Hompa gomudona tava mu tengeke

Mombara zendi mositata saJesireli, hompa Ahaba nga mono sikunino saNabota. Ahaba kwa here sikunino oso, yipo ga here kusiranda kwaNabota. Nye Nabota ta nyoka, morwa Veta zaJehova kwa nyokesere kurandesa epya lyokupinga. Ahaba ga fumadekere etokoro lyaNabota ndi? Hawe. Ahaba kwa handukire unene. Ntani kwa guvire makura ta zi ta ka rara nokunyoka kulya.

MukadaAhaba, Hompa gomukadi gomudona Jesebeli, ta mu tantere asi: ‘Ove nyove hompa gwaIsraeli. Kuvhura o guse nkenye eyi ono hara. Ngani si mu gusa ni si kupe.’ Ta tjangere nombilive masimbi gomositata nokuvatantera va rundire Nabota asi ga swaura Karunga, va hepa kumudipaga nomamanya. Masimbi taga rugana nayinye eyi ga va tanterere Jesebeli, makura Jesebeli ta tantere Ahaba asi: ‘Nabota ana fu. Gusa sikunino.’

Nabota kapisi gelike muntu ga hana nzo ga dipagere Jesebeli. Age kwa dipagere vantu wovanzi ava va here Jehova. Ntani nga karere yikarunga yoyimpempa nokurugana yininke yimwe yoyidona. Jehova ga mwene nayinye eyi nga rugana Jesebeli. Yisinke ga rugene ko Jehova?

Apa ga fire Ahaba, munwendi Joramu ta kara hompa. Jehova yipo ga tumine mugara Jehu a ka tengeke Jesebeli nepata lyendi.

Jehu kwa rondere karukara kendi a ze kombara zaJesebeli. Joramu ta rondo mokarukara a simbagwire Jehu nokumupura asi: “Enye yombili tupu ono gendere?” Jehu ta mu limburura asi: ‘Omu nazi kara po mbili ngapi, awo onyoko Jesebeli kuna kurugana yininke yoyidona.’ Joramu ta pirura karukara kendi asi a duke. Nye Jehu ta ponyo Joramu sikutji makura ta fu.

Jehu ta zi kombara zaJesebeli. Apa Jesebeli ga zuvhire asi Jehu kuna kuwiza ta liwapeke kosipara nonohuki dendi, makura ta mu ndindire konzugo zekeguru pepi nekende. Apa ga ya sikire Jehu, ta mu morora nesandu. Jehu ta zigire vakareli vaJesebeli asi: ‘Mu zundwireni pevhu!’ Tava mu zundura a pitire pekende, ta ka gwira pevhu makura ta fu.

Konyima zoyo, Jehu kwa dipagere vana vaAhaba 70 nokuzeresa sirongo koukareli waBara. Ono dimburura asi Jehova ga diva yininke nayinye ntani nga tengeka vantu ava ava rugana yoyidona posiruwo sokuwapera ndi?