Ruha 1

Esito dogoro koRuhanzo

Kupi oku lya tundilira eguru nevhu? Ngapi ezuva nokwedi nonombungururu ntani noyininke yoyinzi yepevhu ya wiza po? Bibeli kwa gava elimbururo lyosili apa za tanta asi ayo Karunga ga yi sitire. Yipo nye buke zetu zina kutameka nomasimwititi goBibeli kuhamena esito.

Ose tatu lirongo asi yisitwa yaKarunga yokuhova kwa kere vantu wopampepo wokufana ngwendi mwene. Awo kwa kere vaengeli. Nye evhu kwa li sitilire vantu ngwendi nyose. Karunga yipo ga rugene mugara nomukadi womadina Adamu naEva nokuvatura mosikunino sosiwa. Nye awo kwa nyokere Karunga nokuzumbanesa uhunga wawo wokutwikira kuparuka.

Kutunda kesito lyaAdamu dogoro koRuhanzo rorunene, apo kwa pitire po nomvhura 1 656. Mosiruwo esi vantu wovanzi wovadona kwa parukire. Meguru kwa kere mo vantu wopampepo wokupira kumoneka, Satana novaengeli vendi wovadona. Pevhu kwa kere po Kaini novantu vamwe wovadona wovanzi, kutura ko novagara wononkondo dokulikarera. Nye pevhu pwa kere hena vantu wovawa—Abeli naHenoka naNowa. MoRuha ROKUHOVA tatu ka resa kuhamena vantu navenye ava noyihorokwa eyi.