kapisi o tjire. Jehova ga ku horowora o kare hompa. Otate nawo va yi diva.’ Ono hara kukara nakaume gomuwa ngwendi Jonatana ndi?

Jonatana kwa tulire eparu lyendi mosiponga yipo a popere kaume kendi Ndafita. Ga yi divire asi hompa Sauru kwa here kudipaga Ndafita, ta tantere oguhwe asi: ‘Neyisi nomu tulira nzo mokudipaga Ndafita, yeeyi nayimwe si ga zona.’ Sauru kwa handukilire unene Jonatana. Konyima Sauru naJonatana kwa va dipagere moyita.

Konyima zapa ga fire Jonatana, Ndafita kwa paparere muna Jonatana gomugara Mefiboseti. Apa ga mu gwene ta mu tantere asi: ‘Name noguho kwa kere vakaume wovanene, ngani kupakera mbili eparu lyoge nalinye. Ngo kara mombara zange ntani ngo lya kositafura sange.’ Ndafita kapi ga divarere kaume kendi Jonatana.