Morwasinke natu fumadekera vakurupe?
KONONTERE defuta lyaCalifonia moAmerika, mwa kara sitji esi sa fumana mouzuni. Aso kusitumbura asi Lone Cypress. Sitji esi kwa paruka nomvhura dokupitakana po-250. Morwa aso kwa kara po siruwo sosire, sitji esi kusipakera mbili mononkedi dokulisiga-siga. Pasihonena, aso kwa si pameka nomarugodi gorutjeno ntani kwa si kundurukida nomamanya.
Sitji oso Lone Cypress kutudiworokesa kuhamena Vakriste wovakurupe mokatji ketu, ava ava likida elididimikiro. Nkedi zimwe zokulikarera omu ava yi rugana kuna kara mokuzuvhisa mbudi zongwa. Muporofete Jowera kwa pumbire asi “vakurupe” nawo ngava divisa mbudi zomoBibeli. (Jow. 2:28-32; Yirug. 2:16-21) Gazadara ko tupu konovili dononzi edi ava ruganesa vakurupe mokuvatera vapeke va lironge kuhamena ‘mbudi zongwa zoUhompa!’ (Mat. 24:14) Vakurupe vamwe wokuzuvhisa mbudi zoUhompa kwa lididimikira nomvhura dononzi mahepeko ntani nomaudigu hena gamwe. Nsene asi sitji oso kwa kara po nomvhura dononzi ano aso kwa si pameka nomarugodi gorutjeno ntani kwa si kundurukida nomamanya, vakurupe mokatji ketu nawo va fira mokuvanongonona ntani nokuvatekura nomfumwa ntani nekuto!
Jehova Karunga kwa pangerere vantu vendi vanare asi: “Omu fe ekuto vantu wokukurupa oku tomu va fumadeke.” (Lev. 19:32) Naina, movantu vaJehova kwa kara mo yihonena yoyiwa yovalimburukwi ava va ‘kara momalikwatakano naKarunga’ nomvhura dononzi. (Mika 6:8) Ngomu ava twikire kutura pasirugana nompango doPatjangwa, nomvhi dawo yosili kukara “nkata zefumano.”—Yis. 16:31.
Mupositoli Paurusa kwa pangerere mudinkantu Timoteusa asi: “Mugara gokukurupa nokumutugumukira si unene.” Nye Timoteusa ga hepere ‘kumukorangeda ngwendi oguhwe,’ ano ‘vakadi wokukurupa ava ruganene ngwendi ozina.’ (1 Tim. 5:1, 2) Timoteusa ga hepere ‘kufa ekuto’ vakurupe. Yipo nye, Jehova kuna tu harere tu kare nombuuyungiso ezi azi likida efumadeko.
Varoma 12:10 kutanta asi: “Omu gave sihonena sokulifumadeka-fumadeka.” Vatareli mombungakriste kulikida efumadeko kovakurupe woVakriste. Nye natuvenye twa hepa kulifumadeka-fumadeka.
Nye, vemepata va kara nositumbukira sokulikarera kombinga zovakurona vawo ntani novazinyakurwawo. Ngwendi sitji sina, vantu kwa papara nonkedi dokulisiga-siga mokusitakamesa ntani awo simpe kuna kutwikira kuyirugana. Twa hepa kupapara nonkedi omu natu vhura kupa mfumwa vakurona vetu wokukurupa ntani nomama vetu. Pasihonena, nsene tu purakena nawa ngayi vhura kutuvatera mokudira kusininika kurugana yininke monkedi omu tuna yi harere twa hana kulikida efumadeko komalizuvho gawo.—Yis. 23:22; 1 Tim. 5:4.
Vakurupe mokatji ketu kwa kara nomulyo kwaJehova. Age kapi ava sigilire. (Epis. 71:18) Karunga gosili kuvapameka yipo va twikire kumukarera noulimburukwi. Ngano nose tu twikire kukwatesa ko vakurupe nokuvafumadeka.
[Mafano gepepenuno 13]
Ngamoomu tupu sitji esi sa hepa kusipameka, vakurupe nawo va fira kuvatekura nomfumwa ntani nekuto
[Edina lyomufaneki]
American Spirit Images/age fotostock