Omu mbudi zaJesus za kukundama

“Ame kwa wiza asi va kare nomwenyo gokusikilira mo.” —JOHANESA 10:10.

JESUS KRISTUSA kwa wizire pevhu nositambo sokugava kapisi sokutambura. Kupitira moyirugana yendi yokuzuvhisa, age kwa pere vantu uhwi wouwa, awo mbudi ezi za hororora usili kuhamena Karunga ntani nositambo sendi. Ava ava tambura mbudi ozo kuvhura kuhafera ngesi eparu, ngamoomu vana kulihafera mamiliyona goVakriste wousili.a Ruha romulyo rombudi ezi ga zuvhisire Jesus kuna kara eparu lyokusikilira mo eli ga geve mwarwetu. Mwenyo gwetu gwanarunye kwa korera omu atu tara ruha oru romulyo rombudi zendi.

Eyi ga gava Karunga naKristusa Jesus ga yi divire asi nonkore dendi ngadi mu dipaga. (Mateusa 20:17-19) Nye, mononkango dendi edi da divikwa mwaJohanesa 3:16, age kwa tente asi: “Karunga kwa here uzuni unene-nene, yiyo ga u pere Munwendi gelike a huru, asi nkenye ogu a mu pura a dire kuzonauka, nye a kare nomwenyo gwanarunye.” Jesus kwa tente hena asi age kwa wizire a ‘ya gave mwenyo [ndi eparu] lyendi, li kare sizoweseso sovanzi.’ (Mateusa 20:28) Morwasinke ga uyungilire asi eparu lyendi kwa ligeve nye kapisi kwa ligusire?

Morwa eharo lyenene unene, Karunga kwa tulire po ewapaiko yipo vantu va manguruke konzo zokupinga nokokudira kusikilira mo ntani nokonomfa. Karunga kwa yi rugene eyi pokutuma Munwendi gelike a huru pevhu a ya tu fire. Meharo, Jesus ga limburukwire pokugava eparu lyendi lyokusikilira mo mwarwetu. Ewapaiko olyo kulitumbura asi sizoweseso, awo kuna kara uhwi womulyo po ou ga pa Karunga vantu.b Awo uhwi wokutwaredesera komwenyo gwanarunye.

Eyi wa hepa kurugana Sizoweseso kuna kara uhwi woge ndi? Oyo kwa korera mwanyamoge. Mokuyifanekesa: Tu ninke nye asi muntu gumwe ta ku pe uhwi ou vana dingire mosipakote. Uhwi owo kapi tau kara woge dogoro ou tambure ntani. Mokulifana, Jehova kwa kupa sizoweseso, nye uhwi ou kapi tau kara woge ntudi ou tambure ntani. Ngapi omu no u tambura?

Jesus kwa tente asi vaava ava “mu pura” yiwo ngava gwana mwenyo gwanarunye. Epuro kwa kwatera mo monkedi omu o paruka. (Jakopo 2:26) Kupura mwaJesus kutanta asi kuparuka kuliza neyi nga rongo ntani neyi nga rugana. Mokuyirugana oyo, wa hepa kudiva Jesus ntani noguhwe. Jesus kwa tente asi: “Mwenyo gwanarunye yigo ogu asi va ku dive asi nyovelike Karunga gosili, nogu wa tuma, Jesus Kristusa.”—Johanesa 17:3.

Konyara nomvhura 2 000 da ka pita, Jesus Kristusa kwa geve mbudi ezi za rundurura maparu gomamiliyona govantu mouzuni mudima. Ono hara kudiva ko yoyinzi kuhamena mbudi ozo ntani nomu no vhura kugwanena mo uwa ngesi ntani nokomeho kumwe nepata lyoge ndi? Nombangi daJehova ngadi yi hafera mokukuvatera.

[Nondanda dokonhi]