Esimwititi 58
Ndafita naGolyata
VAFILISITI tava wiza hena va ya rwise Vaisraeli. Vakuru vaNdafita vatatu wovakurona po ngesi vana kara nye moukwayita waSauru. Makura ezuva limwe Isayi ta tantere Ndafita asi: ‘Gusa nombuto nomboroto o yi twarere vakuru woge. Ka tare asi ngapi omu vana karere.’
Ndafita apa ana ya siki pokamba zovakwayita, ta dukire kevango lyomarwiro a ka papare vakuru vendi. Ekisi lyeMufilisiti Golyata tali wiza li ya sinde Vaisraeli. Alyo ngali yi rugana eyi nkenye ngurangura nongurova mazuva 40. Age ta karuka asi: ‘Horoworeni mugara gumwe a ya rwe name. Ntene na ya funda nge nokudipaga nge, ose ngatu kara vapika veni. Nye ntene ame nani mu funda nokumudipaga, one ngomu kara vapika vetu. Ame kuna kumusensa mu horowore gumwe a ya rwe name.’
Ndafita ta pura vakwayita vamwe asi: ‘Mugara ogu nga dipaga ogu Mufilisiti, a guse Israeli meswau, yisinke ngava mu pa?’
Vakwayita tava tanta asi: ‘Sauru nga pa mugara ogo ugawo wounzi. Age hena nga mu pa munwendi gomukadi a kware.’
Nye Vaisraeli navenye tava tjira Golyata morwa woowo unene wendi. Ure wendi poyiha yonometa 3, ano mukwayita gumwe ta mu simbire silikandwiso sendi.
Vakwayita vamwe tava zi kwahompa Sauru nokumutantera asi Ndafita ana hara kurwana naGolyata. Nye Sauru ta tantere Ndafita asi: ‘Ove kapi to vhuru kurwana nogo Mufilisiti. Ove mumatigona simpe, ano age kwa kara mukwayita kutunda unona wendi.’ Ndafita ta limburura asi: ‘Ame kwa dipaga erundu nanyime ava va kwete nonzwi dotate. Ano ogu Mufilisiti nage yimo na fana. Jehova na vatera nge.’ Sauru makura ta tanta asi: ‘Zende, ano Jehova ngano a kare noge.’
Ndafita makura ta zi mokamukuro nokudamuna mo tumanya tutano tokuliudinga, ta tu tura mondjato zendi. Makura ta gusa sizugumiso sendi nokuza a ka gwanekere nekisi. Golyata apa ana kumumona, kapi ana kuyipura. Age ta gazara asi tayi mu rerupire mokudipaga Ndafita.
Golyata ta tanta asi: ‘Wiza oku ni ya gave nyama zoge koyidira noyikorama yi lye.’ Nye Ndafita ta tanta asi: ‘Ove kuna kuwiza kwange norufuro nomukove nosilikandwiso, nye ame tani wiza koge medina lyaJehova. Naina Jehova ta ku gava mokuwoko kwange ni ku dipage.’
Ndafita ta duka a di vyuke Golyata. Ta gusa emanya mondjato zendi, ta li tura mosizugumiso sendi nokulizuguma nononkondo dendi nadinye. Emanya kwa vyukilira mosipara saGolyata, makura ta liganda ta fu! Vafilisiti apa vana mono asi mufundi gwawo ana gu, navenye tava piruka nokuduka. Vaisraeli tava va tjida nokufunda yita.