Nonzo dahompa Ndafita

Apa ga fire Sauru, Ndafita ta kara hompa. Age nomvhura dendi 30. Konyima zapa ga kere mouhompa nomvhura dongandi, ezuva limwe kongurova age keguru lyombara zendi, ta mono mukadi gomuwa ana kulikuhwa. Edina lyendi Bateseba mukadaUliya gomukwayita. Ndafita ta tumu vantu va ka rete Bateseba. Makura ta hondere nendi ta kara nezimo. Ndafita kwa hetekerere ko kuhoreka nzo zendi. Age makura yipo ga tanterere mupitisili gwendi govakwayita a ka ture Uliya komeho zoyita va mu dipage. Apa ga fire Uliya moyita, Ndafita makura ta kwara Bateseba.

Nye Jehova ga mwene yininke nayinye oyo yoyidona. Yisinke ga rugene ko? Jehova kwa tumine muporofete gwendi Natana kwaNdafita. Ta mu tantere asi: ‘Mugara gumwe gongawo kwa kere nononzwi dononzi, ano muhepwe kwa kere nonzwigona zimwe ezi ga here unene. Mugara gongawo ta ka gusa nzwigona zomuhepwe.’ Apa ga yi zuvhire oyo Ndafita ta handuka nokutanta asi: ‘Mugara ogo ga fira kufa!’ Natana ta tantere Ndafita asi: ‘Mugara ogo nyove!’ Ndafita kwa guvire unene nokuuyunga asi: ‘Na zona kwaJehova.’ Nonzo odo kwa retere maudigu membo lyaNdafita. Jehova kwa tengekere Ndafita, nye kapi va mu dipagere morwa ga linunupikire nokuuyunga usili.

Ndafita kwa here kutungira Jehova ntembeli, nye Jehova kwa horowere munwendi Saromo asi yige nga mu tungira ntembeli. Ndafita ta tameke kupongaika yininke eyi ngava tungisa nokutanta asi: ‘Ntembeli zaJehova za hepa kufumana. Saromo simpe mudinkantu, nye tani mu vatere kupongaika yokutungisa.’ Ndafita kwa geve yimaliwa yoyinzi yokutungisa ntembeli. Age hena kwa paparere vantu wokutunga. Ndafita kwa pongaikire hena ngorodo nosisiliveli ntani noyitji yosedeli. Komeho a fe, Ndafita kwa pere Saromo magano omu nga tunga ntembeli. Ta tanta asi: ‘Jehova yige ana tantere nge ni ku tjangere yininke eyi. Jehova nga ku vatera. Wa ha tjira. Kwata mutjima o tameke sirugana.’