Mapuro gane aga va limburura kuhamena uhura

JESUS KRISTUSA kwa pumbire asi ‘uhura ngau wiza.’ Pokusingonona siruwo oso, age kwa tente asi: “Ngapa kara udigu wounene, ou wa dilire kukara po kutunda ketameko lyouzuni dogoro nokwanaina, wangoso hena kapi ngau kara po rumwe.”—Mateusa 24:14, 21.

Nonkango daJesus kuhamena uhura kumwe nomatjangwa gamwe gomoBibeli kosirongwa esi kuretesa po mapuro gomanzi gomulyo. Penuna Bibeli zoge o rese eyi za limburura ko komapuro ogo.

1 Yisinke ngayi haga po?

Bibeli kapi azi rongo asi evhu lyene-lyene ngava li zonagura po. Muepisarome kwa tjenge asi: “Ove kwa paka po uzuni, yiyo wa kora, awo kapi ngava u rundurura.” (Episarome 104:5) Ntani Bibeli kapi hena azi rongo asi yinamwenyo nayinye ngayi pya komundiro gomunene. (Jesaya 45:18) Jesus ga yi likidire asi vantu vamwe ngava paruka uhura. (Mateusa 24:21, 22) Yisinke azi uyunga Bibeli asi yiyo ngayi haga po?

Mapangero govantu ngaga haga po. Karunga kwa gendesere muporofete Ndaniyera a tjange asi: “Karunga gemeguru nga ka tura po uhompa umwe ou ngava dira kuzonagura konomvhura nadinye. Mpili epangero lyawo kapi ngava li gava kovantu nawopeke; nye awo ngau ka ndembagura po . . . mauhompa aga nagenye, awo ngau ka sikama narunye.”—Ndaniyera 2:44, BR.

Yita nenyateko evhu ngayi haga po. Pokusingonona eyi nga ka rugana Karunga, Episarome 46:9 kwa tanta asi: “Age kwa hageka yita mouzuni mudima; ga tezagura mauta, yiyo ga haraganesa magonga, yilikandwiso yiyo ga yi hwika momundiro!” Bibeli kuturonga hena asi Karunga nga ka ‘zonagura ava wokuzonagura evhu!’—Ehororo 11:18.

Ukorokotji nouhahungami ngau haga po. Nonkango daKarunga kwa tumbwidira asi: “Vantu wovahungami - vantuzuni - yiwo ngava kara omu mosirongo setu. Nye Karunga nga nyafura mo vadinikarunga mosirongo, ano vananzo nga va dura mo moomu ava dura yimeno mevhu.”—Yisewe 2:21, 22.

2 Siruwoke ngau wiza uhura?

Jehova Karunga ga tura po “siruwo” mokukahagekesa po udinikarunga ntani mokukaninka Uhompa wendi u ka pangere evhu nalinye. (Marukusa 13:33) Bibeli za yi likida nawa-nawa asi kapi tatu vhuru kudiva ezuva apa ngau wiza uhura. Jesus kwa tente asi: “Nagumwe si ga diva asi ezuva nosiruwo apa ngasi sika mo, novaengeli si vemeguru noMuna si, ntudi Guhya ntani.” (Marukusa 13:32) Nye Jesus novarongwa vendi va pumbire yihorokwa eyi ngayi kara pevhu komeho Karunga nga ka rete uhura. Ngomu yihorokwa nayinye kuna kuhoroka posiruwo simwe mouzuni naunye, ngoso kuna kulikida asi uhura pepi una kara.

Pana kara marunduruko gomanene moupolitika nomonkarapamwe zovantu kupita pwanare. Mokulimburura mapuro govarongwa vendi kuhamena uhura, Jesus kwa tente asi: “Nomuhoko ngadi likataukira-kataukira, ano ga kare mauntungi nago ngosikwawo. Evhu ngali kankama komavega peke-peke, ako hena ngaku kara nonsinge. Nye nayinye eyi etameko tupu lyomaudigu.” (Marukusa 13:8) Mupositoli Paurusa kwa tjenge asi: “Pomazuva gopouhura ngapa kara yiruwo yoyidigu. Yeeyi vantu ngava lihara tupu vene, ngava dowokera yimaliva, ngava lifumadeka, ngava linenepeka, ngava kara woyitjani, kapi ngava zuvha yovakurona vawo, kapi ngava paka mpandu, kapi ngava pongoka. Awo kapi ngava paka nkenda, ngava kara woyimbokauka novarundili, vankenye omu nava woyikotjongana, awo kwa nyenga yoyiwa. Awo ngava kara nombudi novalingi-lingi novalitumbi, ngava hara mahafo goparutu kupitakanesa omu va hara Karunga.”—2 Timoteusa 3:1-5.

Ezuvhiso lyomouzuni mudima kuna kulirugana ngesi. Jesus kwa tente asi: “Mbudi zoNgwa ezi zoUntungi waKarunga tanko ngava zi divisa mwa za uzuni mudima, zi kare umbangi wonomuhoko nadinye, ntani nye ngaku kwama uhura.”—Mateusa 24:14.

3 Yisinke ngayi kwama ko konyima zouhura?

Bibeli kapi azi rongo asi vantu navenye wovawa ngava va gusa po pevhu va va tware meguru yipo va ka paruke narunye. Nye, Jesus kwa rongere asi sitambo saKarunga sopomuhowo kovantu ngasi ka sikilira mo. Jesus kwa tente asi: “Vanerago vava va kuruka, yeeyi sirongo yiwo ngava si weka.” (Mateusa 5:5; 6:9, 10) Ava vana kufa ngesi komeho u wize uhura, Bibeli kwa tumbwidira asi komeho ngava ka va vhumbura. (Joba 14:14, 15; Johanesa 5:28, 29) Yisinke ngayi kwama ko konyima zouhura?

Jesus nga pangera ngaHompa moUhompa waKarunga kutundilira meguru. Muporofete Ndaniyera kwa tjenge asi: “Memoneko eli masiku, tani mono yuma yokufana ngwendi muntu [Jesus]. Age kwa hederere nge, ago maremo kuna mu kundurukida, ta zi kogu ga kerera po narunye [Jehova Karunga], ta ka kara komeho zendi. Makura tava mu pe [Jesus] epangero nefumano nononkondo dosiuhompa, asi vantu wonomuhoko nadinye nomarudi nomaraka nagenye va mu ruganene. Epangero lyendi ngali karerera, ano untungi wendi kapi ngau haga po.”—Ndaniyera 7:13, 14; Rukasa 1:31, 32; Johanesa 3:13-16.

Ava ngau ka pangera Uhompa waKarunga ngava ka hafera ukanguki wouwa nompora ntani nomwenyo gwanarunye. Muporofete Jesaya kwa tjenge asi: “Vantu ngava litungira mambo omu ngava kara – nagumwe si ogu nga va ruganesa. Awo ngava tapeka moyipata, tava lipanda vhinyu – azo kapi ngava zi nwa vapeke.” (Jesaya 65:21-23) Mupositoli Johanesa kwa tjenge kuhamena siruwo oso asi: “Tara, nzugo zaKarunga pozili povantu. Age ta ya tungu pwawo, awo ngava kare muhoko gwendi. Karunga mwene nga kara pwawo, a kare Karunga gwawo. Ano Karunga nga kokota mahodi nagenye komeho gawo. Nomfa kapi hena ngadi kara ko, neguwo si nomalirankali nokukora kapi ngayi kara ko hena, yeeyi yininke yomuhowo yina dimi po.”—Ehororo 21:3, 4.

4 Yisinke wa hepa kurugana yipo ngo ka paruke uhura?

Mupositoli Peturusa ga tente asi vamwe ava ngava paruka posiruwo souhura ngava sensa egano eli asi Karunga nga rugana ko yuma kweyi yina kuhoroka pevhu nokuyagusa po udinikarunga apa pevhu. (2 Peturusa 3:3, 4) Nampili ngoso, Peturusa kwa korangeda ava vana kuparuka ngesi mokurugana eyi yina kukwama ko.

Va hepa kulirongera ko koyihorokwa yanare. Peturusa kwa tjenge asi: “Karunga kapi ga ruvire uzuni wanare, nye kwa retererere ruhanzo uzuni wovadinikarunga. Nowa gelike ga parwire, ogu nga udisa uhungami, navamwe vatano-navavali.” (2 Peturusa 2:5) Kombinga zava ava tu zoro, Peturusa kwa tente asi: “Awo kudivarera wina eyi asi, nare-nare Karunga kwa uyungire, makura eguru nevhu tayi kara po. Evhu kwa li sitire li tunde komema, mema hena ga li kundurukide. Yigo tupu hena googo mema, ruhanzo romema, ga zonagwire uzuni wanare. Nye Karunga ga tanta hena asi eguru eli lyantaantani nevhua eli lyantaantani nayo kwa yi ndindilisa Ezuva lyompanguro. Makura ngayi pye komundiro, ano vadinikarunga navenye ngava va pangura va va hanagure po.”—2 Peturusa 3:5-7.

Va hepa kuparuka kuliza nonompango daKarunga dokukuhuka. Peturusa kwa tjenge asi owo vana hara kukaparuka uhura va hepa kurugana ‘yirugana yokupongoka oku tava tjira Karunga.’ (2 Peturusa 3:11, hetakanesa NW.) Koneka, Peturusa kwa nkondopeka asi ‘yirugana yokupongoka’ ntani ‘netjiro Karunga.’ Yinzi ya hamena mo kupitakana tupu yokutanta asi wa kara nepuro ndi yokuyiruganena tupu morwa ono hara o ka paruke.

Yirugana musinke a tambura Karunga? Kuvhura o hetakanese eyi wa diva ntani neyi azi rongo Bibeli kuhamena sirongwa esi. Nombangi daJehova ngadi ka yi hafera mokukuvatera. Va pura va ku likide malimbururo moBibeli zoge. Pokurugana ngoso ove ngano ngayi kuvatera mokukara nehuguvaro lyokupama kuhamena meho, nampili pa kare matjiliso kweyi yina kuhoroka mouzuni.

[Nondanda dokonhi]

[Nonkango depepenuno 7]

Evhu kapi ngali haga po, nye woowo ava li zonagura yiwo ngava haga po