Egaununo 38

Johanesa kapi ga kere nepuro ndi?

JOHANESA Mukuhwi kwa kere modorongo ure wokusika konyara mvhura zimwe, ano age kwa gwene mbudi kuhamena evhumbuko lyomuna gomufisayendi gomoNayini. Nye Johanesa kwa here kuyilizuvhira kwaJesus mwene kuhamena eyi ya kwatererere mo eyi, yipo ga tumine ko varongwa vendi vavali va ka mu pure asi: “Ove nyove ogu asi ngo wiza ndi tu ndindire nagepeke?”

Epuro lyendi kuvhura kututetukisa, morwa Johanesa ga mwene mpepo zaKarunga kuna kuhegumukira Jesus ntani ga zuvhire ezwi lyaKarunga apa ga kuhwire Jesus konyara nomvhura mbali da pitire po. Eyi ga pulire Johanesa kuvhura kuninkisa vamwe va gazare asi age kwa fire pampepo. Nye eyi kapisi yimo. Nsene Johanesa kwa kere nomasinganyeko, Jesus ngano kapi ga fumadekere Johanesa, ngamoomu ga yi rugene posilika esi. Nye morwasinke ga pulilire Johanesa epuro lyangesi?

Johanesa nampo kwa here kudivilisa kwaJesus mwene asi yige Mesiyasa. Eyi ngano ya nkondopekere Johanesa ngomu ga heperere modorongo. Nye yinzi ya hamenene mo mepuro lyaJohanesa. Age ga here kudiva nsene pweli gumwe gwapeke nga wiza, gokuyamupinganena po ogu nga ya sikisa mo yininke nayinye eyi va pumbire kuhamena Mesiyasa.

Mokukwama mauporofete goBibeli aga ga divire Johanesa, Mugwaveka gwaKarunga ngano nga kara hompa, muzowoli. Nampili ngoso, Johanesa kwa kere simpe modorongo, ntani makwedi gomanzi ga pitire po konyima zekuho lyaJesus. Yipo nye Johanesa kwa pulire Jesus ngwendi asi: ‘Ove nyove ngo tulisa po Uhompa waKarunga mononkondo dokumoneka ndi kweli nagepeke ogu nga kupinganena mo, ogu natu vhura kundindira ogu nga ya sikisa mo mauporofete gokuhamena uyerere waMesiyasa ndi?’

Mevango lyokutantera varongwa vaJohanesa asi: ‘Yimo, ame nyame ogu nga wiza!’ Jesus ga rugene yitetu yokulikarera pokuverura vantu nomauvera gomanzi. Age makura kwa tanterere varongwa asi: “Zendeni mu ka dimbwire Johanesa eyi muna mono neyi muna zuvhu: vatwiku kuna kumona, yirema kuna kugenda, vanayingondwe kuna kuveruka, yipuru-puru kuna kuzuvha, vafe kuna kupinduka, ano vahepwe kuna kuvaudisira Mbudi zoNgwa.”

Monkango zimwe, eyi ga pulire Johanesa nampo kwa likidire asi age ga ndindilire Jesus a rugane ko yoyinzi kupitakana eyi ga rugene ntani asi nampo nokukamumangurura mounkwate. Nye nampili ngoso, Jesus kwa tanterere Johanesa asi kapisi a ndindire yoyinzi kupitakana poyitetu eyi ga rugene Jesus.

Apa va zire varongwa vaJohanesa, Jesus kwa tanterere mbunga asi Johanesa “ntumi” zaJehova ezi va pumbire mwaMarakiya 3:1 ntani hena asi age muporofete Eliya ogu va pumbire mwaMarakiya 4:5, 6. Age kwa zerwire Johanesa asi age kwa hetakana kumwe novaporofete ava va parukire komeho zendi pokufaturura asi: “Yosili nina kumutantera asi, kutupu ogu va hampuruka vakadi ga pita Johanesa Mukuhwi. Nye ogu ga nunupilire po moUntungi weguru, yige ga mu pita. Kutunda komazuva gaJohanesa Mukuhwi dogoro nokwanaina. Untungi weguru kwa hara kuuhakana nononkondo.”

Apa Jesus kwa likidire asi Johanesa kapi nga za moUhompa wemeguru, morwa ogu ga nunupire po meguru ga pita Johanesa. Johanesa ga wapaikilire nzira Jesus nye age ga fire komeho Kristusa ga ka tulire po egwanekero kumwe novarongwa vendi, mokukapangera kumwe nendi moUhompa. Eyi yiyo nye ga uyungilire Jesus asi Johanesa kapi nga za moUhompa wemeguru. Yipo nye Johanesa nga kara mupangerwa goUhompa waKarunga apa pevhu. Rukasa 7:18-30; Mateusa 11:2-15.

▪ Morwasinke Johanesa ga pulilire asi nsene Jesus yige ogu nga wiza ndi nsene kweli nagepeke ogu ngava ndindira?

▪ Mauporofete musinke ga tente Jesus aga ga sikisire moJohanesa?

▪ Morwasinke nga dilira Johanesa Mukuhwi kukakara kumwe naJesus meguru?