Egaununo 24

Eyi ga wizilire Jesus pevhu

JESUS novarongwa vendi vane apa va kere moKaperenaumu kwa viyaukire ezuva nalinye, ano vantu womoKaperenaumu kwa mu reterere vaveli vawo navenye masiku yipo a ya va verure. Kapi ga gwene siruwo sokukara gelike.

Momasasiku gezuva lyokukwama ko, Jesus ta pinduka ta pwaga monzugo gelike. Age kwa zire kevango lya hana vantu, ta ka kanderera koGuhwe. Nye Jesus kwa kere tupu karuwogona gelike, morwa apa oPeturusa novakwawo va nongwenene asi ana tundu po, awo tava zi va ka mu papare.

Apa va ka mu gwene, Peturusa ta mu tantere asi: “Vantu navenye nyove vana kupapara.” Vantu womoKaperenaumu kwa here Jesus a kare pwawo. Awo kwa yi pende eyi ga va ruganenene! Nye Jesus kwa wizilire pevhu unene po mokuyarugana maveruro gangoso goyitetu ndi? Yinke ga uyungire ko Jesus kuhamena eyi?

Kuliza noBibeli, Jesus kwa limbwilire varongwa vendi asi: “Tokweni tu zeni konomukunda dapa. Ame nyame kukavaudisira tupu nawo, yeeyi yiyo na wizira.” Nampili ngomu vantu va tumangedere Jesus asi a kare pwawo, age ga va tanterere asi: “Ame nyame tupu kukaudisira hena moyitata peke Mbudi zoNgwa zoUntungi waKarunga, yeeyi yiyo va tumina nge.”

Yimo, Jesus kwa wizilire pevhu unene po mokuzuvhisa kuhamena Uhompa waKarunga, ou ngau ka pongora edina lyaGuhwe ntani nokukakohonona po maudigu nagenye govantu. Nampili ngoso, mokugava umbangi asi age Karunga ga mu tumine, Jesus kwa rugene maveruro goyitetu. Monkedi zokulifana, nare-nare Mosesa nage kwa rugene yitetu mokulikida maumbangi asi age mukareli gwaKarunga.

Apa ga tundire Jesus moKaperenaumu a ka zuvhisire koyitata yapeke, varongwa vendi vane kwa zire kumwe nendi. Awo kwa kere oPeturusa namumbyendi Andiliyasa ntani Johanesa namumbyendi Jakopo. Diworoka asi sivike tupu sa pitire po, apa ga va zigidire Jesus mokuyakara varongwa vendi wokuhova.

Rugendo rwezuvhiso lyaJesus moGalireya kumwe novarongwa vendi vane kwa va tompokere. Ano mbudi zokuhamena yirugana yendi kwa lihanenene nomoSiliya nazinye. Mbunga zonene za tundire koGalireya nokoJudeya ntani nemesinya mwina lyomukuro gwaJorodana kwa kweme Jesus novarongwa vendi. Marukusa 1:35-39; Rukasa 4:42, 43; Mateusa 4:23-25; Exodus 4:1-9, 30, 31.

▪ Yinke ya horokere ngurangura konyima zokuviyauka ezuva nalinye Jesus moKaperenaumu?

▪ Morwasinke va mu tuminine Jesus pevhu, ntani sitambo musinke nga ruganene yitetu?

▪ Wolye va zire naJesus morugendo rwendi rwezuvhiso moGalireya, ntani yitundwamo musinke ya kere yosirugana sendi?