Eyi azi uyunga Bibeli kuhamena eparu nonomfa

Mobuke zaGenesis kwa tumbura eyi ga tanterere Karunga muntu gokuhova Adamu asi: “Yiyimwa yokoyitji nayinye yomosikunino kulya tupu, ntudi yokositji esi asi gava ediwo lyeyi yoyiwa neyi yoyidona no. Siyimwa saso nokanunu si asi o si lye. Nsene ngo yi hetekera, ngo fa lyoolyo ezuva.” (Genesis 2:16, 17) Nonkango edi kulikida nawa-nawa asi ngano Adamu ga limburukwire mpangera ezi ga mu pere Karunga, ngano kapi ga fire age ngano ga twikilire kukara mosipata saEdeni.

Adamu kwa sensere mpangera ezi ga mu pere Karunga pokulya kenyango eli ga mu silikire, apa ga li mu pere mukadendi Eva. (Genesis 3:1-6) Yitundwamo yonzo zina simpe kwa tu kundama naina. Mupositoli Paurusa kwa yi faturura asi: “Nzo, muntu gumwe tupu ga zi reta mouzuni. Ano nzo zendi kwa reta mo nomfa. Nomfa yiyo da lihanena movantu mudima, morwa vantu navenye kwa zona.” (Varoma 5:12) “Muntu gumwe” ogo, kuna kara Adamu. Nye nzo musinke ga tulire, ntani morwasinke za mu twaredeserere konomfa?

Adamu kwa tezere po veta zaKarunga mowina, ozo kwa kere nzo. (1 Johanesa 3:4) Ano mfeto zononzo nomfa ngamoomu Karunga ga yi tanterere Adamu. Ngano Adamu noruvharo rwendi va limburukwire, awo ngano kapi va kere nonzo ndi va fe. Karunga kapi ga sitire vantu asi va fe nye ngano va paruke narunye.

Moomu za tanta Bibeli, ose kufa morwa ‘nomfa kwa lihanena movantu mudima.’ Nye twa kara nosininke simwe esi asi paruka konyima zonomfa ndi? Sinzi sovantu kutanta asi kosili, awo kutanta asi mwenyo ogu agu dili kufa. Nsene yimo twa pura ngoso, ose kuna kupatanesa eyi Karunga ga tanterere Adamu. Morwa nsene asi ose kuparuka konyima zonomfa, nomfa ngano kapi tadi kara mfeto zononzo, moomu ga yi tente Karunga. Bibeli kutanta asi: ‘Karunga kapi a kumbagere.’ (Vahebeli 6:18) Nye ogu ga kumbagerere kuna kara Satana, ogu ga tanterere Eva asi: ‘Kapi ngomu fa.’ —Genesis 3:4.

Eyi kuretesa po epuro eli asi: Nsene erongo eli asi mwenyo kapi agu fu kuna kara lyoyimpempa, yisinke ayi tu horokere apa atu fu?

BIBELI KUTANTA USILI

Bibeli kutanta asi: “Hompa Karunga ta gusa evhu limwe a li unge muntu, ta mu heserere munku gomwenyo momazuru, makura muntu ta kara munamwenyo.” Nkango ezi va toroka asi “munamwenyo” kwa tunda konkango zoRuhebeli nefesi ezi azi tanta asi “sisitwa sokuhesera.”—Genesis 2:7.

Bibeli kwa yi zeresa nawa-nawa asi muntu kapi ga kara nomwenyo ogu agu dili kufa, nye muntu mwene yige ‘munamwenyo.’ MoBibeli mwato etjangwa eli lya uyunga asi muntu kwa kara nomwenyo ogu agu dili kufa.

Nsene Bibeli kapi za uyunga asi vantu kwa kara nomwenyo ogu agu dili kufa, morwasinke sinzi somaukarelikarunga aga rongere erongo olyo? Mokugwana elimbururo tu konakoneni eyi ya horokere nare moEgipite.

ERONGO LYOVAPAGANI TALI LIHANA

Munahistoli goMugereka gedina Herodotus ogu ga parukire momvhura 500 komeho zokuwiza Jesus pevhu kwa tente asi: “Vaegipite yiwo vantu wokuhova ava va kwatesere ko erongo eli asi muntu kwa kara nomwenyo ogu agu dili kufa.” Vababironi vanare nawo ngava kwatesa ko erongo olyo. Posiruwo esi ga fundire Arekisandera goMunene yirongo yokoIsraeli momvhura 332 komeho a wize Jesus pevhu, valirongi woVagereka awo vana hanesa nare erongo eli asi muntu kwa kara nomwenyo ogu agu dili kufa moyirongo eyi ya kere mepangero lyaGereka.

Momvhura 100, nombunga mbali doVajuda, valirongi womatjangwa ntani Vafalisayi, ngava rongo asi mwenyo kuparuka konyima zonomfa. Buke Jewish Encyclopedia kwa tanta asi: “Epuliro eli asi muntu kwa kara nomwenyo ogu agu dili kufa, Vajuda kwa ligwene koValirongi woVagereka, unene po kwaPlato.” Munahistoli goMujuda gedina Josephus ogu ga parukire koyiha yomvhura 100, kwa yi kwatesere ko asi erongo olyo kapi lya tunda momatjangwa nye alyo “epuliro lyoVagereka” eli ga tere asi masimwititi gawo.

Ngomu magano goVagereka ga lihene, ava ngava litumbura asi Vakriste nawo va ya tambwire erongo eli lyovapagani asi muntu kwa kara nomwenyo ogu agu dili kufa. Munahistoli gedina Jona Lendering kwa tanta asi: “Egano lyaPlato asi mwenyo kwa kere kevango lyewa nye ngesi mouzuni woudona lya ninkisire Vakriste va tambure magano gendi.” Erongo eli lyovapagani asi muntu kwa kara nomwenyo ogu agu dili kufa, kwa ya li tambura Vakriste nokulitura likare limwe lyerongo lyongereka.

“USILI NGAU MU ZOWORA”

Mupositoli Paurusa kwa rondwere asi: “Mpepo kutanta nawa-nawa asi, momazuva gopouhura vamwe ngava zumba epuro, makura tava pura yonompepo doyimpempa, va kwame marongo gonompepo dononondona.” (1 Timoteusa 4:1) Nonkango odo kwa sika mo. Erongo eli asi muntu kwa kara nomwenyo ogu agu dili kufa kwa tunda ‘konompepo donondona.’ Morwa kapi lya tunda moBibeli nye kwa tundilira komaukarelikarunga govapagani novalirongi.

Jesus kwa tente asi: “Ngomu kwata egano usili, awo ngau mu zowora.” (Johanesa 8:32) Pokugwana ediwo lyousili moBibeli, ose kwa manguruka komarongo aga aga swaukisa Karunga ntani koyirugana yomaukarelikarunga goyimpempa. Usili womoNonkango daKarunga kwa tu mangurura hena konompo ntani kokutjira vafe.—Tara kakende “Kupi va kara vafe?”

Musiti gwetu kapi ga tu sitire tu fe nonomvhura 70 ndi 80 makura tu ka paruke narunye kevango lyapeke. Sitambo sendi kwa kere asi vantu va paruke narunye pevhu ngovana vendi wovalimburukwi. Sitambo esi kwa likida asi Karunga kwa hara vantu ntani kwato ogu nga mu kondera mokusisikisa mo. (Marakiya 3:6) Bibeli kutanta asi: “Muhungami nga gusa sirongo nga tunge mo narunye-narunye.”—Episarome 37:29.