Egaununo 3
Muwapaiki nzira tava mu hampuruka
SIRUWO saElisabeta sokuhampuruka pepi sa kere. Mariya kwa kere nendi makwedi gatatu. Nye siruwo tasi siki sokuvarekera a tengure ko kembo koNasareta. Makwedi ntazimwe ga hupire ko nage a ka hampuruke.
Apa ga tengwire Mariya, Elisabeta makura ta hampuruka. Eh, ruhafo musi rwa kere po apa munona va mu hampurukire, yeeyi nage nozina kwa kere vawaawa! Apa Elisabeta ga likidire vamaparambo nekoro lyendi munona, makura tava ya mu hafesa ko.
Kuliza noVeta zaKarunga, mezuva lyautano-nautatu munona gomugara goMuisraeli va hepere kumurugana yovamba. Vakaume novanekoro tava wiza posilika esi va ya dingure. Awo kwa tente asi munona va mu ruke Sakaliya, edina lyoguhwe. Nye Elisabeta ta tanta asi: “Kapisi lyolyo, edina lyendi yilyo Johanesa.” Diworoka asi eli yilyo edina ga tente muengeli Ngabiliyera asi yilyo ngava ruka munona.
Nye vakwawo tava patanesa asi: “Mekoro lyoge mutupu ogu va ruka rumwe edina olyo!” Awo makura tava uyungisa oguhwe morupuru-puru va va pure asi, awo yilye ogu vana hara kumuruka. Sakaliya makura ta hundire siperende, ta tjanga po asi: “Edina lyendi yige Johanesa.” Makura navenye tava tetuka.
Poopo ngoso Sakaliya ta tameke kuuyunga hena. Diworoka asi age ga sitire ezwi apa ga dilire kupura ediviso lyomuengeli asi Elisabeta ngano nga kara nomuna. Apa ga tamekere Sakaliya kuuyunga navenye womomukunda tava tetuka nokulipura vene asi: “Munona ogu muntu musinke nga kara?”
Sakaliya kwa zulire mpepo zokupongoka, makura ta uyunga noruhafo asi: “Va mu fumadeke Hompa Karunga gwaIsraeli, yeeyi ana ya dingura muhoko gwendi a ya gu wapaikire ezoworo. Ana tu tumbire muzowoli gononkondo, age gemezimo lyomukereli gwendi Ndafita.” Ogu “muzowoli gononkondo” yige Hompa Jesus, ogu va dilire kuhampuruka simpe. Sakaliya ta uyunga asi, kupitira mwendi Karunga “nga tu popera kononkore detu, makura ngatu mu kerere twa hana utjirwe, tu kare vapongoki novahungami kosipara sendi mazuva nagenye goukaro wetu.”
Makura Sakaliya ta pumbu kuhamena munwendi Johanesa asi: “Ano ove munwange ngava ku tumbura asi muporofete gogu gekeguru-guru, yeeyi ove ngo pita komeho zaHompa, ngo mu lyalyakanesere nonzira dendi. Ngo divisa muhoko gwendi yokuhamena ezoworo nedongonono lyononzo dawo. Karunga gwetu ana tu fire nkenda pokutupumisira ezuva lyeparu, li rete uzera kwava va kara momundema nomomundwire gonomfa, a ya vyukise nompadi detu monzira zombili.”
Siruwo oso, Mariya, ogu simpe ga kere mudike, ga ka sikire kembo koNasareta. Yinke ya horokere apa lya monekere ezimo lyendi? Rukasa 1:56-80; Levitikus 12:2, 3.
▪ Makwedi gangapi va lipitire oJohanesa naJesus?
▪ Yinke ya horokere apa ga kere Johanesa nomazuva gatano-nagatatu?
▪ Ngapi omu ga dingwire Karunga vantu vendi?
▪ Yirugana musinke va pumbire eyi nga rugana Johanesa?