Eyi ga rongere Jesus kuhamena Karunga

“Ogu ga diva nawa-nawa Guhwe kuna kara Muna. Ano Muna kuna hara kutantera ko wopeke kuhamena Guhwe yipo nawo va mu dive.”—RUKASA 10:22, CONTEMPORARY ENGLISH VERSION.

KOMEHO a wize pevhu, Mbeli zaKarunga kwa parukire siruwo sosire nelikwatakano lyenene noGuhwe. (Vakorosi 1:15) Yipo nye, Munwa ogu ga divire magazaro nomalizuvho ntani nomu ava rugana yininke oGuhwe. Ano apa ga wizire pevhu ngomuntu, age kwa tokomenenene kuronga usili kuhamena Guhwe. Kuvhura tu lirongere ko yoyinzi kuhamena Karunga pokupurakena kwaMunwendi.

Edina lyaKarunga Edina lyaKarunga, Jehova, kwa kere nomulyo unene kwaJesus. Munwa ogu kwa here vapeke nawo va dive edina lyoGuhwe ntani nokuliruganesa. Edina lyaJesus kutanta asi “Jehova Muzowoli.” Mesiku komeho zonomfa dendi, Jesus kwa kandererere kwaJehova asi: “Ame na va divisa edina lyoge.” (Johanesa 17:26) Yosili, Jesus kwa ruganesere edina lyaKarunga ntani nokulidivisa kovantu. Ngano ngapi omu vantu ava ga rongere Jesus va vhulire kukwata egano usili kuhamena Jehova, awo va hana kudiva edina lyendi ntani neyi lya karera po?a

Eharo lyaKarunga lyenene Jesus kwa kandererere kwaKarunga asi: “Tate,  . . ove kwa hara nge, uzuni awo simpe nokuusita si.” (Johanesa 17:24) Morwa Jesus ga limonenene eharo lyoGuhwe meguru, apa ga ya kere pevhu ga hetekerere ko kulikida eharo olyo mononkedi dokulisiga-siga.

Jesus kwa yi likidire asi eharo lyaJehova enene unene. Age kwa tente asi: “Karunga kwa here uzuni unene-nene, yiyo ga u pere Munwendi gelike a huru, asi nkenye ogu a mu pura a dire kuzonauka, nye a kare nomwenyo gwanarunye.” (Johanesa 3:16) Nkango zoRugereka va ruganesa “uzuni” kapi azi tanta asi “evhu.” Apa kuna tamba kovantu navenye. Karunga kwa hara vantu unene yiyo ga geve Munwendi ogu ga hara yipo vantu wovalimburukwi va manguruke mo moupika wononzo nonomfa, makura va kare nehuguvaro lyomwenyo gwanarunye. Kapi tatu vhuru kuhetakanesa ndi kukwata egano eharo lyangoso lyenene.—Varoma 8:38, 39.

Jesus kwa pamekere usili ou wokukorangeda unene asi: Jehova kwa hara unene nkenye gumwe govakareli vendi. Age kwa rongere asi Jehova age ngwendi musita ogu a tara asi nkenye nzwi zendi za lisiga ntani mulyo. (Mateusa 18:12-14) Ntani ga uyungire asi kwato nampili enzunge limwe ali gwire pevhu ga hana kuyidiva Jehova. Jesus kwa gwedererere ko asi: “Nonohuki nadinye dokonomutwe deni da pwa kuvara.” (Mateusa 10:29-31) Nsene asi Jehova ga kara nevhuliko lyokunongonona asi enzunge limwe kapi lina kara mosikorogo, kuvhura nye yi mu digopere mokunongonona nokupakera sinka nkenye mukareli gwendi ndi? Nsene asi nohuki nadinye dokonomutwe detu kudivarura Jehova, kuvhura nye yi mu digopere kunongonona yihepwa ndi maudigu ndi yinka yetu ndi?

Guhyetu gemeguru Ngamoomu tuna yi mono mosirongwa sina ka pita, Jesus yige MunwaKarunga gelike a huru. Yosili, Munwa ogu narunye nga tumbura Jehova ntani nokuuyunga kumuhamena asi ‘Tate.’ Nonkango edi ga uyungire Jesus montembeli apa ga kere nonomvhura 12, age kwa tumbwire Jehova asi ‘Tate.’ (Rukasa 2:49) Nkango “Tate” kwa moneka moMavangeli konyara yikando 190. Jesus nga uyunga kuhamena Jehova mononkedi dokulisiga-siga asi “Guhyeni,” “Guhyetu” ntani ‘Tate.’ (Mateusa 5:16; 6:9; 7:21) Pokuruganesa nontumbwisiso edi nemanguruko, Jesus kwa yi likidire asi vantu wononzo wokudira kusikilira mo kuvhura kutulisa po malikwatakano gomawa gokupama naJehova.

Nkenda ntani neharo lyokugusira po Jesus ga yi divire asi vantu wokudira kusikilira mo va hepa nkenda zonene zaJehova. Mosifanekeso sendi somumati gokuzumbana, Jesus kwa hetakanesere Jehova kwaguhya gonkenda gokugusira po ogu ga tambwire munwendi ga litezwilire. (Rukasa 15:11-32) Nonkango daJesus kutupa ehuguvaro asi Jehova kutara marunduruko momutjima gomuntu gomunzoni yipo a vhure kumulikida nkenda. Jehova kwa kara neharo lyokugusira po munanzo ogu ana litezurura. Jesus kwa fatwilire asi: “Nemeguru namo ngosikwawo ngali kara mo ehafo lyokuhafera munanzo gumwe ogu ana litezurura, kupitakana lyokuhafera vahungami nomurongo ntano-nane navatano-navane, ava va dira kuhepa elitezururo.” (Rukasa 15:7) Yilye ngano ogu na dira kuhara kuhedera Karunga gwangesi gonkenda?

Muzuvhi gomakanderero Apa ga kere meguru, Jesus ga mwene asi Jehova “kuzuvha makanderero” ntani age kuhafera makanderero govakareli vendi wovalimburukwi. (Episarome 65:2) Mosirugana sendi sokuzuvhisa, Jesus kwa rongere vantu omu nava vhura kukanderera ntani neyi nava vhura kukanderera. Age kwa va pukwilire asi: “Walye omu vhukisa [ndi rugurura, NW] nonkango dononzi.” Age kwa va korangedere hena va kanderere asi mpango zaKarunga ‘zi sike mo pevhu ngwendi meguru.’ Kuvhura hena tu kanderere mokuhundira nondya detu dankenye ezuva nokutudongwenena po nonzo detu ntani nokunyokera po maheteko. (Mateusa 6:5-13) Jesus kwa rongere asi Jehova kulimburura makanderero govakareli vendi monkedi zongwa aga ava gava kutundilira mepuro.—Mateusa 7:7-11.

Yosili, Jesus kwa rongere usili kuhamena Jehova Karunga. Nye, kosili sininke simwe kuhamena Jehova esi ga here Jesus kutantera ko vantu, aso kuna kara nkedi ezi nga ruganesa Jehova mokuretesa po marunduruko gomanene mokusikisa mo sitambo sendi kevhu eli ntani nokovantu. Sininke oso yiso sa kere ruha romulyo mezuvhiso lyendi.

[Nondanda dokonhi]