Ngo Paruka Uhura Ndi?

Bibeli kututantera asi pouhura: “Ngapa kara udigu wounene, ou wa dilire kukara po kutunda ketameko lyouzuni dogoro nokwanaina . . . Ngano mazuva ogo kapi ngava ga supipika, ngano nomuntu si gumwe nga yoworoka.” (Mateusa 24:21, 22) Vantu wovanzi ngava ka paruka morwa Karunga ga tumbwidira asi: “Uzuni ngau zonauka po . . . , nye ogu a sikisa mo mpango zaKarunga, nga kara dogoro narunye.”—1 Johanesa 2:17.

Nsene ono hara ngo paruke “dogoro narunye,” yisinke no rugana? Wa hepa nye kulipongaikira emona ndi? Hawe. Bibeli kutukorangeda tu demenene koyininke yapeke. Azo kutanta asi: “Ano morwa ngayi hanauka yininke nayinye eyi, one ngapi nye omu nomu fira kukara moyikara yeni? Omu pongoke oku tomu tjira Karunga, one ava mwa ndindira oku tomu gendereresa ewizo lyEzuva lyaKarunga.” (2 Peturusa 3:10-12) “Yininke nayinye” eyi ngava zonagura po kuna kwatere mo mapangero gouzuni ou ntani nava ava ga kwatesa ko. Nsene tu lipongaikira emona ndi yininke, ayo kapi ngayi tu popera.

Nsene tuna hara kuparuka, twa hepa kuligava kwaJehova Karunga nokulironga yikara eyi ayi mu hafesa. (Sefaniya 2:3) Mevango lyokukwama vantu ava ava rugana yoyidona ntani nokuncenuna yidiviso yopomazuva gopouhura, ose twa hepa kugazadara nkenye apa ‘ezuva lyaKarunga.’ Nombangi daJehova kuvhura di ku likide moBibeli eyi no rugana yipo ngo ka paruke.