Egaununo 1

Nombudi dokutunda meguru

BIBELI nazinye kuna kara mbudi zokutunda meguru ezi ga tu wapaikira Guhyetu gemeguru mokuturonga. Nampili ngoso, konyara nomvhura 2 000 dina ka pita, nombudi mbali dokulikarera kwa di geve muengeli ogu nga “sikama kosipara saKarunga.” Edina lyendi Ngabiliyera. Tu zeni tu konakone maukaro gomadinguro gomulyo aga gavali gepevhu.

Azo kwa kere mvhura 3 K.S.N. Monondundu daJudeya mwa tungire mupristeli gwaJehova gedina Sakaliya, nampo kapisi ure unene naJerusarema. Nage namukadendi Elisabeta kwa kurupire. Ntani awo kapi va peke muna. Sakaliya kwa rugene yirugana yendi youpristeli montembeli zaKarunga moJerusarema porufo rwendi. Haruka ko tupu, Ngabiliyera ta moneka korulyo rosizambero sonzambo zedumba lyewa.

Sakaliya tau mu gwana woma. Nye Ngabiliyera ta mu tantere asi: “Wa ha tjira, Sakaliya, yeeyi ekanderero lyoge lina zuvhika kwaKarunga, ano mukadoge nga ku hampurukira munona gomugara, ove makura ngo mu ruke Johanesa.” Ngabiliyera ta twikire kudivisa asi Johanesa “nga kara munene kosipara saHompa” ntani “nga wapaikira Hompa vantu.”

Nampili ngoso, Sakaliya kapi ga vhulire kuyipura. Ayo kwa monekere ngwendi asi kapi tayi vhulika nage naElisabeta va kare nomuna moukurupe wawo. Ngabiliyera makura ta mu tantere asi: “Moomu ngoso, to siti ezwi, kapi ngo vhura kuuyunga dogoro nekezuva eli ngayi sika mo eyi, morwa ono nyoka kupura nonkango dange.”

Siruwo oso, vantu ava va kere ponze va tetukire eyi ya ka mu karesere mo ntaka montembeli. Eyi ga pwaga mo, kapi ga vhulire hena kuuyunga, nye kwa uyungire nawo rupuru-puru, makura awo tava diva asi age kuna ka mona emoneko.

Eyi ga pwa mazuva gendi goukereli montembeli, Sakaliya makura ta tengura kembo. Ano konyima zomazuva gomasesu tupu, Elisabeta ta kara nomarutu gavali! Siruwo esi ga ndindilire ehampuruko lyomukeke, Elisabeta ta kara membo a lipore kovantu ure womakwedi gatano.

Konyima, Ngabiliyera ta moneka hena. Nalye ga uyungire? Nomukadona gomudike gedina Mariya gomodoropa zaNasareta. Ano mbudi musinke ga twere? Ngabiliyera ta tantere Mariya asi: “Karunga ana ku fire nkenda. Tara, ove ngo kara marutu gavali, ngo hampuruka mukeke gomugara, makura ngo mu ruke Jesus.” Ngabiliyera ta gwederere ko hena asi: “Age nga kara munene, age ngava mu tumbura asi MunwaKarunga gekeguru-guru. . . . Age nga pangera rudi rwaJakopo dogoro narunye, ano uhompa wendi kapi ngau paka uhura.”

Ose tuna yi pura asi Ngabiliyera kwa lizuvhire mfumwa mokutwara nombudi edi. Ngomu tuna kuresa ko yoyinzi kuhamena Johanesa naJesus, ngatu ka mona nawa-nawa eyi da karera nomulyo nombudi edi dokutunda meguru. 2 Timoteusa 3:16; Rukasa 1:5-33.

▪ Nombudi musinke mbali domulyo da tundire meguru?

▪ Yilye ga retere nombudi edi, ntani kolye va di twere?

▪ Morwasinke da karerere nombudi edi udigu kudipura?