Egaununo 26
Jesus ta tengura kembo koKaperenaumu
JESUS kwa fumanene nakunye, ntani vantu ngava tundilire koure va wize oku ga kere komavango gomaporeza. Nye, kapi pwa pitire mazuva, makura ta tengura koKaperenaumu kEkurudiva lyaGalireya. Mbudi kwa lihanene usimbu mositata asi ana ka tengura, makura wovanzi tava wiza pembo apa ga kere. Vafalisayi novalirongi womatjangwa kwa tundilire koure nokoJerusarema kooku.
Mbunga kwa kere zonene azo kwa sitikire evero, ntani kapi pwa kere mpito zokuhwilira monda. Makura tapa horoka sihorokwa sokutetukisa. Eyi ya horokere posilika esi kwa kara yomulyo unene, morwa ayo kutuvatera tu kwate egano asi Jesus kwa kara nononkondo dokugusa po eyi ayi retesa po ruhepo rovantu ntani nokuverura navenye ava ga horowora.
Haga za Jesus mokuronga mbunga zovantu, tapa wiza vagara vane va simbire sirema somondambo pouro. Awo kwa here Jesus a verure mukwawo, nye morwa mbunga zovantu, kapi va vhulire kuhwilira monda. Ya va guvisire, nye kapi va hagekere poopo. Awo kwa rondere pombando zonzugo tava zi tomona makura tava mu hegumuna muntu gosirema pouro poyiha apa ga kere Jesus.
Jesus ga handukire morwa va mu donganesere ndi? Hawe! Age kwa mu tetukisire epuro lyawo. Ta tantere sirema asi: “Nonzo doge vana di ku dongwenene po.” Kuvhura Jesus kudongwenena po nonzo ndi? Valirongi womatjangwa noVafalisayi kapi va yi pulire. Awo tava lipulire monomutjima dawo asi: “Eyi ana kuuyungira ngesi ogu mugara a swaure Karunga, hena yisinke? Nagumwe si a vhuru kudongonona po nonzo, ntudi Karunga googo!”
Jesus pokunongonona magazaro gawo, ta va pura asi: “Yisinke muna kugazarera yininke yangesi? Yoyireru po nani yisinke? Yokutantera ogu sirema asi, ‘Nonzo doge vana di ku dongwenenene po,’ ndi yokutanta asi, ‘Katuka, o damune uro woge, o gende’?”
Makura Jesus ta pulisire emukurumbunga, kukwatera mo novapatanesi vendi, va mone elikido lyokutetukisa eli lya horwere asi ga kara nononkondo dokudongwenena po nonzo pevhu ntani asi age sili muntu gomulyo po ogu ga parukire pevhu. Makura ta tantere sirema asi: “Katuka, o damune uro woge, o ze kembo!” Naruvali si nare ana katuka, ta damuna uro wendi, ta hakauka moyitarameho yanavenye. Navenye kwa tetukire unene, tava tanga Karunga, tava uyunga asi: “Ose ha twa kara kumona sininke sangesi.”
Ono nongonona asi Jesus kwa tumbwire nonzo kumwe nomauvera ntani asi edongwenenopo lyononzo kwa likwatakana kumwe nokukara noukanguki ndi? Bibeli kufaturura asi mukurona gwetu gokuhova, Adamu, kwa zonene makura natuvenye kwa pinga yitundwamo yononzo dina, ayo kuna kara mauvera nonomfa. Nye mepangero lyoUhompa waKarunga, Jesus nga ka dongwenena po nonzo danavenye ava va hara Karunga nokumukarera, ano mauvera nagenye ngava ga gusa po. Uwa musi ngau ka kara! Marukusa 2:1-12; Rukasa 5:17-26; Mateusa 9:1-8; Varoma 5:12, 17-19.
▪ Ukaro musinke wa kere po posihorokwa sokutetukisa?
▪ Ngapi omu sa ka sikire sirema kwaJesus?
▪ Morwasinke twa karera natuvenye vananzo, nye ngapi omu ga geve Jesus ehuguvaro asi edongononopo lyononzo detu ntani noukanguki ayo kuvhulika?