‘Muna kwa hara kuhorora Guhwe’
‘Nagumwe si ga diva Guhwe, ntudi Muna no, nogu ga yi harera kuyihorwera Muna.’—RUK. 10:22.
NGAPI OMU NO LIMBURURA?
Morwasinke Jesus ga wapera kuhorora oGuhwe?
Ngapi omu Jesus ga horwere oGuhwe kwava wopeke?
Mononkedi musinke no vhura kuhonena Jesus mokuhorora Guhwe?
1, 2. Epuro musinke ali piyaganeke vantu wovanzi, ntani morwasinke?
‘YILYE Karunga?’ Epuro eli kwa piyaganeka vantu wovanzi. Pasihonena, nampili ava ava litumbura asi Vakriste kwa pura asi Karunga Mutatu-gumwe, wovanzi va yi diva asi erongo eli nokuvhura si kulikwata egano. Mutjangi gumwe kwa dimburura asi: “Erongo eli udigu kulikwata egano. Nokuvhura si kulifaturura.” Sinzi sava va tambura erongo lyelisinto kwa pura asi kapi pwa kara Karunga. Awo kwa pura asi yisitwa nayinye kwa wiza po tupu pwayene. Charles Darwin, ogu ga totere po erongo lyelisinto, kapi ga patana asi yipo ga kara Karunga. Age kwa tente asi vantu kapi va kara nevhuliko lyokukwata egano Karunga.
2 Yi kare asi epuliro lyawo musinke, vantu wovanzi kwa gazadara ko komapuro gokuhamena Karunga. Nye apa va dira kugwana malimbururo gokuhafesa yipo va hageka kupapara Karunga. Satana kwa “zonagura nondunge dava va dira kupura.” (2 Kol. 4:4) Morwa oyo, sinzi sovantu kuna piyagana, awo kapi va diva usili wokuhamena Guhya, Musiti geguru nevhu!—Jes. 45:18.
3. (a) Yilye ogu ga tu horwera Musiti? (b) Mapuro musinke natu ka konakona?
3 Ayo kwa kara nomulyo asi vantu va lironge usili kuhamena Karunga. Morwasinke? Morwa vaava tupu ava “kugu edina” lyaJehova yiwo ngava paruka. (Rom. 10:13) Kukuga edina lyaKarunga kwa hamena mo kumudiva ngoMuntu. Jesus Kristusa kwa fatwililire varongwa vendi ediwo eli lyomulyo. Age kwa horwere oGuhwe kwawo. (Resa Rukasa 10:22.) Morwasinke ya karera asi Jesus gelike ga vhulire kuhorora oGuhwe? Ngapi omu ga yi rugene? Ntani ngapi omu natu vhura kuhonena Jesus mokuhorora Guhwe kwava wopeke? Tu zeni tu ka konakone mapuro aga.
JESUS KRISTUSA GELIKE GA WAPERA KUHORORA OGUHWE
4, 5. Morwasinke Jesus ga waperere kuhorora oGuhwe?
4 Jesus gelike ga wapera kuhorora nawa oGuhwe. Morwasinke? Morwa komeho va ka site yininke nayinye, Jesus age nare ga kere meguru ‘ngoMunwa gelike a huru gwaKarunga.’ (Joh. 1:14; 3:18) Ee, situmbukira musi sokulikarera! Komeho zokusita yisitwa yapeke, Munwa ga kere gelike noGuhwe yipo ga lirongere yikara yawo. Guhya noMunwa ngava zogere kumwe nokutunga po elikwatakano lyenene nomvhura dononzi. (Joh. 5:20; 14:31) Ee, ediwo musi kounzi ga kere nalyo kuhamena yikara yoGuhwe!—Resa Vakorosi 1:15-17.
5 Guhwe kwa horowere Munwa a kare muuyungilipo gwendi, ‘ngoNkango zaKarunga.’ (Ehor. 19:13) Yipo nye, Jesus ga waperere kuhorora oGuhwe kwava wopeke. Johanesa kwa sigonona Jesus asi “Nkango,” ogu ga kara “mevha lyaGuhwe.” (Joh. 1:1, 18) Johanesa apa kwa tembe kompo ezi za kere momazuva gawo pokulya. Mosiruwo sina, vantu apa ngava li, gumwe nga kara mevha lyamukwawo. Mokuhingira kumwe monkedi zangoso, awo ngayi va rerupire kuzogera kumwe. Yipo nye, Munwa mokukara “mevha” kwa likidire asi nga zogere kumwe noGuhwe.
6, 7. Ngapi omu lya nkondoparere elikwatakano lyaGuhya noMunwa?
6 Elikwatakano pokatji kaGuhya noMunwa kwa nkondoparere. Munwa kwa kere ‘ntundiliro zankenye ezuva, zoruhafo rwaKarunga.’ (Resa Yisewe 8:22, 23, 30, 31.) Elikwatakano lyawo kwa nkondoparere ngomu va ruganenene kumwe ntani ngomu Munwa ga lirongere kuhonena yikara yoGuhwe. Mesito lyoyisitwa yapeke yonondunge, Munwa ga mwene Jehova omu a ruganene kumwe nankenye gumwe gwayo, ntani ekwato egano lyendi kuhamena yikara yaGuhwe kwa nkondoparere unene.
7 Apa ga ya rwanesere Satana uhunga woupangeli waJehova, Munwa kwa lirongere omu Jehova a likida eharo nouhungami nounongo ntani nononkondo apa ga kohwenene po udigu ou. Eyi ya vaterere Munwa mokulironga omu na lididimikira maudigu aga ga ya ligwanekerere nago mosirugana sendi sokuzuvhisa apa pevhu.—Joh. 5:19.
8. Ngapi omu yihorokwa yomoBibeli ayi tu vatere tu lironge yoyinzi kuhamena yikara yaKarunga?
8 Morwa elikwatakano lyendi lyenene naJehova, Munwa kwa horwere mauzera nagenye kuhamena oGuhwe monkedi ezi na dira kumuhorora nkenye ogu. Nkedi zongwa po zokulironga oGuhwe kuna kara kulironga eyi ga rongere nokurugana Munwa. Pasihonena, kuvhura tu kwate egano nkango “eharo” pokuziresa tupu eyi azi tanta mobukenkango ndi? Hawe. Nye pokugazadara ko koyihorokwa yomoBibeli kuhamena sirugana saJesus nomu nga pakere mbili vapeke, ose kuvhura tu kwate egano ntanto ezi asi “Karunga yige eharo.” (1 Joh. 4:8, 16) Eyi kwa lifana hena noyikara yimwe yaKarunga eyi ga horwere Jesus kovarongwa vendi apa pevhu.
OMU JESUS GA HORWERE GUHWE
9. (a) Mononkedi musinke mbali Jesus ga horwere Guhwe kovasikuli vendi? (b) Gava sihonena esi ga ruganesere Jesus mokuhorora Guhwe.
9 Ngapi omu Jesus ga horwere oGuhwe kovarongwa vendi ntani noku kwava va ya kara vasikuli vendi? Age kwa yi rugene mononkedi mbali: kupitira merongo ntani monkareso zendi. Pomuhowo tatu ka lironga kuhamena erongo lyaJesus. Eyi ga rongere Jesus vasikuli vendi kuturonga magazaro nomalizuvho nonkareso zoGuhwe. Pasihonena, Jesus kwa fanekesere Guhwe komugara ogu ga wekere nonzwi, makura tapa zumbana nzwi zimwe. Jesus kwa tente asi nsene a ka zi gwana, “yilyo sa ehafo lyomu na ka hafera nzwi zimwe ozo kupitakana omu na hafera odo nomurongo ntano-nane nantano-nane, edi da dira kuzumbana.” Morwasinke Jesus ga ruganesere sifanekeso esi? Jesus kwa fatwilire asi: “Naguhyeni gemeguru yimo ngorooro ga hara asi potunona otu ngano paha kana kamwe.” (Mat. 18:12-14) Yisinke natu lirongera ko kwaJehova kosifanekeso esi? Nampili poyiruwo yimwe o lizuvhe asi ove kwato mulyo ndi vana ku sigilire, nye diworoka asi Guho gemeguru ga ku hara ntani kukupakera mbili. Age kukutara ngwendi gumwe ‘gopotunona oto.’
10. Ngapi omu Jesus ga horwere Guhwe kupitira monkareso zendi?
10 Nkedi zimwe hena omu Jesus ga horwere oGuhwe kovarongwa vendi kupitira monkareso zendi. Apa mupositoli Filipusa ga pulire Jesus asi: “Tu likida Guho,” Jesus kwa tente asi: “Ogu ga mona nge, ga mona hena Tate.” (Joh. 14:8, 9) Tarurura yihonena yimwe omu Jesus ga likidire yikara yoGuhwe. Apa munayingondwe ga likwamberere Jesus asi ngano a mu verure, Jesus kwa gumine mugara “goyingondwe” nokumutantera asi: “Nina yi panga, veruka!” Munayingondwe ga divire asi Jehova yige ga pere Jesus nonkondo dokumuverura. (Ruk. 5:12, 13) Ntani hena apa ga fire Rasarusa, varongwa kwa limonenene nkenda zaKarunga apa Jesus ‘ga handukire momutjima oku guna mu pwaga’ makura “ta lili.” Nampili ngomu Jesus ga yi divire asi ta ka vhumbura Rasarusa, age kwa guvire ngwendi moomu va guvire vekoro novakaume vaRasarusa. (Joh. 11:32-35, 40-43) Yosili, ove wa hara yihorokwa yomoBibeli kuhamena Jesus eyi ya ku vatera o limonenene nkenda zaGuhwe.
11. (a) Apa Jesus ga zeresere ntembeli, yisinke ga horwere kuhamena oGuhwe? (b) Morwasinke sihorokwa saJesus sokuzeresa ntembeli nasi tu pera ehuguvaro?
11 Yisinke no lirongera ko kwaJesus apa ga zeresere ntembeli? Gazadara eyi ya horokere: Jesus kwa pohwere ngora zonongodi, nokutjida mo ava va randesere nongombe nononzwi. Age kwa wayagwire pevhu yimaliwa yovasinti, makura ta gandanga yitafura yawo. (Joh. 2:13-17) Sirugana oso sononkondo kwa diworokesere varongwa vendi uporofete waNdafita asi: “Mupampi morwantembeli zoge kuna kutwera mwange ngwendi mundiro.” (Epis. 69:9) Eyi ga ruganene Jesus kwa likidire eharo lyendi lyenene lyokupopera ukareli wousili. To mono yikara yoGuhwe mwaJesus apa ono kuresa sihorokwa oso ndi? Eyi kutudiworokesa asi Karunga kapi tupu ga kara nononkondo dononene dokuyagusa po udona pevhu nye hena ga kara neharo lyokuyirugana. Eyi ga rugene Jesus kuhorora omu oGuhwe ava lizuvhu apa ava mono yininke yoyidona eyi yina kuhoroka pevhu naina. Ee, omu tupu ayi tu pe ehuguvaro apa atu lididimikire uhahungami!
12, 13. Yisinke natu lirongera ko kuhamena Jehova monkedi omu Jesus ga tekwire varongwa vendi?
12 Tu zeni tu ka konakone sihonena hena simwe, monkedi omu Jesus nga tekura varongwa vendi. Awo kwa liyonga-yongere asi yilye munene po mokatji kawo. (Mar. 9:33-35; 10:43; Ruk. 9:46) Morwa Jesus kwa kere noGuhwe siruwo sosire, ga divire omu a lizuvhu Jehova kuhamena nkareso zangoso zokulinenepeka. (2 Sam. 22:28; Epis. 138:6) Jesus ga mwene hena nkareso zokulinenepeka mwaSatana Muzonaguli. Satana kuligazara tupu pwamwene nokuliharera mfumwa. Omu tupu ya guvisire Jesus apa ga mwene nkareso zokulinenepeka kuna kuhoroka mokatji kovarongwa vendi ava ga dewire! Azo hena kwa monekere mokatji kovapositoli ava ga horowere! Awo kwa likidire nkareso zokulinenepeka dogoro mezuva lyonomfa daJesus apa pevhu. (Ruk. 22:24-27) Nye, Jesus ga twikilire kuvapukurura nombili, ga hana kuzumbanesa ehuguvaro asi komeho nawo ngava likida nkareso zelinunupiko ngwendi yige.—Fil. 2:5-8.
13 Ono dimburura yikara yoGuhwe monkedi omu Jesus ga pukwilire nombili varongwa vendi nkareso zondona ndi? Ono lirongo kuhamena Karunga kupitira mononkango nomoyirugana yaJesus ndi? Karunga kapi a zumbu vantu vendi nampili vana lipuka. Kudiva yikara yaKarunga kututumangeda tu litezurure nokumuhundira egusiropo apa atu lipuka.
MUNWA KWA HERE KUHORORA GUHWE
14. Ngapi omu ga yi likidire Jesus asi age kwa here kuhorora oGuhwe?
14 Vapangeli wovanzi kukambadara kutura vantu mepangero lyawo pokudira kuvahorwera mausili nagenye. Mokulisiga, Jesus kwa here kuvatera wopeke va lironge kuhamena Guhwe nokuvahorwera mausili nagenye yipo va dive Jehova. (Resa Mateusa 11:27.) Ntani hena, Jesus kwa pere varongwa vendi “nondunge dokudiva Karunga goMunasili,” Jehova. (1 Joh. 5:20) Yisinke ayi tanta eyi? Jesus kwa vaterere vasikuli vendi va kwate egano eyi ga va rongere kuhamena oGuhwe. Age kapi ga horekere oGuhwe pokuronga erongo eli va dilire kukwata egano vantu, ngwendi erongo lyaKarunga Mutatu gumwe.
15. Morwasinke Jesus ga dililire kutantera varongwa vendi nayinye eyi ga divire kuhamena oGuhwe?
15 Jesus ga horwere nayinye eyi ga divire kuhamena Guhwe ndi? Hawe, mounongo wendi kapi ga va tanterere nayinye eyi ga divire. (Resa Johanesa 16:12.) Morwasinke? Morwa posiruwo sina varongwa vendi kapi va ‘vhulire’ kuyikwata egano. Nye Jesus kwa fatwilire asi ngava gwana ediwo lyenene apa nga wiza ‘mukwafi,’ mpepo zokupongoka, ezi ngazi ya va ronga ‘usili mudima.’ (Joh. 16:7, 13) Ngwendi moomu vakurona wonondunge ava dili kutantera vana vawo yininke nayinye dogoro vana kuru mokuyikwata egano, Jesus nage kwa ndindilire dogoro varongwa vendi vana wapere mokukwata egano yininke nayinye yokuhamena oGuhwe. Jesus kwa kere nonkenda ntani ga diworokere evhuliko lyovarongwa vendi.
HONENA JESUS MOKUVATERA WOPEKE VA DIVE JEHOVA
16, 17. Morwasinke twa wapera kuronga vapeke kuhamena Guhya?
16 Apa o ya diva muntu nawa-nawa nokudimburura asi ga kara neharo, kapi no tantera ko wopeke kumuhamena ndi? Apa ga kere Jesus pevhu nga uyunga kuhamena oGuhwe. (John 17:25, 26) Ayo ya wapa kwetu tu honene Jesus mokuhorora Jehova kwava wopeke.
17 Ngomu tuna yi zogere, Jesus kwa kara nediwo lyenzi kuhamena oGuhwe kupitakana nkenye ogu. Nye age kwa here kuuyunga eyi ga divire ntani ga pere ukonentu varongwa vendi yipo va kwate egano yininke yokonhiinhi kuhamena yikara yoGuhwe. Jesus kwa tu vatera tu dive Guhyetu monkedi ezi va dira kudiva sinzi sovantu. Ee, ruhafo musi tuna kara naro asi Jesus kupitira merongo nomonkareso zendi kwa tu horwera Guhwe! Ose kulizuvha mfumwa zokudiva Jehova. (Jer. 9:24; 1 Kol. 1:31) Ose kwa kondja tu hedere Jehova pepi, ano age ngesi ga tu hedera pepi. (Jak. 4:8) Yipo nye, ose ngesi twa wapera kuronga vapeke kuhamena Jehova. Ngapi omu natu vhura kuyirugana?
18, 19. Mononkedi musinke no vhura kuhorora Guhwe kwava wopeke? Faturura.
18 Kupitira mononkango nomoyirugana yetu twa hepa kuhonena Jesus pokuhorora Guhwe. Diworoka asi vantu wovanzi ava atu ligwana nawo mosirugana sokuzuvhisa kapi va diva asi yilye Karunga. Awo kwa kara nomagano gepuko kuhamena Karunga morwa kwa va ronga marongo goyimpempa. Kuvhura tu lironge nawo eyi twa diva kuhamena edina lyaKarunga nositambo sendi kovantu ntani noyikara yendi ngomu va yi horora moBibeli. Ntani hena kuvhura tu zogere novapuli vakwetu yihorokwa yimwe yomoBibeli eyi ya horora yikara yaKarunga monkedi ezi twa dilire kudiva nare. Monkedi zangoso, nawo kuvhura va gwanene mo uwa.
19 Twa hepa kuhonena Jesus nokuhorora Guhwe kupitira monkareso zetu. Nsene vantu va dimburura eharo lyaKristusa monkareso zetu, nawo ngava hara kukara nelikwatakano nendi ntani noGuhwe. (Efe. 5:1, 2) Mupositoli Paurusa kwa tu tantera asi: “Omu honene nge ame, moomu ani honene name Kristusa.” (1 Kol. 11:1) Ose kulizuvha mfumwa asi kupitira monkareso zetu kuvhura tu vatere vantu va dive omu ga kara Jehova. Ngano natuvenye tu honene Jesus pokuhorora Guhwe kwava wopeke!