Egaununo 7

Jesus novakonentu wonombungururu

VAGARA vamwe va tundililire koUpumezuva. Awo kwa kere vakonentu wonombungururu, kutanta asi vantu ava ngava papara yidiviso monombungururu. Apa va kere koUpumezuva awo va mwene mbungururu zompe, makura tava zi kwama sinano sokusika po mafere dogoro koJerusarema.

Apa vakonentu va ka sikire koJerusarema tava pura asi: “Kupi ko ana kara hompa goVajuda, ogu kava hampurukire? Yeeyi ose kwa monena mbungururu zendi koUpumezuva, makura yiyo tuna wiza, tu ya mu tongamene.”

Apa ga yi zuvhire hompa Herodesa eyi, ta handuka unene. Makura age ta zigida nye vapristeli wovanene ta va pura asi kupi ko ngano ngava mu hampurukira Kristusa. Vena tava mu limburura kuliza noMatjangwa asi: “MoBeterehema.” Makura Herodesa ta zigida vakonentu ta va tantere asi: “Zendeni, mu ka pupide nawa munona ogo. Ano nsene muna ka mu gwana, ngomu divise nge ko, name ngani ze ko, ni ka mu tongamene.” Nye Herodesa kwa here kudipaga munona!

Eyi va za, tapa horoka sininke sokutetukisa. Mbungururu ezi va mwene awo koUpumezuva, zezi, kuna kuvapitisira komeho zawo. Ezi kapi za kere tupu nkenye mbungururu, nye azo kwa zi tumine mokuvapitisira. Vakonentu tava zi kwama dogoro noku za ka sikire, zi ka sikame kembo oku va kere oJosefa naMariya.

Apa vakonentu va hwililire monzugo, tava gwana Mariya namunwendi Jesus. Tava twire Jesus nongoro. Tava rongorora mauhwi gongorodo nomanganganga gokututumikidisa nomira. Konyima, apa va here kutengura nokukatantera Herodesa oku ga kere munona, Karunga ta va rondora monzodi va dire kuyirugana. Makura tava tengura kwawo nonzira zapeke.

Yilye ono kugazara ga tumine mbungururu zina za gendere meguru zi pitisire vakonentu? Dirowoka asi, mbungururu zina kapi za va pitisilire kuvyukilira moBeterehema kwaJesus. Nye azo kwa va vyukisire koJerusarema oku va ka ligwene nahompa Herodesa, ogu ga here kudipaga Jesus. Ngano Karunga kapi ga lihamekere mo mokurondora vakonentu mokudira kutantera Herodesa oku ga kere Jesus, age ngano ga mu dipagere. Satana Muzonaguli, nkore zaKarunga, ogu ga here kudipaga Jesus, yige ga ruganesere mbungururu zina mokuhetekera ko kusikisa mo sitambo sendi. Mateusa 2:1-12; Mika 5:2.

▪ Yinke ayi likida asi mbungururu zina va mwene vakonentu kapi za kere tupu nkenye mbungururu?

▪ Kupi va ka mu gwene Jesus vakonentu?

▪ Ngapi omu twa yi diva asi Satana yige ga tumine mbungururu zina mokupitisira vakonentu?