“Uhompa woge au wize”

Jehova kwa tumbwidira asi: ‘Kapi nga kukara malirankali nokukora nomauvera nonomfa. Ngani kokota mahodi nagenye komeho gawo. Yininke yoyidona ngava yi divara.’

Jehova kwa tulire Adamu naEva mosikunino saEdeni va paruke mombili noruhafo. Awo ngano va karerere Guhyawo gemeguru nokuzwida evhu novana vawo. Sitambo saJehova kapi sa runduruka, nampili ngomu Adamu naEva va dilire kulimburukwa. Mobuke ezi twa dimburura asi nayinye eyi a tumbwidire Karunga kusika mo. Uhompa wendi ngau ka reta matungiko pevhu ngwendi moomu ga yi tumbwidilire kwaAbirahamu.

Satana novaengeli vendi ntani novantu wovadona ngava ka va zonagura po. Nkenye gumwe nga ka karera Jehova. Kapi ngatu ka vera ndi tu fe. Nkenye ezuva ngatu pinduka nomarutu gononkondo nokuhafera eparu. Uzuni naunye ngau kara paradisa. Nkenye ogu nga kara nonondya nembo lyewa. Vantu ngava ka kara mombili, kwato nyanya noukorokotji. Yikasama kapi ngayi tu tjilisa ntani kapi ngatu yi tjira.

Ayo ngayi ka tu hafesa apa Jehova nga ka vhumbura vafe. Ose ngatu ka tambura vantu vanare, ngwendi Abeli naNowa naAbirahamu naSara naMosesa naRutu naEsitera ntani Ndafita. Ngatu ka lipakerera kumwe nawo mokukawapeka evhu li ka kare paradisa. Amo ngamu ka kara yirugana eyi ngatu ka hafera.

Jehova ana hara nove ngo ka kare mo. Ngo ka mu diva kupitakana omu o yi gazara. Tu twikireni kuhedera pepi naJehova nkenye ezuva, ngesi dogoro narunye!