Mbudi zongwa momaraka 500

POSIRUWO soyita yoparudi yomoRwanda, mbungagona zovatoroki kwa tjwayukire momberewa zawo zomutayi, pokusiga yiweka yawo. Nye awo va vhulire kusimba nokompiutagona dawo, edi va zire nado konokamba dovatjwayuki. Morwasinke? Yipo va ka twikire kutoroka yimbapiratjangwa yoBibeli meraka lyoRukinyarwanda.

Mudinkantukadi gomosirongo saAsia Mbindakano-pumezuva age kutopa-topa mokatji komasiku kokompiuta zendi, nokulididimikira eroroko noupyu ntani nedimo lyorutjeno eli ali donganesa sirugana sendi setoroko. Yisinke sitambo sendi? Yipo yirugana yendi yi dire kuhulilira kuyinduruka.

Vatoroki ava kuna kara ruha rombunga zovalizambeli wokusika po-2 300 ava ava rugana momavango gokupitakana po-190 mouzuni mudima. Awo wonomvhura dokutamekera 20 yi tware 90 ntani awo kulizambera vene yipo vantu va vhure kugwana ehengagwido kombudi zomoBibeli momaraka 500.—Ehororo 7:9.

Kupakera sinka nomuhoko domaraka gokulisiga-siga

Monomvhura dantaantani, sirugana soNombangi daJehova setoroko kuna kuligwederera sili unene. Pasihonena, momvhura 1985, Ruhungu kwa ru ndurukire momaraka 23 nkenye apa kumwe noru roRuingilisa, alyo kwa kere etomporo lyenene posiruwo sina. Naina Ruhungu kuna kurugwana momaraka gokusika po-176 ntani maRuhungu nagenye gavali kuganduruka posiruwo simwe tupu yipo varesi uzuni mudima va rese nombudi dokulifana.

Ruhungu yiso sifo selike ava nduruka nkenye apa momaraka gokusika po-50. Morwasinke? Nongesefa domouzuni edi adi nduruka kapi da kara netumangedo lyenene lyokunduruka yimbapiratjangwa momaraka gomonkarapamwe. Nye Nombangi daJehova mouzuni mudima kugava yigava yokugwanena po kutundilira komutjima yipo Nonkango daKarunga noyimbapiratjangwa yoBibeli yipo va vhure kukayigwana ava vana yi hepa.—2 Vakolinte 8:14.

Vantu kuhafera unene mbudi zoBibeli momaraka gavene. Pasihonena, yimbapiratjangwa yoBibeli ngesi kuna kuyinduruka moRumiskito, eraka eli ava uyunga vantu wokusika po-200 000 ava va kara moNicaragua. Mukadi gumwe kwa tulire mo ehundiro lyoBuke zange zomasimwititi goBibelia moRumiskito, ano apa va zi mu reterere pasitore gomomukunda ogo yipo ga kere. Apa pasitore ga mwene buke ozo zongwa, age kwa here kuzigusa. Mukadi ga nyokere kuzimupa, nampili apa pasitore ga here kumupa nokilograma dokusika po-20 domakunde gokofi makura age a mu pe buke.

Nomvhura murongo da ka pita, yimbapiratjangwa yoBibeli kwa yi toroka momaraka gomvharerwa gomanzi gomoMeksiko, kukwatera moRumaya noRunahuatl ntani noRutzotzil. Monomvhura murongo odo sivaro sonombungakriste doNombangi daJehova momaraka gomvharerwa nedi doRupuru-puru kwa ligwederera mosirongo oso kutundilira po-72 nokukasika po-1 200. Nampili ngomu Nombangi daJehova adi kunu mbuto zombudi zoBibeli monomutjima dovantu, awo kusigira Karunga a ninke mbuto ozo zousili zi kure.—1 Vakolinte 3:5-7.

Etoroko lyepe lyoBibeli momaraka 80

Monomvhura edi dantaantani, Nombangi daJehova kwa rugana unene mokunduruka Bibeli New World Translation of the Holy Scriptures nazinye ndi ruha rwazo momaraka gokusika po-80. Yitundwamo musinke ya kere? Gumwe goNombangi daJehova moAfrika Mbindakano kwa uyungire kuhamena Bibeli zoRutswana asi: “Ee, siruganeso musi kouwa! Aso ngasi vatera nge ni kwate egano Nonkango daKarunga momunene. Eraka eli va ruganesa mo uwaawa kuliresa ntani ureru.” Muresi gumwe goRutsonga gomoMozambique kwa tjenge asi: “Nampili ngomu pwa kara yimbapiratjangwa nayinye yoBibeli, pwa hana Bibeli kuna kara ngwendi sindundumo nomaruvadi nye kwato mvhura! Nampili ngoso, ngwendi mvhura za rokere apa va pwagesere New World Translation meraka lyoRutsonga.”

Owo ava toroka ntani nokuhanesa mbudi zongwa ezi za kara moBibeli kuna kusikisa mo uporofete wanare. Jesus Kristusa mwene kwa tente asi: “Mbudi zoNgwa ezi zoUntungi waKarunga tanko ngava zi divisa mwa za uzuni mudima, zi kare umbangi wonomuhoko nadinye, ntani nye ngaku kwama uhura.”—Mateusa 24:14.

[Nonkango dokonhi]

[Efano pepenuno 30]

(Nsene ono hara kutara sirongwa nasinye, tara simbapiratjangwa)

80 2010 500 2010

36 2000

13 1990 200 1990

190 1980

7 1970 165 1970

125 1960

1 1950 88 1950

SIVARO SOMARAKA

[Mafano pepenuno 29, 30]

Valizambeli wokusika po-2 300 kutoroka yimbapiratjangwa yoBibeli momaraka 500

BENIN

SLOVENIA

ETIYOPIYA

BRITANIA