Egaununo 29

Jesus ta rugana yirugana yoyiwa mEsabata

AKO kwa kere kwedi kwaNisani mo-31 S.N. Apo kwa pitire po makwedi gongandi kutunda pena ga uyungire Jesus nomukadi goMusamaliya pondjombo, apa ga tundilire koJudeya a ze koGalireya.

Konyima zokuzuvhisira unene moGalireya, Jesus ta zi hena koJudeya, omu ga ka zuvhisilire monosinagoge. Nsene o hetakanesa neyi za uyunga ko Bibeli kuhamena sirugana sendi moGalireya, azo kwa uyunga ko yoyisesu kuhamena sirugana sendi moJudeya medinguro eli ntani nomomakwedi aga ga ka kere po konyima zoPaska. Ayo kwa moneka asi vantu kapi va tambwire sirugana sendi moJudeya ngwendi moomu va si tambwire moGalireya.

Konyima, Jesus kwa zire konkurusitata saJudeya, Jerusarema, koPaska mo-31 S.N. Pepi nEvero lyoNonzwi pwa kere sidiva sedina Betesita, oku ngazi zi mbunga zonene zovaveli novatwiku noyirema. Awo kwa pulire asi vantu kuvhura kuveruka pokuza momema gomosidiva apa ngaga ligumagura.

Alyo kwa kere Esabata, makura Jesus ta mono mugara posidiva ogu ga verere nomvhura 38. Jesus, mokudiva siruwo esi ga verere mugara ogu, ta mu pura asi: “Ono hara kuveruka ndi?”

Age ta limburura Jesus asi: “Tate, ani kutupu ogu gokutwara nge mosidiva pokuligumagura mema. Eyi nani ninka asi ni ze mo, muntu gumwe nare ana howo kuza mo.”

Jesus ta mu tantere asi: “Katuka, damuna uro woge, o gende.” Poopo ngoso mugara makura nare ana veruka, ta damuna uro wendi a gende!

Nye apa Vajuda va mwene mugara tava tanta asi: “Naina Esabata, Veta kapi za gava asi o simbe uro woge.”

Mugara ta va limburura asi: “Ogu ana verura nge, yige ana tantere nge asi, ‘Damuna uro woge, o gende.’”

Awo tava mu pura asi: “Yilye nye mwene ogu mugara ana ku tantere asi, ‘Damuna uro woge, o gende’?” Jesus kwa livindukire kutunda po, morwa mbunga zonene za kere po, ano mugara ogu ga verwire, kapi ga divire edina lyaJesus. Nampili ngoso, konyima, Jesus ta ka ligwana nomugara montembeli, makura mugara ta diva asi yilye ga mu verwire.

Mugara makura ta zi a ka sansekere Vajuda asi Jesus ga mu verwire. Apa va yi zuvhire eyi, Vajuda tava zi kwaJesus. Nokonda musinke? Mokukadiva asi mononkondo musinke ga vhulire kurugana yininke eyi yokutetukisa ndi? Hawe. Nye mokukamupa usima morwa ga rugene yininke eyi yoyiwa mEsabata. Makura tava tameke kuhepeka Jesus! Rukasa 4:44; Johanesa 5:1-16.

▪ Siruwoke ga hulire Jesus kukadingura Judeya?

▪ Morwasinke sa divikwilire sidiva esi ngava tumbura asi Betesita?

▪ Sitetu musinke ga rugene Jesus posidiva, ntani ngapi omu va yi tere Vajuda?