Egaununo 16
Kupakera upampi ukareli waJehova
VAMUMBYA vaJesus kwa kere oJakopo naJosefa naSimoni ntani naJudasa. Komeho Jesus novamumbya vendi novarongwa vendi ntani nozina va ze koKaperenaumu, sitata esi sa kara pepi nEkurudiva lyaGalireya, kwa pitire tanko pembo lyawo moNasareta yipo va rongere yininke eyi va hepere.
Nye morwasinke ga zililire Jesus koKaperenaumu mevango lyokutwikira yirugana yendi yokuzuvhisa moKana, ndi moNasareta, ndi komavango nagopeke monondundu daGalireya? Konda zimwe kuna kara asi Kaperenaumu kwa kere sitata sosinene esi sa fumanene. Ntani hena sinzi sovarongwa wovape vaJesus kwa tungire moKaperenaumu ndi pepi naso, yipo nye ngano kapi va hepere kusiga mambo gawo va ka gwane edeuro kwendi.
Apa ga kere moKaperenaumu, Jesus kwa rugene yirugana yoyitetu, ngomu ga ya yi uyungire mwene konyima zomakwedi gongandi. Nye konyima zokaruwogona, Jesus novakwawo tava tameke rugendo rwawo rokuza koJerusarema mokukakara poPaska zomo-30 S.N. Ano, moJerusarema, varongwa vendi kwa mwene yimwe kuhamena Jesus eyi nampo va dira kumona rumwe.
Kuliza noVeta zaKarunga, Vaisraeli va hepere kuzamba nonzambo doyikorama. Mokuvarerupa, varandesi womoJerusarema ngava randesa yikorama noyidira nositambo esi. Nye awo ngava randesere montembeli, ntani awo ngava fukire vantu pokuvarandesa ndiro.
Nenyegenyo lyenene, Jesus ta poho ngora zonongodi makura ta tjida mo varandesi. Age kwa wayagwire yimaliwa yovasinti pevhu, nokugandanga yitafura yawo. Makura ta tantere varandesi wononkutji asi: “Tuteni mo yininke eyi. Nzugo zaTate mwa ha zi paka asi zi kare sirandesero.”
Apa va yi mwene varongwa vaJesus, tava diworoka uporofete wokuhamena MunwaKarunga asi: “Kupakera mupampi nzugo zoge kwa kora nge.” Nye Vajuda tava mu pura asi: “Sidiviso musinke no tu likidisa nonkondo edi ono kuruganesa yininke eyi?” Jesus ta va limburura asi: “Zungurureni ntembeli ezi, nye ame ngani zi tunga hena momazuva gatatu.”
Vajuda kwa gazarere asi Jesus kwa uyungire kuhamena ntembeli zomoJerusarema, makura tava mu pura asi: “Ntembeli ezi kwa zi tunga ure wonomumvho nomurongo ne nantano-nazimwe, ove nye yiyo ono kutanta asi ngo zi tunga mazuva gatatu?” Nye, Jesus kwa uyungire kuhamena ntembeli zorutu rwendi. Ano konyima zonomvhura ntatu, varongwa vendi tava diworoka eyi ga uyungire apa ga ya vhumbukire koufe. Johanesa 2:12-22; Mateusa 13:55; Rukasa 4:23.
▪ Konyima zosipito sononkwara moKana, komavango musinke ga zire Jesus?
▪ Morwasinke ga nyegenyenene Jesus, ntani yisinke ga rugene?
▪ Pokumona eyi ga rugene Jesus, yisinke va diworokere varongwa vendi?
▪ Yisinke ga uyungire Jesus kuhamena “ntembeli ezi,” ntani yisinke ga tembe?