Ndafita kapi ga kere nowoma

Yisinke o rugana apa o kara nowoma?— Nampo ove kudukira konane ndi kotate woge va ku vatere. Nye pweli hena ogu na vhura kukuvatera. Age ga kara nononkondo kupitakana vantu navenye. Wa diva asi yilye?— Nhi, yige Jehova Karunga. Ngesi tatu ka lironga moBibeli kuhamena mumati gedina Ndafita. Age ga divire asi Jehova nga mu vatera nkenye apa, eyi yiyo ga dililire kukara nowoma.

Ndafita kutunda unona wendi, vakondi vendi kwa mu rongere a hare Jehova. Eyi kwa vaterere Ndafita a dire kukara nowoma apa yininke yokutjilisa ngayi mu horokere. Age ga divire asi Jehova Kaume kendi ntani nga mu vatera. Ezuva limwe, apa Ndafita ga lisire nonzwi, nyime kwa wizire nokunyangura po nzwi zimwe. Ono diva asi yisinke ga rugene Ndafita? Age kwa tjidire nyime nokukamudipaga nomawoko. Ntani apa erundu lya kwete nzwi, Ndafita kwa li dipagere. Yilye ga vaterere Ndafita?— Jehova.

Posili siruwo simwe hena Ndafita ga dilire kukara nowoma. Vaisraeli kwa rwire yita noVafilisiti. Gumwe govakwayita woVafilisiti kwa kere mugara gomunene, gomure unene. Edina lyendi Golyata. Mugara ogu nga swaura vakwayita woVaisraeli naJehova. Age nga tjilisa vakwayita woVaisraeli. Ano Vaisraeli navenye kwa kere nowoma wokumurwisa. Apa ga yi zuvhire Ndafita, ta tantere Golyata asi: ‘Tani wiza ni ya ku rwise, Jehova na vatera nge ni ku funde!’ Ndafita ga kere nowoma ndi?— Hawe, kapi ga kere nowoma. Ono hara kudiva eyi ya kweme ko ndi?

Ndafita ta gusa sizugumiso sendi notumanya tokuliudinga tutano, makura ta zi a ka rwise Golyata. Apa Golyata ga mwene mumatigona Ndafita, ta mu swaura nokumutuka. Nye Ndafita ta mu tantere asi: ‘Ove kuna kuwiza kwange norufuro, nye ame tani wiza koge medina’ lyaJehova! Ndafita makura ta tura kamanya mosizugumiso sendi, ta dukire kwaGolyata nokumuzuguma mosipara. Ano kamanya ta ka tomona Golyata mosipara. Makura ta ligandere pevhu, ta fu. Vafilisiti tau va kwata woma makura tava duka. Ngapi omu mumatigona Ndafita ga fundire mugara gomunene gomure?— Jehova yige ga mu vaterere morwa age nonkondo unene kupitakana mugara ogo!

Yisinke no lirongera ko kesimwititi lyaNdafita?— Jehova nonkondo unene kupitakana vantu navenye. Ntani age Kaume koge. Nsene ngo zuvha woma, diworoka asi Jehova kuvhura a ku vatere o dire kukara nowoma.