Omu no rugana epongo lyomoyirugana yokuzuvhisa li kare lyokukorangeda

Ngwendi mapongo getu nagenye, epongo lyoyirugana yokuzuvhisa kuna kara ewapaiko lyokutunda kwaJehova eli ali tu korangeda tu lihara-hare nokurugana yirugana yoyiwa. (Heb 10:24, 25) Epongo lyoyirugana yokuzuvhisa lya hepa kugusa nominute 5 ndi 7 tupu. Monominute odo mu hamene kuhangura vantu nokuvapa mukunda ogu nava ka zuvhisira ntani nekanderero. (Nsene kuna kulirugana konyima zepongo lyapeke, kapisi li sike konominute 5.) Mupitisili ga hepa kuliwapaikira nawa yipo va gwanene mo uwa ava vana kara mepongo ezuva olyo. Pasihonena, moMapeu nsene sinzi sovazuvhisi vana kara mepongo kapi kava kere po sivike sina ka pita, nayi wapa kutumbura eyi nava vhura kuzogera nogu nava ka zuvhisira. Yirongwa yimwe hena musinke nomu zogera?

• Ruha Omu no zogera novantu rwa kara moMbapira zEkepongo

• Omu no ruganesa yihorokwa ndi nombudi dina kuhoroka momukunda mokutameka nzogera

• Omu no limburura ogu ana hara kuhagekesa po nzogera

• Omu no zogera nomuntu ogu ga dira kupura mwaKarunga ndi ga pura melisinto ndi a uyunga eraka lyapeke ndi ga hamena koukareli wapeke ou wa dira kudivikwa momukunda gweni

• Omu no ruganesa eyi ya kara ko jw.org, noko JW Library^® app, ndi moBibeli

• Omu no ruganesa simwe soyiruganeso yetu yomokuzuvhisa

• Omu no lihameka mononkedi edi dokuzuvhisa ngwendi kuzuvhisira kotelefona, kutjanga nombilive, kuzuvhisira oku aku kara vantu wovanzi, kurugana matengwiroko ndi malirongo goBibeli

• Madiworokeso kuhamena kudira kutura eparu lyawo mosiponga, kutambura ukaro, kukara nononkedi donongwa, kukara nomutaro gouhunga ntani yimwe hena

• Sirongwa somombapira Litura mo mokuronga nokuresa ndi likida vidiyo

• Omu no korangeda nokuvatera ogu ono kuzuvhisa nage

• Etjangwa eli lina lizi noyirugana yokuzuvhisa ndi sihorokwa sokukorangeda somokuzuvhisa