Egaununo 8
Tava tjwayuka mupangeli gonyanya
JOSEFA ta pindura Mariya a mu tantere mbudi zongenderera. Muengeli gwaJehova kwa monekerere Josefa ta mu tantere asi: “Pinduka, o guse munona nozina, o tjwayukire koEgipite, o ka kare nawo kooko dogoro noku ngani ka ku tantera, yeeyi Herodesa kuna kupingira a papare munona, a ya mu dipage.”
Moutatu wawo tava tjwayuka usimbu-usimbu. Herodesa ga ya nongwenene asi vakonentu kuna mu kumbagere yiyo vana zi. Diworoka asi, awo va hepere kuyamutantera oku ana kara Jesus. Makura Herodesa ta handuka unene. Mokuhetekera ko kudipaga Jesus, ta gava mpangera zokudipaga vanona wovagara womoBeterehema wonomvhura dokutundilira kwambali dogoro nokonhi zedi. Age kwa varwire nomvhura edi kuliza nonombudi edi ga gwene kovakonentu wokoUpumezuva.
Edipago lyovanonagona navenye wovagara kwa kere sininke sosidona unene! Vakwayita vaHerodesa kwa bubwire tunda embo zende embo. Nkenye apa va gwene munona gomugara, tava mu gusa ko kozina. Kapi twa divilisa asi vanona vangapi va dipagere, nye nonkali dononene dovazina kwa sikisire mo uporofete womoBibeli waJeremiya, muporofete gwaKarunga.
Posiruwo oso, oJosefa nepata lyendi va ka sikire vandjewa-ndjewa koEgipite, oko yiko va ka tungire. Nye masiku gamwe, muengeli gwaJehova ta monekere hena Josefa monzodi. Muengeli kwa tente asi: “Pinduka o guse munona nozina, o ze nawo kosirongo saIsraeli, yeeyi vena vana fu nye, ava va here kudipaga munona.” Tava tengura kosirongo sawo, ano eyi kwa sikisire mo uporofete umwe woBibeli ou wa pumbire asi MunwaKarunga ngava mu zigida a tunde mo moEgipite.
Josefa kwa here kutunga moJudeya, omu va tungire modoropa zaBeterehema komeho zokutjwayukira koEgipite. Nye ga zuvhire asi Arukerausi, munwaHerodesa gomudona, yige ana kara mo mouhompa moJudeya, ano Jehova ta mu rondora hena monzodi. Yipo nye, Josefa nepata lyendi va gendere korwaMuzogo, makura tava ka tunga modoropa zaNasareta moGalireya. Momukunda ogu yimo ga kulilire Jesus, ure nontembeli zoVajuda. Mateusa 2:13-23; Jeremiya 31:15; Hoseya 11:1.
▪ Apa vakonentu va dilire kutengura kwahompa Herodesa, yininke musinke yoyidona ga rugene, nye ngapi omu va mu poperere Jesus?
▪ Apa Josefa ga ka tengwire ko koEgipite, morwasinke ga dilire ku ka tunga hena moBeterehema?
▪ Mauporofete musinke goBibeli va sikisire mo posiruwo sina?