Jehova kuna kutudewira sirugana esi
1. Apa Jehova a gava kovantu sirugana, yisinke hena a rugana?
1 Apa Jehova a gava kovantu sirugana, age hena kuvavatera yipo va si sikise mo. Pasihonena, apa Jehova ga tanterere Nowa a tunge emuwato, sirugana esi ga dira kurugana rumwe Nowa, ga mu tanterere hena omu na yi rugana. (Gen. 6:14-16) Apa mulinunupiki Mosesa ngomusita va mu pere situmbukira sokukauyungisa masimbi goVaisraeli naFarawo, Jehova kwa mu huguvaresere asi: “Ame nani ka kukwafa mokuuyunga, neyi no ka uyunga.” (Ex. 4:12) Ya lifana nositumbukira setu sokuzuvhisa mbudi zongwa, Jehova kapi ga tu sigilira. Age kuna kutudewira kosirugana esi kupitira moSikora zoUkareli nemEpongo lyoYirugana. Ngapi omu natu gwanena mo uwa medeuro eli?
2. Ngapi omu natu gwanena mo uwa moSikora zoUkareli?
2 Sikora zoUkareli: Konakona elikwamo komeho zokuza nkenye epongo. Makura ngomu ono kumona omu varongwa vana kuruganesa magano aga moyiuyungwa yawo, nove ngo kulika ediwo lyoge lyokuronga. (Yis. 27:17) Pitura buke zoge zoSikora zoUkareli kepongo nokuziruganesa. Apa mutareli gosikora na tumbura magano gamo konyima zosiuyungwa sankenye murongwa, didilika magano aga ono hara kuruganesa nokugatjanga konontere dobuke zoge. Nkedi zongwa po mokugwanena mo uwa mosikora ezi, kuna kara pokulihameka mo. Wa litjangesa moSikora zoUkareli ndi? Apa nava ku pa siuyungwa, si liwapaikira nawa ntani ruganesa mapukururo aga vana ku pe. Nsene moyirugana yokuzuvhisa ono kara, ruganesa eyi wa lironga.
3. Yisinke ngayi tu vatera tu gwanene mo uwa mEpongo lyoYirugana?
3 Epongo lyoYirugana: Ngatu diworoka nawa magano aga ava gava momapongo aga pokuresa mosirongwa komeho zosiruwo nokuliwapaikira kukagava malimbururo. Nsene tu supipika malimbururo getu, wopeke nawo ngava gwana mpito zokulimburura. Purakena nawa komalikido, ntani ruganesa magano aga ono kugazara asi ngaga ninkisa yirugana yoge yokuzuvhisa yi ku tompoke. Pungura ko yirongwa yomulyo yomoYirugana yetu yoUhompa yipo ngo yi ruganese komeho.
4. Morwasinke natu ruganesera nawa edeuro lyokutunda kwaJehova?
4 Ngwendi sirugana esi va geve kwaNowa naMosesa, situmbukira setu sokuzuvhisa mbudi zongwa uzuni naunye udigu. (Mat. 24:14) Kuvhura yi tu tompoke nsene tu huguvara mwaJehova, Murongi goMunene, ntani nokuruganesa edeuro eli a gava.—Jes. 30:20.