Mapongo aga aga tu ‘koraike tu lihara-hare nokurugana yoyiwa’

KUTUNDA kwanare, vantu vaJehova kuponga kumwe monkedi zokuwapera. MoIsraeli zanare, vagara navenye ngava zi koJerusarema rutatu momvhura poruveze royipito. (Deut. 16:16) Posiruwo sovapositoli, Vakriste ngava pongo kumwe nkenye apa, unene po membo lyagumwe. (Fir. 1, 2) Naina, ose kuhafera mapongo noyigongi yezuva limwe neyi yomazuva gatatu. Morwasinke vakareli vaKarunga ava pongere kumwe? Morwa aro ruha romulyo roukareli wetu.—Epis. 95:6; Koros. 3:16.

² Ava ava zi komapongo kugwanena mo uwa. Kombinga zoSipito soYikorogo sankenye mvhura zautano-nauvali, Vaisraeli kwa va tanterere asi: “To zigida navenye, va ponge, vagara novakadi novanona novanayirongo ava va kara moyitata yeni, asi nkenye ogu ngano a zi zuvhe, a lirongere ko kutjira HOMPA Karunga goge, a limburukwe komarongo gendi nawa-nawa.” (Deut. 31:12) Yosili, konda zeyi atu pongere kumwe kuna kara asi Jehova a tu ‘ronge.’ (Jes. 54:13) Mapongo kugava hena mpito zokulidiva novanavazinyetu nokugwana makorangedo ntani nokulinkondopeka.

MAPONGO GOMOMBUNGAKRISTE

³ Varongwa ava va pongere kumwe konyima zoPentekoste momvhura 33, kwa ligeve vene merongo lyovapositoli ntani ‘nkenye ezuva awo ngava kara montembeli mutjima gumwe tupu.’ (Yirug. 2:42, 46) Apa Vakriste ngava pongo kumwe moukareli, ngava resa matjangwa, kukwatera mo nombilive edi ngava tjanga vapositoli ntani noVakriste vakwawo. (1 Kol. 1:1, 2; Koros. 4:16; 1 Tes. 1:1; Jak. 1:1) Ntani hena ngava kanderere kumwe ngombunga. (Yirug. 4:24-29; 20:36) Ano poyiruwo yimwe, ngava simwitire yihorokwa eyi ngava ligwanekere nayo mokuzuvhisa. (Yirug. 11:5-18; 14:27, 28) Awo ngava konakona hena marongo gomoBibeli ntani mauporofete aga ga sikilire mo. Ntani ngava gwana mavyukiso kuhamena nkareso nomparukiso zoMukriste. Navenye ngava va korangeda va zuvhise mbudi zongwa noupampi.—Rom. 10:9, 10; 1 Kol. 11:23-26; 15:58; Efe. 5:1-33.

⁴ Naina, ose kukwama sihonena sovapositoli komapongo. Ose kulimburukwa ekorangedo lyomoVahebeli 10:24, 25 eli asi: “Atu likoraike-koraikeni. . . . Twa ha zumbeni yigongi yomombungakriste zetu, moomu va yi yika vamwe, nye atu likorangedeni, unene pokumona asi ezuva lyaHompa tali hedere pepi.” Pomazuva aga gopouhura, twa hepa kuponga kumwe nkenye apa tu gwane makorangedo yipo tu twikire kunkondopeka elikwatakano lyetu naJehova ntani nokumulimburukwa. (Rom. 1:11, 12) NgoVakriste, ose kuna kuparuka mokatji kovantu ava va penga ntani va puka. Ose twa nyokera po madowo gokunyata gouzuni ou. (Fil. 2:15, 16; Tit. 2:12-14) Yosili, kuponga kumwe novantu vaJehova kuna kara sininke somulyo unene kwetu. (Epis. 84:10) Ntani kugwanena mo mauwa gomanzi apa atu lironga Nonkango daKarunga kumwe novakwetu. Ngesi tu konakoneni mapongo gokulisiga-siga aga va wapaika yipo tu gwanene mo mauwa.

EPONGO LYOMOSIKONDOVIKE

⁵ Ruha rokuhova rwepongo lyomosikondovike kuna kara siuyungwa sanavenye sokutunda moBibeli esi va wapaikira vantu navenye, kukwatera mo ava ava wiza kepongo sikando sokuhova. Siuyungwa oso kuna kara ruha romulyo omu Vakriste ava vhuru kunkondopeka elikwatakano lyawo naJehova va kare asi wovape ndi womombungakriste.—Yirug. 18:4; 19:9, 10.

⁶ Jesus Kristusa novapositoli ntani novapuli vakwawo, ngava rugana mapongo ganavenye monkedi omu vana kugarugana naina monombungakriste dovantu vaJehova. Yosili, Jesus kwa kere muuyungi gomuwa po apa pevhu. Bibeli kwa uyunga kumuhamena asi: “Kutupu muntu ogu ga uyunga rumwe, moomu a uyunga gwina mugara.” (Joh. 7:46) Jesus nga rongo nononkondo, eyi kwa tetukisire vapurakeni vendi. (Mat. 7:28, 29) Ava va tulire erongo lyendi pasirugana va gwanenene mo mauwa. (Mat. 13:16, 17) Vapositoli ngava kwama sihonena sendi. MoYirugana 2:14-36, kwa kara mo siuyungwa esi ga geve mupositoli Peturusa nomukumo mezuva lyoPentekoste momvhura 33. Eyi ga uyungire kwa tumangedere wovanzi va rugane ko yuma. MoAtena, vantu wovanzi kwa kere vapuli konyima zapa va purakenene kosiuyungwa somupositoli Paurusa.—Yirug. 17:22-34.

⁷ Ya lifana nomomazuva getu, wovanzi kugwanena mo mauwa moyiuyungwa yanavenye yomonombungakriste ntani neyi ava gava koyigongi yezuva limwe noyigongi yomazuva gatatu. Yiuyungwa yangoso, kutuvatera tu kwaterere komarongo goSikriste ntani tu liture mo mosirugana soUhompa. Pokuzigida ava va kara neharo ntani nanavenye komapongo, kuvhura tu vatere vantu va ya dive marongo gomoBibeli.

⁸ Yirongwa eyi ava zogere moyiuyungwa yanavenye kwa lisiga. Yiuyungwa kudemenena komarongo gomoBibeli nokomauporofete nokonompango ntani mapukururo kuhamena mapata nononkwara nonomukaro edi vana kuligwanekera nado vadinkantu ntani nonkareso zoSikriste. Yiuyungwa yimwe kudemenena koyirugana yaJehova yesito. Ano yimwe kudemenena koyihonena yepuro nouradi noulimburukwi wovantu ava va tumbura moBibeli ntani neyi natu lirongera ko.

⁹ Mokugwanena mo mauwa moyiuyungwa yanavenye, ya kara nomulyo kupurakena nawa nokutara matjangwa aga ana kutumbura muuyungi ntani nokumukwama apa naga resa nokugafaturura. (Ruk. 8:18) Ngomu tuna kudemenena kweyi vana kuzogera, ngatu twikira kukwaterera kweyi tuna kulironga nokuyitura pasirugana.—1 Tes. 5:21.

¹⁰ Nsene vagavi yiuyungwa vanzi, mbungakriste ngazi kara nosiuyungwa sanavenye nkenye sivike. Eyi kutompoka apa ava zigida vagavi yiuyungwa wokonombungakriste dopopepi. Ano nsene vasesu, siuyungwa sanavenye kapi ava si gava nkenye sivike.

¹¹ Ruha rwauvali rwepongo lyomosikondovike kuna kara Elirongo lyoRuhungu, azo nzogera zomapuro nomalimbururo. Kupitira moRuhungu, Jehova kutuvatera tu kwate egano Nonkango dendi posiruwo sokuwapera.

¹² Yirongwa yelirongo kudemenena nkenye apa omu natu tura pasirugana nompango domoBibeli meparu lyetu. Ayo kunkondopeka Vakriste va nyokere po “mpepo zouzuni” nonkareso zondona. (1 Kol. 2:12) Kupitira moyirongwa yomoRuhungu, ose kuyakwata nawa egano marongo gomoBibeli nomauporofete gamo, ayo kutuvatera tu kwaterere kousili nokugenda monzira ezi ava gendi vahungami. (Epis. 97:11; Yis. 4:18) Kukara mElirongo lyoRuhungu nokulihameka mo kutuvatera tu hafere ehuguvaro lyouzuni woupe waJehova. (Rom. 12:12; 2 Pet. 3:13) Kuponga kumwe noVakriste vakwetu kutuvatera tu tunge po yiyimwa yompepo ntani nokunkondopeka eharo lyetu lyokukarera Jehova noupampi. (Gar. 5:22, 23) Ntani ngayi tu nkondopeka tu lididimikire maudigu yipo tu kare ‘netateko lyewa lyeyi yokomeho’ kumwe ngatu ka gwane “mwenyo gwanarunye gosili.”—1 Tim. 6:19; 1 Pet. 1:6, 7.

¹³ Ngapi natu gwanena mo mauwa melirongo lyoRuhungu? Twa hepa kuliwapaikira komeho zosiruwo, yi kare asi nyoselike ndi ngepata, nokuresa matjangwa aga va tura mo ntani nokukalimburura kepongo mononkango danyamwetu. Eyi ngayi ninkisa usili u kakatere monomutjima detu, ntani apa wopeke ngava zuvha malimbururo getu ngava gwanena mo uwa. Natuvenye ngatu gwanena mo mauwa nsene tu purakena nawa komalimbururo gava wopeke.

EPONGO LYOMOKATJI KOSIVIKE

¹⁴ Mbungakriste nkenye sivike kukara nepongo moSinyanga soUhompa eli ava tumbura asi Eparu lyetu noyirugana yokuzuvhisa. Epongo eli kwa kara nomaruha gatatu aga aga tu vatere tu wapere kukara ‘vakareli’ vaKarunga. (2 Kol. 3:5, 6) Elikwamo nomagano aga atu zogere mepongo olyo, kuyigwana mombapira zekepongo Eparu lyetu noyirugana yokuzuvhisa. Mbapira ozo kwa kara mo yihonena omu natu zogera novantu mokuzuvhisa.

¹⁵ Ruha rokuhova rwepongo eli kurutumbura asi Ugawo womoNonkango daKarunga, aro kutuvatera tu dive nawa etwaromo noyikaramo yoyihorokwa yomoBibeli ntani nokulironga omu natu yi tura pasirugana. Amo kwa hamena mo siuyungwa nereso ntani nokuzogera yitwa yemereso lyoBibeli lyosivike. Mafano nomavango oku no tjangera magano goge aga atu gwana mombapira zekepongo Eparu lyetu noyirugana yokuzuvhisa, kutuvatera tu lirongere ko. Ekonakono lyangesi lyoBibeli kutuvatera meparu ntani tu wapukurure nkedi zetu zokuronga, yipo tu ‘sikilire mo, tu fire kurugana yirugana nayinye yoyiwa.’—2 Tim. 3:16, 17.

¹⁶ Ruha rwauvali kuna kara Litura mo mokuzuvhisa, oru va wapaikira mokugava mpito zokuliyomberesa kuzuvhisa ntani nokuwapukurura nkedi zetu zokuzuvhisa nokuronga. Koyiuyungwa yovarongwa kwa gweda ko novidiyo edi adi likida omu no zogera novantu. Ruha oru kutuvatera tu ‘lironge omu natu uyunga’ yipo tu vhure “kunkondopeka ava vana roroka.”—Jes. 50:4.

¹⁷ Ruha rwautatu kuna kara Kuparuka ngoMukriste, aro kutuvatera tu ture pasirugana nompango domoBibeli meparu lyetu. (Epis. 119:105) Ruha romulyo moruha oru kuna kara Elirongo lyoBibeli lyoMbunga. Ngwendi Elirongo lyoRuhungu, Elirongo lyoBibeli lyoMbunga nazo nzogera zomapuro nomalimbururo.

¹⁸ Nkenye kwedi apa atu gwana Mbapira zekepongo Eparu lyetu noyirugana yokuzuvhisa, muwapaiki gombunga zovakuronambunga ndi mukuronambunga kuyitarurura nokutjanga elikwamo. Nkenye sivike mukuronambunga gwapeke ogu ga diva kuronga ntani za pulisira mbunga zovakuronambunga kuvhura kukara munasipundi mepongo olyo. Situmbukira sendi kwa hamena mo kudivilisa asi epongo lya hepa kutameka nokupwa nosiruwo ntani nokupandadeka nokugava mapukururo kwava vana gava yiuyungwa.

¹⁹ Ngomu atu liwapaikire nkenye apa kuza kepongo nokukalihameka mo, ose kugwana ediwo lyomoMatjangwa nokukwata egano nompango domoBibeli, nokuzuvhisa mbudi zongwa noupampi ntani nokutulisa po varongwa. Ava va dira kugwana ekuho nawo kugwanena mo uwa apa ava ya pongo kumwe nose nokuzogera nawo yininke yopampepo. Mokutuvatera tu liwapaikire epongo eli ntani naga gopeke, twa hepa kuruganesa Watchtower Library, JW Library^®, BIBILIYOTEKA ZOKOINTANETA^™ (nsene mwa kara nazo meraka lyeni), ntani bibiliyoteka zomoSinyanga soUhompa. Bibiliyoteka zomoSinyanga soUhompa kukara mo yimbapiratjangwa yokuhamena Nombangi daJehova noIndeksi zoRuhungu ndi Buke zepaparo zoNombangi daJehova, ntani matoroko gamwe goBibeli nonobukenkango ntani nomauzera gamwe hena. Bibiliyoteka ezi kuvhura kuziruganesa komeho zepongo ndi konyima zepongo.

MAPONGO GOKUZUVHISA

²⁰ Mokatji kosivike nomoyikondovike, tumbunga tovazuvhisi kurugana mapongo gomasupi gomoyirugana yokuzuvhisa. Mapongo ogo narunye kugaruganena momambo ndi komavango gokuwapera. Ano pamwe kugaruganena moSinyanga soUhompa. Kukara notumbunga otu atu pongere komavango gokulisiga-siga kuvatera vazuvhisi va ze kepongo lyomoyirugana yokuzuvhisa lyomomukunda gwawo. Ntani kuvatera vazuvhisi va ka sike nosiruwo oku nava ka zuvhisira. Eyi kuvatera mupitisili gokambunga a pakere mbili womokambunga kendi. Nampili ngomu ava gwanene mo uwa mokupongera komavango gokulisiga-siga, maukaro pamwe kuninkisa tumbunga tongandi tu ponge kumwe. Pasihonena, nsene vasesu ava pwaga mokuzuvhisa mokatji kosivike, ya wapa kupakerera tumbunga ndi navenye va ponge poSinyanga soUhompa ndi kevango lyokuwapera. Monkedi zangoso, kuvatera vazuvhisi va gwane ogu nava pwaga nage. Mbungakriste kuvhura zi pongere poSinyanga soUhompa momazuva gepwizumuko. Ndi kuvhura zi ruganene epongo olyo moSinyanga konyima zElirongo lyoRuhungu.

²¹ Nsene tumbunga kwa tu gaununa, mupitisili gokambunga ga hepa kurugana epongo olyo. Poyiruwo noyiruwo, kuvhura a pure ko muvateli gwendi ndi munazinyetu gokuwapera a rugane mapongo gangoso. Mupitisili ga hepa kuliwapaikira mokuzogera eyi nayi vhura kuvatera vazuvhisi. Nsene vana mana epongo nokugaununa vantu nokuvatantera oku nava ka zuvhisira, gumwe ga hepa kukanderera. Makura kambunga ta ka zi usimbu-simbu kevango oku vana kukazuvhisira. Mapongo gangoso, kukara tupu nominute ntano ndi ntambali, nye nsene kuna kulirugana konyima zepongo lyomoSondaha lya hepa kusupipa. Mupitisili ga hepa kugava ekorangedo nomagano gomawa ntani nomavyukiso kowo vana kupwaga mokuzuvhisa. Vazuvhisi wovape ndi ava vana hepa evatero kuvhura kupwaga mokuzuvhisa nava va diva kuzuvhisa yipo va va deure.

MAWAPAIKO GEPONGO LYOMBUNGAKRISTE ZOMPE NDI ZONUNU

²² Ngomu varongwa vana kuvhuka, sivaro sonombungakriste kuna kuligwederera. Ehundiro lyokutulisa po mbungakriste zompe kulirugana mutareli gonombunga. Nye momaukaro gamwe, tumbungagona kuvhura kugwanena mo uwa pokulipakerera kumwe nombungakriste zopopepi.

²³ Poyiruwo yimwe, monombungagona kukara mo tupu vanavazinyetu wovakadi. Moukaro wangoso, munazinyetu gomukadi ogu ana kukanderera mombunga ndi mepongo lyokuzuvhisa ga hepa kutura ko sikayiwa ndi embare komutwe, mokuliza newapaiko lyoPatjangwa. (1 Kol. 11:3-16) Narunye, ga hepa kuhingira a tare mombunga. Vanavazinyetu wovakadi kapi ava gava yiuyungwa yanavenye. Nye, kuvhura kuruganesa magano aga za gava mbunga zaJehova nokukumburura ko, ndi kuvhura kugagava morupe ronzogera ndi rwelikido. Beteli kupura munazinyetu gomukadi gumwe a limburure nombilive ntani nokupakera mbili mapongo. Mwaza siruwo, nsene vanavazinyetu wovagara vana wapere, awo ngava pakera mbili yitumbukira oyo.

YIGONGI YEZUVA LIMWE

²⁴ Nkenye mvhura, mawapaiko kugatulisa po konombungakriste yipo di kare noyigongi yivali yezuva limwe. Yigongi oyo kugava mpito kwanavenye ava ava kara po va ‘hare unene’ kukara kumwe noVakriste vakwawo. (2 Kol. 6:11-13) Mbunga zaJehova kuwapaika yiparatjangwa nomaruha gokulisiga-siga gomalikwamo goyigongi oyo kuliza neyi yina hepa po posiruwo oso. Mauzera ogo kugagava kupitira moyiuyungwa nomomalikido nemeuyungo lyopwanyovelike ntani mapuragero. Mavyukiso gangoso kunkondopeka navenye ava ava kara poyigongi. Yigongi oyo kugava mpito kovarongwa wovape ava va ligava vene kwaJehova va gwane ekuho.

YIGONGI YOMAZUVA GATATU

²⁵ Nkenye mvhura kukara nosigongi sosinene. Yigongi oyo kukara mazuva gatatu, ntani nombungakriste domoruhamukunda ogo kuyalipakerera kumwe posigongi oso. Nobeteli edi adi wapaike yigongi kuvhura di tokore kupakerera kumwe nombungakriste domoruha oro di ruganene sigongi mevango limwe tupu. Moyirongo yimwe, mawapaiko goyilika oyo kulisiga kuliza nomaukaro ndi nomavyukiso gokutunda kombunga zaJehova. Poyiruwo noyiruwo, yigongi yoyirongo ndi yokulikarera kuyitulisa po moyirongo yimwe ntani kuzigida Nombangi dokoyirongo yokulisiga-siga di ya kare po. Kupitira moyigongi oyo yoyinene yoNombangi daJehova, sinzi sovantu kwa tambura usili.

²⁶ Yigongi yangoso kuna kara yilika yoruhafo eyi ava hafere vantu vaJehova ava va gwana ekuho. Poyilika yangoso yipo ava pwagesa mauzera gomape kuhamena usili woBibeli. Ano poyigongi yimwe, kupwagesa po yimbapiratjangwa yoyipe yokuruganesa nyamwetu ndi melirongo lyombunga ndi mokuzuvhisa. Yigongi yomazuva gatatu namo kuhamena mo ekuho. Unene po, ayo kupameka elikwatakano lyetu naJehova. Ayo kugava umbangi asi vantu vaJehova kwa kara mouumwe mouzuni mudima, uumwe owo kulikida asi awo sili varongwa vaJesus Kristusa.—Joh. 13:35.

²⁷ Pokukara momapongo nopoyigongi yivali yezuva limwe neyi yomazuva gatatu yovantu vaJehova, kutunkondopeka tu rugane mpango zendi. Ntani kutupopera komapukiso gouzuni ou aga naga tu ninkisa tu tengure monyima. Mapongo gangoso, kuyererepeka Jehova nokumupa efumano. (Epis. 35:18; Yis. 14:28) Ose kupandura kweyi Jehova ga gava kovantu vendi yilika yangoso yokupameka epuro momazuva aga gopouhura.

MURARERO GWAHOMPA

²⁸ Nkenye mvhura nombungakriste doNombangi daJehova uzuni mudima, kudiworoka nomfa daJesus Kristusa ndi kurugana Murarero gwaHompa rumwe momvhura. (1 Kol. 11:20, 23, 24) Eli kuna kara epongo lyomulyo unene momvhura kovantu vaJehova. Ose kwa tu pangera tu rugane Murarero gwaHompa.—Ruk. 22:19.

²⁹ Ezuva lyoMurarero gwaHompa kwa liza nezuva lyoPaska zanare, ngomu ga yi tumbura Matjangwa. (Ex. 12:2, 6; Mat. 26:17, 20, 26) Paska kwa kere silika esi ngava rugana rumwe momvhura Vaisraeli mokudiworoka kweyi Jehova ga va zowere mo moEgipite momvhura 1513 komeho zokuwiza Jesus pevhu. Posiruwo sina, Jehova kwa tulire ezuva 14 lyokwedi kokuhova koVajuda ngezuva lyokulya nzwigona zoPaska ntani nokutunda moupika waEgipite. (Ex. 12:1-51) Awo ngava varura ezuva olyo kutundilira apa ngaku terama kwedi moJerusarema mokwedi oko dogoro momazuva 13. Murarero gwaHompa kugurugana apa aku zulilire kwedi.

³⁰ MwaMateusa 26:26-28, Jesus kwa likidire omu ava rugana Murarero. Mboroto novhinyu eyi ava makere ava ngava ka pangera naJesus Kristusa meguru poMurarero gwaHompa kufanekesa rutu nohonde zaJesus. (Ruk. 22:28-30) Vakareli vaJehova wokuhupa ko ntani novantu navenye kuvakorangeda va ka kare po, nampili ngomu ava dili kumakera komboroto nokukanwa kovhinyu. Pokukakara po posilika oso, awo kulikida rupandu rwawo kewapaiko lyaJehova Karunga eli lya retera mauwa vantu navenye kupitira mwaMunwendi, Jesus Kristusa. Komeho tupu zoMurarero gwaHompa, siuyungwa sanavenye sokulikarera kusigava yipo vantu va ndindire nononkondo silika oso ntani nokuvatumangeda va hare kulironga Bibeli.

³¹ Nombangi daJehova kuyihafera kuza komapongo, oku atu “likoraike-koraikeni mokulihara-hara nomokurugana yirugana yoyiwa.” (Heb. 10:24) Mukareli gokulimburukwa gonondunge kwa tulisa po mapongo gangoso yipo ga tu vatere tu kwate egano Nonkango daKarunga. Vakareli navenye vaJehova ntani nava va kara neharo lyokulironga Bibeli kuvakorangeda va ze komapongo nkenye apa yipo va gwanene mo uwa. Vakareli vaJehova kwa kara mouumwe, morwa kukwatesa ko mawapaiko gomombunga zendi. Unene po, ose kupandura Jehova nokumuyererepeka.—Epis. 111:1.