MAPURO AGA AVA PURA VADINKANTU
Ngapi omu nani nyokera po magazaro gepuko?
Ngapi omu o litara?
Kukara nomutaro gomuwa/nehuguvaro
“Ame kuhetekera ko kuhafa nokunyokera po kuguva. Ame kuhetekera ko kumenya-menya nkenye ezuva nokukara noruhafo”—Valerie
Kukara nosinka unene
“Nkenye apa ayi horoka yininke yoyiwa, ame nkenye apa kugazara asi ayo kapisi usili ndi kapi tayi vhuru kuhoroka.”—Rebecca
Kutambura ukaro
“Nsene ni kara nomutaro gomuwa, kapi ngayi hafesa nge apa yininke ngayi dira kugenda po nawa ano nsene ni kara nosinka unene, ngani kara muntu gokuguva-guva nkenye apa. Nsene ni tambura ukaro nga yi vatera nge ni mone yininke moomu yina kara.”—Anna
Morwasinke ya karera nomulyo?
Bibeli kutanta asi “vantu ava ava kara nerago, kuhafera ukaro wawo.” (Yisewe 15:15) Vantu ava ava nyokere po magazaro gepuko nokutara eparu monkedi zongwa kukara noruhafo. Awo hena kuvhura kutulisa po vakaume. Apa muntu a guwu nokukara nomagazaro gepuko nkenye apa, vantu wovasesu tupu ava hara kukara nage
Nampili vantu ava ava tara yininke monkedi zongwa, nawo kuligwanekera nomaudigu meparu. Pasihonena:
Ove kuvhura o zuvhe nombudi kuhamena yita nouteroliste ndi ukorokotji
Kuvhura o ligwanekere nomaudigu mepata
Kapi wa sikilira mo ntani wa kara nomaupirankondo aga o kondjo nago
Kaume koge nampo ga ku koresa pamalizuvho
Mevango lyokudemenena komaudigu ogo hetekera kutambura ukaro. Nsene o tambura ukaro ayo ngayi ku vatera o nyokere po magazaro gepuko ntani kapi ngayi kudompesa unene.
Kuvhura o lididimikire maudigu meparu ntani noku kara nehuguvaro asi ezuva limwe nga ga haga po
Eyi no rugana
Yi tambura asi kapi wa sikilira mo
Bibeli kuuyunga asi: “Kutupu nampili gumwe pevhu, ogu a rugana narunye youhunga ga hana kupuka.” (Muudisi 7:20) Kutura mapuko kulikida asi nove muntu nye kapi ayi tanta asi ove kwato mulyo.
Omu no tambura ukaro: Wapukurura mapuko goge, nye waha ndindira ko asi o sikilire mo. Mudinkantu gomugara gedina Caleb kwa uyunga asi: “Ame kuhetekera ko kudira kudemenena komapuko gange yipo ga dire kudompesa nge. Mevango lyoyo, ame kulirongera ko komapuko gange yipo ni dive asi papi nani vhura kuwapukurura.”
Nyokera po kulihetakanesa novakweni.
Bibeli kutanta asi: “Twa ha likanganga nokulirumbasana-rumbasana ndi tu lifira-fire mfudu.” (Vagarata 5:26) Nsene o tara mafano gokointaneta gosilika esi va dira kukuzigida ayo kuvhura ngayi kuhandukise noku kukoresa komutjima. Ayo kuvhura yi ku ninkisa o lizuvhe asi vakaume woge kapisi vakaume wousili.
Omu no tambura ukaro: Yitambura asi kapi ngava kuzigida komapongasano nagenye. Mafano gokointaneta kapi aga likida nayinye eyi kayihorokere. Mudikantu gedina Alexis kwa uyunga asi: “Intaneta kulikida tupu yininke yoyiwa eyi ayi horoka meparu lyomuntu. Rorunzi vantu kapi ava likida nayinye eyi yina kuhoroka meparu lyawo.
Kara muntu ogu a tulisa po mbili mepata.
Bibeli kutanta asi: “Kondjeni paapa mwa hulira mu tulise po mbili novantu navenye.” (Varoma 12:18) Kapi to vhuru kupangera eyi ava rugana vakweni, nye kuvhura o pangere eyi o rugana. Ove kuvhura kuhorowora kutulisa po mbili.
Omu no tambura ukaro: Wa ha gwederera komaudigu gemepata nye tulisa po mbili mepata ngwendi moomu tupu o tulisa po mbili novakaume woge. Mudinkantu gomukadona gedina Melinda kwa tanta asi: “Kwato ga sikiliramo yipo nye ose nga tu koresa wopeke ntani nawo ngava tu koresa napa nopena. Twa hepa kutokora nsene tatu tulisa po mbili ndi hawe.”
Kara norupandu
Bibeli kutanta asi: “Omu pandure nkenye apa.” (Vakorosi 3:15) Kukara nonkareso zorupandu ngayi kuvatera o demenene koyininke yoyiwa meparu lyoge mevango lyokudemenena koyininke eyi yina kudira kugenda po nawa.
Omu no tambura ukaro: Diva maudigu goge, nye wa ha semburura yininke yoyiwa eyi yina kuhoroka meparu lyoge. Mudinkatu gomukadi gedina Rebecca kwa tanta asi: “Ame kutjanga nkenye ezuva sininke simwe sosiwa esi sina horokere nge. Na hara kulidiworokesa asi nampili ngomu ani kara nomaudigu, pwa kara nkenye apa yininke yoyiwa yokuvhura kugazara.”
Gazadara ko kovakaume ava no horowora
Bibeli kutanta asi: “Kulikwata ukwawo novantu wovadona, kuzonagura nkareso zongwa.” (1 Vakolinte 15:33) Nsene vantu ava o kara-kara nawo kwa kara nononkedi donondona nove ngayi kukundama.
Omu no tambura ukaro: Apa vakaume vetu ava piti momaudigu awo kuguva. Va vatera, nye wa ha pulisira maudigu gawo ga kukundame. Mudinkantu gomukadi gedina Michelle kwa tanta asi: “Kapisi tu kare tupu novantu ava ava dili ku tara yininke monkedi zouhunga.”
Resa yirongwa eyi nayi kuvatera o tare yininke monkedi zouhunga
Ose kuna kuparuka posiruwo esi azi tumbura Bibeli asi “yiruwo yoyidigu.” (2 Timoteusa 3:1) Ove kukudigopera kutara yininke monkedi zongwa mouzuni ou wa kara maudigu gomanzi ndi? Resa sirongwa “Ruhepo ngaru haga po ndi?”