Egaununo 18

Jesus ta fumana kupitakana Johanesa

KONYIMA zoPaska zomvhura 30 S.N., Jesus novarongwa vendi kwa tundire moJerusarema. Nampili ngoso, awo kapi va tengwire komambo gawo moGalireya nye kwa zire koJudeya, oku va ka kuhwilire. Johanesa Mukuhwi nage kwa rugene sirugana esi konyara mvhura zimwe, ntani age simpe kwa kere kumwe novarongwa vendi.

Jesus mwene kapi nga kuhu, nye varongwa vendi yiwo ngava yi rugana mepitisiro lyendi. Ekuho lyawo kwa kere nontanto zokulifana neli nga rugana Johanesa, alyo kwa kere sidiviso selitezururo lyoVajuda kononzo dawo dokuteza po Veta zaKarunga zegwanekero. Nampili ngoso, konyima zevhumbuko lyendi, Jesus ga pangerere varongwa vendi mokurugana ekuho eli lya kere nontanto zokulikarera. Ekuho lyoSikriste naina kuna kara sidiviso somuntu seligawo lyendi lyokukarera Jehova Karunga.

Nye apa ga tamekere Jesus yirugana yokuzuvhisa, nage naJohanesa ngava rongo nokukuhwa ava va litezwilire, nampili ngomu va dilire kuruganena pamwe. Nye varongwa vaJohanesa kwa kere nomfudu makura tava tameke kusivana kuhamena Jesus asi: “Murongi, ko tara si, ta kuhu sa, ano navenye yiyo vana kuza kwendi.”

Mevango lyokukara nomfudu, Johanesa kwa haferere etompoko lyaJesus ntani kwa here varongwa vendi ngano va hafe. Ta va diworokesa asi: “One nyone nombangi dange deyi na tente asi, kapisi nyame Kristusa, nye ame kwa hova tupu kutuma nge komeho zendi.” Makura ta ruganesa sifanekeso sosiwa: “Yige muvandekeli ogu ga hamena mbandeki. Ano ogu ga likwata ukwawo nombandeki, nye a sikame pwendi, a mu purakene, age kuhafera unene ezwi lyomuvandekeli. Yiyo nye lina sikilire mo nye ehafo lyange.”

Johanesa, ngakaume koMuvandekeli, age kwa hefe makwedi ntazimwe ga pitire po apa ga ka likidire varongwa vendi kwaJesus. Ano vamwe mo kwa ya kere vahameni wombunga zemeguru zombandeki zaKristusa, awo Vakriste ava va gwavekere nompepo zokupongoka. Mokumona asi sitambo saJohanesa kwa kere sokuwapaikira nzira yipo sirugana sokuzuvhisa saKristusa si ya tompoke, age kwa here varongwa vendi ngano nawo va kwame Jesus. Ngomu ga yi fatwilire Johanesa Mukuhwi asi: “Age yige na nenepa po, ame ni nunupe.”

Murongwa gwaJesus gomupe Johanesa, ogu ga kere muhowo murongwa gwaJohanesa Mukuhwi, kwa tjenge kuhamena ntundiliro nosirugana saJesus somulyo mokuparura vantu asi: ‘Ogu ga tunda meguru, kwa pita navenye. Guhwe kwa hara Munwendi, yiyo ga gava yininke nayinye mepangero lyendi. Ogu a pura Muna, kukara nomwenyo gwanarunye. Nye ogu a dili kuzuvha Muna, kapi a kara nomwenyo, age ehandu lyaKarunga ali mu kerere.’

Karuwogona tupu ka pitire po kutunda apa Johanesa Mukuhwi ga uyungire kuhamena enunupo lyosirugana sendi, age kwa mu kwete hompa Herodesa. Herodesa kwa gusire Herodiyasa, mukadamumbyendi Filipusa, a kare mukadendi, ano apa ga mu tanterere Johanesa asi yirugana yendi kapi ya zira mo, Herodesa ta tura Johanesa modorongo. Apa ga yi zuvhire Jesus asi Johanesa vana mu kwata, nage novarongwa vendi tava tundu koJudeya va ze koGalireya. Johanesa 3:22–4:3; Yirugana 19:4; Mateusa 28:19; 2 Vakolinte 11:2; Marukusa 1:14; 6:17-20.

▪ Ntanto musinke ga kere nago makuho aga va rugene mepitisiro lyaJesus komeho zevhumbuko lyendi? Ntani aga va rugene konyima zevhumbuko lyendi?

▪ Ngapi omu ga yi likidire Johanesa asi esivano lyovarongwa vendi kapi lya kere nohepero?

▪ Morwasinke va mu tulilire Johanesa modorongo?