‘Siruwo sokuhara nosiruwo sokunyenga’

“KARUNGA yige eharo.” Moyirongo yimwe vantu kutjanga nonkango edi poyiperende nokuyitura momambo gawo. Ado nonkango donongwa edi adi faturura sikara saKarunga seharo.

Nampili ngoso, vantu wovanzi kapi va diva asi nonkango odo kwa tunda moBibeli. Mupositoli Johanesa yige ga tjenge asi: “Ogu ga dira kuhara mukwawo, ogo kapi ga diva Karunga, yeeyi Karunga yige eharo.” (1 Johanesa 4:8) Johanesa hena kwa tjenge kuhamena eharo lyaKarunga kouzuni asi: “Karunga kwa here uzuni unene-nene, yiyo ga u pere Munwendi gelike a huru, asi nkenye ogu a mu pura a dire kuzonauka, nye a kare nomwenyo gwanarunye.”—Johanesa 3:16.

Kuliza nononkango odo, vamwe kugazara asi Karunga nkenda, kusigilira vantu va rugane nkenye eyi vana hara. Awo kugazara asi kuvhura va rugane tupu nkenye eyi, Karunga kapi nga ka va pangura. Nye owo usili ndi? Karunga ga hara navenye, vawa novadinikarunga ndi? Karunga ga kara nosiruwo sokunyenga ndi?

Eharo lyaKarunga nonyengo zendi

Hompa Saromo gonondunge kwa tente asi: ‘Nayinye eyi ayi horoka mouzuni ou, kuhoroka posiruwo esi ga horowora Karunga . . . siruwo sokuhara nosiruwo sokunyenga.’ (Muudisi 3:1, 8) Kuliza nononkango odo, nampili ngomu Karunga ga kara neharo nonkenda, ga kara nosiruwo sokunyenga.

Nkango “kunyenga” va ruganesa moBibeli, yisinke azi tanta? Buke zimwe kwa tanta asi: “MoMatjangwa nkango “kunyenga” kwa kara nonontanto dononzi. Kuvhura kutamba hena konyengo zokukara nonkoko. Nyengo zangoso kuvhura zi ku ninkise o kare nomalizuvho gokuhara kuzuvhisa muntu kukora.” Ozo ntanto yizo twa diva ntani ose kumona eyi azi reta nyengo mouzuni. Buke ozo kwa tanta hena asi: “‘Nyengo’ kuvhura kutanta asi kukara nonyengo zonene nye kapisi nositambo sokuzuvhisa muntu kukora.”

Ntanto zauvali yizo natu ka zogera mosirongwa esi. Azo nyengo zokunyenga yirugana yoyidona nye kapisi zokukara nonkoko nokuhara kuzuvhisa muntu kukora. Karunga ga kara nonyengo zangoso ndi? Koneka eyi va tumbura moYisewe 6:16-19 asi: “Poyili yininke yitano-nayivali eyi ga nyenga HOMPA, kapi a didimike: Elinenepeko, eraka lyoyimpempa, mawoko gokudipaga vantu vahana nzo, mutjima gokugazara yigazo youdinikarunga, nompadi da genderera kurugana udona, mbangi zoyimpempa zokuhanesa yimpempa, nomuntu ogu a katura udona mokatji kovakwawo.”

Ngomu vana yi tumbura, pwa kara yininke eyi ga nyenga Karunga. Nye kapi tupu a nyenge muntu ogu a rugana yininke yangoso. Age kutara koukaro womuntu ngwendi kudira kusikilira mo ntani nonkareso zomonkarapamwe omu ga kara. (Genesis 8:21; Varoma 5:12) Mutjangi goYisewe kwa yi fatwilire nawa asi: “HOMPA kupukurura ava ga hara, moomu a pukurura guhya munwendi ogu a linenepeke.” (Yisewe 3:12) Mukurona kuvhura a nyenge nkareso zondona zamunwendi nye simpe ga hara munwendi ntani age ta rugana ko yuma mokuvatera munwendi pokumupisura. Morwa eharo, Jehova nage kurugana yokulifana mokuvatera munanzo.

Siruwo sokunyenga

Ngapi nsene muntu ga diva mpango zaKarunga nye kunyoka kuzikwama? Karunga kapi ta hara muntu gwangoso. Nsene a rugana mowina yininke eyi ga nyenga Jehova, age ta mu nyenge. Pasihonena, Bibeli kuuyunga asi: “HOMPA kukonakona vahungami novanzoni; nye mwenyo gwendi kwa nyenga ava va hana Veta.” (Episarome 11:5) Vantu wokudira kulitezurura kwato kuvadongwenena po, ngomu mupositoli Paurusa ga yi zeresa mombilive zendi koVahebeli asi: “Nsene tu zonena wina, nye ose twa tambura ediwo lyosili, kutupu hena nzambo zokudongonona po nonzo detu, yokundindira ko Epanguro lyokutjilisa nomundiro gokungongoma ogu ngagu veveka navenye ava ava lilimbi naKarunga.” (Vahebeli 10:26, 27) Morwasinke Karunga geharo na ruganena yininke yangoso?

Nsene muntu a zonena mowina, age kuyadonapa unene makura ta yi mu digopere kurunduruka. Bibeli kwa fanekesa muntu gwangoso kwangwe ogu a dilli kuvhura kuligusa mavara gendi. (Jeremiya 13:23) Muntu ogu a dili kulitezurura age kugwana eyi azi tumbura Bibeli asi ‘usima wompanguro zanarunye,’ kwato edongweneno po.—Marukusa 3:29.

Oyo yiyo ya horokerere Adamu naEva naJudasa Isikalyoto. Mokumona asi Adamu naEva kwa kere wokusikilira mo ntani va divire nokukwata nawa egano mpangera zaKarunga, ayo ya zera asi awo kwa zonenene mowina. Karunga kapi ga va hundilire asi va litezurure. (Genesis 3:16-24) Nampili ngomu Judasa ga kere gokudira kusikilira mo, age nga kara kumwe naMunwaKarunga nye konyima ga ya mu randesere. Jesus kwa tumbwire Judasa asi “munwezumbano.” (Johanesa 17:12) Bibeli nazo kulikida asi Muzonaguli nare ga gusa kuzonena mowina, ezonauko tupu lina kumundindira. (1 Johanesa 3:8; Ehororo 12:12) Vantu owo kwa linyengesa vene kwaKarunga.

Nye ayo kuhengagwida pokudiva hena asi vamwe ava ava zono pwa kara mpito zokuvadongwenena po. Jehova mulididimiki ntani kapi a hafere kutengeka ava ava dili kuzonena mowina. (Hesekiyeli 33:11) Age kuna kuvakorangeda va litezurure yipo va va dongwenene po. Tatu resa moBibeli asi: “Mudinikarunga a sige nonzira dendi, ano mudona a sige magazaro gendi. Va litezwilire kwaHOMPA Karunga gwetu; age mufenkenda kapi a likata-kata kudongwenena po.”—Jesaya 55:7.

Kukara nomutaro gomuwa kuhamena eharo nonyengo

Vakriste wousili kuhonena Karunga, yipo nye va hepa kudiva ‘siruwo sokuhara’ ntani ‘siruwo sokunyenga.’ Malizuvho kuvhura kuninkisa muntu a dire kukara nomutaro gomuwa kuhamena eharo nonkenda. Nye nonkango domurongwa Juda nadi tu vatera tu kare nomutaro gomuwa kuhamena kulikida nkenda nokunyenga nzo. Ado kwa tanta asi: “Omu fire nkenda ava vana kusinganyeka, omu va parure pokuvahompweda mo momundiro. Vamwe mo omu va fire nkenda oku tomu va tjira. Noyikoverero yawo yeeyi, eyi ga nyateka marutu gawo gomadowo, omu yi tjire.” (Juda 22, 23) Twa hepa kunyenga yirugana yoyidona nye kapisi muntu ogu a yi rugana.

Vakriste kuna kuvakorangeda mokuhara nonkore dawo pokuvaruganena yoyiwa. Jesus kwa tente asi: ‘Omu hare wonkore zeni, one tomu kandererere mo ava ava mu rundire oku tava mu hepeke.’ (Mateusa 5:44) Eyi yiyo Nombangi daJehova dina kutwikilira kuzuvhisa mbudi zongwa zoUhompa waKarunga kovantu, nampili vamwe kapi vana kuzitambura. (Mateusa 24:14) Kuliza neyi va lironga moBibeli, Nombangi kutara asi Jehova kulikida eharo nonkenda kwankenye ogu. Apa vantu ava dili kutambura mbudi zawo nokuvahepeka awo kukwama epukururo lyomupositoli Paurusa eli asi: “Omu swere ava ava mu hepeke; omu va swere, kapisi mu va fingilire . . . Walye omu likwatere-kwatere nonkoko.” (Varoma 12:14, 17) Awo kudiworoka asi Jehova yige nga tokora ogu nga hara nogu nga nyenga. Jehova yige nga tokora asi yilye ngava pangwira komwenyo ndi konomfa.—Vahebeli 10:30.

Yimo, “Karunga yige eharo.” Yipo nye, twa hepa kulikida rupandu keharo eli ga tu likida ntani nokulitura mo mokudiva mpango zendi nokuzisikisa mo. Nombangi daJehova momukunda gweni ngadi yi hafera mokukuvatera o lironge moBibeli mpango zaKarunga ntani omu no zi sikisa mo meparu lyoge. Nsene ngo yi rugana oyo, Karunga nga ku likida eharo.

[Nonkango depepenuno 13]

“Poyili yininke yitano-nayivali eyi ga nyenga HOMPA, kapi a didimike: Elinenepeko, eraka lyoyimpempa, mawoko gokudipaga vantu vahana nzo, mutjima gokugazara yigazo youdinikarunga, nompadi da genderera kurugana udona, mbangi zoyimpempa zokuhanesa yimpempa, nomuntu ogu a katura udona mokatji kovakwawo.”—YISEWE 6:16-19

[Nonkango depepenuno 14]

“Nsene tu zonena wina, nye ose twa tambura ediwo lyosili, kutupu hena nzambo zokudongonona po nonzo detu, yokundindira ko Epanguro lyokutjilisa.”—VAHEBELI 10:26, 27

[Nonkango depepenuno 15]

“Mudinikarunga a sige nonzira dendi, ano mudona a sige magazaro gendi. Va litezwilire kwaHOMPA Karunga gwetu; age mufenkenda kapi a likata-kata kudongwenena po.” —JESAYA 55:7

[Efano lyepepenuno 14]

Mukurona ogu ga hara munwendi kumupisura yipo a mu vatere

[Efano lyepepenuno 15]

Vanadorongo wovanzi va gwanena mo uwa meharo nomonkenda zaKarunga