Mavyukiso gokoVatareli woSikora

MWANKENYE mbungakriste mukuronambunga gumwe kumupa situmbukiro sokukara Mutareli goSikora. Nsene kwa ku pa esi situmbukira, elituromo lyoge mosikora nemezokomeho lyankenye murongwa kuvhura yi kare yininke yomulyo mweyi sikora nazi sikisa mo.

Ruha romulyo rosirugana soge kuna kara kugendesa Sikora zomombungakriste nkenye sivike. Kugusa ko varongwa ava vana kara noyiuyungwa, diworoka asi vapurakeni nawo moveli. Gendesa sikora monkedi omu mbungakriste nazinye nazi vhura kugwanena mo etumangedo nomadiworokeso goparugano aga ga hamena kwa simwe soyitambo yosikora eyi va tumbura pepenuno 5 dogoro 8.

Likida elituromo movarongwa navenye, yi kare asi kuna va pe ereso ndi elikido ndi siuyungwa. Va vatera va tare asi yiuyungwa yawo kapisi ngosirugana tupu, nye ngompito zokutura po ezokomeho moyirugana yawo kwaJehova. Elituromo eli ava likida kuna kara sininke somulyo mezokomeho lyawo. Nye hena ya kara nomulyo asi o likide elituromo mwawo, nokuvavatera va kwate egano mulyo gomaruha gombuuyungiso, ntani nokuvafatwilira omu nava tura pasirugana epukururo lyangoso. Mokuyisikisa mo oyo, purakena nawa kwankenye siuyungwa yipo o gave evyukiso lyewa.

Divilisa asi o tameke nokuhagesa sikora nosiruwo. Tura po sihonena sosiwa pokuninka makumbururo goge ga lize nosiruwo esi vana ku pe. Nsene murongwa ta pitakanesa siruwo, ove ndi muvateli goge ga hepa kugava sidiviso sokuhageka. Murongwa ga hepa kumana ntanto zendi ntani nokutunda kositantara. Nsene yiuyungwa yimwe melikwamo nayi pitakana siruwo esi sa kara po, supipika makumbururo goge, ntani zogera udigu novanavazinyetu owo konyima zepongo.

Nsene yiko ono kara kepongo, wa hepa kupitisira sikora. Ano nsene kapi yina ku vhulika kukara kepongo, mukuronambunga gumwe ogu za horowora mbunga zovakuronambunga ga hepa kupitisira. Nsene ono hepa evatero kokuwapaika malikwamo, ndi kokutjanga nokugavera yimbapira yava vana kara noyiuyungwa, ndi kuwapaika mokupinganesera po gumwe melikwamo, mukwafimbunga ogu va pa situmbukira sangoso vakuronambunga kuvhura a ku vatere moyininke eyi.

Kulitjangesa varongwa. Korangeda vazuvhisi navenye va litjangese mosikora. Wopeke ava ava wiza nkenye apa komapongo kuvhura va litjangese mosikora nsene va tambura marongo goBibeli ntani nokuparuka kuliza nonompango doSikriste. Nsene gumwe ta likida eharo lyokulitjangesa, mu pandadeka. Nsene simpe kapisi muzuvhisi, ove ngomutareli gosikora zogera nendi kuhamena eyi ga hepa kusikisa mo mokulitjangesa mosikora, ano ya wapa kuyizogera age ogu a lirongo nendi pweli (ndi nsene vakurona vendi wovapuli poveli). Yihepwa eyi kwa lifana neyi ga hepa kusikisa mo muntu mokukara muzuvhisi gokudira kugwana ekuho. Ayo kwa kara pepenuno 97dogoro 99 mobuke zoOrganized to Accomplish Our Ministry. Kara nelikwamo lyowo ava va litjangesa mosikora.

Kuruganesa Foroma zomapukururo. Foroma zomapukururo zankenye murongwa kwa kara mobuke zendi zosikora pepenuno 79 dogoro 81. Ngomu va yi likida monondombo, maruha gombuuyungiso 1 dogoro 17 kuvhura kugapa murongwa gokurugana ereso. Maruha gombuuyungiso nagenye, kugusa ko 7, 52, ntani 53, kuvhura kugapa murongwa gokurugana elikido. Ava wokugava yiuyungwa kuvhura kuvapa maruha nagenye gombuuyungiso, kugusa ko 7, 18, ntani 30.

Nsene ruha rombuuyungiso kuna ru gava komurongwa, mutareli gosikora ga hepa kuyididilika mobuke zomurongwa nopena zekara konhi zononkango “Mazuva va ku pere ruha,” kulivyuka noruha rombuuyungiso. Nsene murongwa ana mana siuyungwa sendi, kompengi mu pura nsene ana rugana eliyombereso eli lya kara kouhura wonzogera zoruha rombuuyungiso. Nsene ana yi sikisa mo, didilika mokakende koforoma. Nsene ono hara asi murongwa a rugurure hena ruha oro rombuuyungiso, wa ha tjanga nkenye eyi poforoma zendi zomapukururo ndi o zwide mevango va tjanga “Mazuva wa mene ruha.” Apo wa hepa tupu kudidilika po nsene asi murongwa ana mana ruha oro ntani ta hepa kurundurukira koruha rwapeke. Mokugwederera ko, pepenuno 82 mobuke zomurongwa, korumoho roukaro wosihorokwa esi ga rugane, mazuva gosiuyungwa va hepa kugatjanga ko. Pwa kara evango poforoma zomapukururo ntani nepelikwamo lyomaukaro goyihorokwa mokupulisira nkenye ruha mokururuganesa ruvali. Varongwa va hepa kukara nonobuke dawo posiruwo selikwamo.

Gava ruha rumwe rombuuyungiso posiruwo. Ayo ya wapa kurugana maruha gombuuyungiso ngamoomu ga likwamena. Nampili ngoso, nsene asi varongwa vamwe va kara nediwo unene, kuvhura o va korangede mokulironga nokuruganesa yirongwa yimwe pwavene. Makura kuvhura o va vatere nomaruha aga ono kugazara naga gwederera kekuro lyawo ngovauyungi novarongi wovawa.

Nampili murongwa nare ga tameka kulihameka mosikora, kuvhura a gwanene mo uwa wounene pokulironga nokuruganesa nkenye sirongwa. Mokuvatera varongwa noyihepwa yongandi, kuvhura o horowore maruha gombuuyungiso aga nava hepa kuwapukurura mevango lyokurugana maruha nagenye ngomu ga likwamena.

Kugava mapukururo. Pokugava mapukururo, ruganesa nawa yihonena nonompango doBibeli. Varongwa va hepa kulizuvha asi mapukururo vana va pe ntani monkedi omu vana ga va pe kuna lizi nonompango domoNonkango daKarunga.

Tura megano asi nove ‘murugani’ kumwe novanavanyoko. (2 Kol. 1:24) Ngwendi yiwo, nove wa hepa kulitura mo mokuwapukurura ngomuuyungi nomurongi. Pwanyamoge lironga buke zoGwanena mo uwa moSikora zoUkareli, nokuruganesa mapukururo gamo, ntani tura po sihonena sosiwa esi wopeke nava vhura kukwama.

Ngomu ono kuyirugana ngoso, litulira po sitambo sokuvatera varongwa va kare varesi novauuyungi ntani novarongi wovawa. Mokuyisikisa mo oyo, kondja mokuvatera varongwa va kwate egano maruha gombuuyungiso, eyi ga karera nomulyo ntani nomu nava ga tunga po. Buke ezi kwa zi wapaika monkedi omu ngayi ku vatera yi ku tompoke. Nampili ngoso, yinzi ya hepa po koruha roge kupitakana tupu kuresa nonkango mobuke ezi. Zogera magano aga va tura mo ntani nomu natu ga ruganesa.

Nsene murongwa ana rugana nawa koruha rongandi, mu pandadeka. Momusupi tumbura eyi yina ninkisa ruha oro ru wape ndi eyi runa karere nomulyo. Nsene ono hara a ruguruke ruha oro hena, divilisa asi ana kwata egano eyi na ru rugurukira. Zogera omu na yi sikisa mo. Vyukilira kutumbura ntani kara nonkenda.

Diworoka asi kovantu wovanzi, mokusikama nokugava siuyungwa komeho zombunga kapisi ureru. Nsene muntu ta lizuvhu asi kapi ana rugana nawa kuvhura a kare nomasinganyeko gokutwikira. Honena Jesus, ogu ga dilire kuteza “ruu rokudifuka” ndi asi a dimise “kage koramba.” (Mat. 12:20) Gazadara komalizuvho gomurongwa. Nsene kuna kugava mapukururo, gazadara ko nsene asi murongwa mupe ndi muzuvhisi ga kara nediwo. Epandadeko lyewa kuvhura kunkondopeka vantu va twikire kurugana paapa va hulira.

Tekura nkenye murongwa monkedi zefumadeko. Varoma 12:10 kuna kututantera asi: “Omu gave sihonena sokulifumadeka-fumadeka.” Ee, mapukururo musi kouwa goMutareli goSikora zoUkareli! Nsene murongwa mukondi kukupita, ruganesa nawa mavyukiso va gava mwa-1 Timoteusa 5:1, 2. Nampili ngoso, yi kare asi dingapi nomvhura dendi muntu, mapukururo omu mwa hamena kutura po marunduruko, nsene kuna ga gava monkedi zongwa, ureru kugatambura.—Yis. 25:11.

Nsene kuna kugava mapukururo, nkondopeka komurongwa sitambo sedeuro. Sitambo kapisi sokurugana tupu nawa nokugwana epandadeko ntani nokurundurukira koruha rwapeke rombuuyungiso. Sitambo kapisi sokukara muuyungi ndi murongi gokulimonekesa. (Yis. 25:27) Sitambo setu kuna kara sokuruganesa uhwi wetu wombuuyungiso mokuhamberera Jehova ntani nokuvatera wopeke va mu dive nokumuhara. Edeuro lyetu kutuwapaikira mokusikisa mo nawa sirugana esi va singonona mwaMateusa. 24:14 ntani 28:19, 20. Vanavazinyetugara wokuwapera konyima zosiruwo kuvhura va va pure mokupakera mbili “siunda saKarunga” ngovauyungi novarongi.—1 Pet. 5:2, 3.

Korangeda varongwa mokuresa magano gomobuke goruha rwawo rokukwama ko momazuva gomasesu konyima zokuruvapa. Va korangeda mokuruganesa eyi vana kulironga mokuliwapaikira yiuyungwa yawo yomosikora, nomononzogera dankenye ezuva, nomokugava malimbururo komapongo ntani moyirugana yokuzuvhisa.

Kugava yiuyungwa kovanavazinyetu. Eyi ya wapa nkenye apa kuyirugana yivike yitatu komeho zosiruwo. Yiuyungwa nayinye ya hepa kuyigava morupe ropatjangwa nsene kuvhura.

Yiuyungwa omu mwa hamena kuronga mbungakriste ya hepa kuyipa vakuronambunga, unene po owo nava vhura kuyirugana nawa, ntani vakwafimbunga ava va diva kuronga.

Mokutokora asi yiuyungwa musinke yokugava kovanavazinyetugara ntani nokovanavazinyetukadi, kwama mapukururo aga ava gava kumwe nelikwamo lyosikora. Nsene vanavazinyetugara vasesu nye vanazivanyetukadi vanzi, gava nompito dononzi kovanavazinyetugara va gave yiuyungwa omu mwa hamena kupitakana tupu kuresa Bibeli.

Gazadara konomukaro dovanavanyoko pokuvapa yiuyungwa. Ayo hepero kugava siuyungwa komukwafimbunga ndi komukuronambunga mosikora siruwo sooso ana kara noruha mEpongo lyoYirugana ndi sivike sooso ana kugava siuyungwa sanavenye mombungakriste ndi? Ayo hepero kugava siuyungwa kwamunazinyetukadi siruwo sooso munwendi nage ana kara nosiuyungwa ogu ngano na hepa evatero lyendi ndi? Tarurura nawa yiparatjangwa yoyiuyungwa, sili munona ndi murongwa ogu ga dira kugwana ekuho kuvhura a si rugane ndi? Tara o divilise asi siuyungwa sina lizi noruha rombuuyungiso somapukururo oru murongwa na rugana.

Yiuyungwa yokugava kovanavazinyetukadi, murongwa kwa hwa kuhorowora mwene ukaro wosihorokwa kuliza nomapukururo ga kara pepenuno 78 ntani 82. Munazinyetukadi va hepa kumupa muvateli nye gokugwederera ko kuvhura kumuruganesa. Nsene murongwa ta hundire ko muvateli ogu na liza neyi vana kulikida, ehundiro lyangoso kuvhura kulitambura.

Sikora zouvali. Nsene varongwa ava va litjangesa mosikora kwa pitakana 50, kuvhura mu ruganese sikora zauvali omu nava gava yiuyungwa. Kuliza noyihepwa yombunga, ewapaiko eli kuvhura kuliruganesa koyiuyungwa nayinye ndi koyiuyungwa tupu yivali yokuhulilira.

Sikora zauvali za hepa kukara nomugavi mapukururo gokuwapera, ngano a kare mukuronambunga. Nsene hepero mukwafimbunga gokuwapera kuvhura a gendese sikora ezi. Mbunga zovakuronambunga yizo zokutulisa po mugavi mapukururo. Ruganena kumwe novagavi mapukururo yipo yi kare ureru kuvatera varongwa nsene simpe poyili yitwa yomapukururo eyi va hepa kuruguruka kurugana.

Sikora zokulironga kuresa. Nsene mbunga zovakuronambunga zi tokora asi sinzi sovantu womombungakriste va hepa edeuro lyokulironga kuresa eraka eli ava uyunga mombungakriste, kuvhura o tulise po mawapaiko ngoruha roSikora zoUkareli. Edeuro eli kuvhura mu hamene kulironga kuresa ndi kuwapukurura kuresa.

Sikora ezi kapi za hepa kuzirugana posiruwo sokulifana apa varongwa vana kugava yiuyungwa moSikora zoUkareli. Mokugava evatero lyokugwanena po, tayi hepa siruwo sosinzi kupitakana sosikora. Vakuronambunga kuvhura va tokore eyi yina hepa po ntani siruwo esi nazi kara sikora ozo. Kuliza noyihepwa, mawapaiko kuvhura ga kare asi tava va rongo mokambunga ndi gumwe posiruwo.

Pwa hepa murongi gokuwapera. Ayo ya wapa kusipa sirugana esi kwa munazinyetugara ogu ga diva nawa kuresa ntani ga diva nawa eraka olyo. Nsene kwato munazinyetugara, vakuronambunga kuvhura va pure munazinyetukadi gokuwapera ga kara nosihonena sosiwa. Ga hepa kudwara sikayiwa nsene kuna kuronga.—1 Kol. 11:3-10; 1 Tim. 2:11, 12.

Kabuke Apply Yourself to Reading and Writing kwa ka pwagesa momaraka gomanzi. Kwa ka wapaika mokugava ediwotateko lyokuresa nokutjanga. Nobuke dimwe dopeke nado kuvhura kudiruganesa, kuliza nediwo lyowo vana kugwana edeuro. Nsene varongwa kuna kutura po ezokomeho lyewa, va hepa kuvakorangeda mokugava yiuyungwa moSikora zoUkareli.

Ngomutareli goSikora zoUkareli, kuvhura o rugane ko yoyinzi mokuvatera mbungakriste. Liwapaikira nawa, ntani kuliza nepukururo va gava moVaroma 12:6-8, pakera mbili sirugana soge ngouhwi womulyo wokutunda kwaKarunga.