Yilye ga kere Johanesa Mukuhwi?
Eyi za uyunga ko Bibeli
Johanesa Mukuhwi kwa kere muporofete gwaKarunga. (Rukasa 1:76) Kwa mu hampurukire komeho Jesus va mu hampuruke. Karunga kwa mu pere situmbukira sokuwapaika nzira zaMesiyasa ndi Kristusa. Johanesa kwa yi rugene eyi pokuzuvhisa mbudi zaKarunga koVajuda vakwawo yipo va li tezurure.—Marukusa 1:1-4; Rukasa 1:13, 16, 17.
Mbudi ezi nga udisa Johanesa za vaterere vapurakeni va dimburure Jesus goMunasareta asi yige Mesiyasa getumbwidiro. (Mateusa 11:10) Johanesa kwa korangedere vapurakeni vendi va litezurure nokulikida elitezururo lyawo kupitira mekuho. (Rukasa 3:3-6) Morwa nga kuhu vantu wovanzi, Johanesa ku mu tumbura asi Mukuhwi. Ekuho lyomulyo po eli ga rugene Johanesa kuna kara lyaJesus.a—Marukusa 1:9.
Eyi ya hamene mosirongwa esi
Yisinke ya ninkisire Johanesa Mukuhwi a lisige?
Yirugana eyi ga rugene kwa yi pumbire: Kupitira moyirugana yendi yokuzuvhisa, Johanesa kwa sikisire mo uporofete kuhamena ntumi zaJehova. (Marakiya 3:1; Mateusa 3:1-3) Age kwa likidire asi yige va pumba ‘nga ninka vantu va kare nonondunge’ kutanta asi, age kwa vaterere Vajuda vakwawo va tambure mbudi zaJehova kupitira momukareli po gwendi Jesus Kristusa.—Rukasa 1:17.
Eyi ga sikisire mo Johanesa meparu lyendi: Jesus kwa uyungire asi: “Kutupu ogu va hampuruka ga pita Johanesa Mukuhwi, nye ogu ga nunupa po moUhompa wemeguru, yige ga mu pita.” (Mateusa 11:11) Morwa Johanesa kapi tupu ga kere muporofete, age kwa kere hena ntumi ezi va pumbire, yipo nye kwato mukareli gwaKarunga ogu ga parukire komeho zendi ogu ga mu pitire. Nonkango daJesus kulikida hena asi Johanesa kapi nga kara hompa moUhompa waKarunga.b Muporofete ogu gomulimburukwi kwa fire komeho Jesus a tulise po mpito zokukaparukira meguru. (Vahebeli 10:19, 20) Johanesa nga kara mepangero lyoUhompa waKarunga pevhu ntani age nga paruka narunye moparadisa.—Episarome 37:29; Rukasa 23:43.
Wolye va kere vakondi vaJohanesa Mukuhwi?
Vakondi vaJohanesa kwa kere Sakaliya naElisabeta. Sakaliya kwa kere mupristeli goMujuda. Ehampuruko lyaJohanesa kwa kere lyositetu morwa ozina kwa kere nganze ndi kapi ngava reta ntani awo “kwa kurupire unene.”—Rukasa 1:5-7, 13.
Yilye ga retesere po nomfa daJohanesa Mukuhwi?
Hompa Herodesa Antipasi yige ga dipagesere Johanesa. Age kwa yi rugene eyi apa mukadendi Herodiyasa ga hundililire po munendi gomukadona. Herodiyasa kwa nyengere Johanesa morwa kwa tanterere Herodesa asi age kwa lininkisire asi Mujuda ntani asi nonkwara daHerodesa kapi da kere dopaveta kuliza noveta zoVajuda.—Mateusa 14:1-12; Marukusa 6:16-19.
Johanesa Mukuhwi ntani naJesus ngava lirwanesa ndi?
Bibeli kapi za kwatesa ko egano olyo asi awo ngava lirwanesa. (Johanesa 3:25-30) Johanesa mwene ga yi uyungire asi aso kwa kere situmbukira sendi sokuwapaikira nzira Mesiyasa, nye kapisi sokurumbasana nage. Johanesa kwa tente asi: “Ame kwa wizira ni ya kuhwe nomema yipo a ya divikwe koVaisraeli.” Ntani age kwa gwederere ko asi: “Ogu yige MunwaKarunga.” (Johanesa 1:26-34) Johanesa kwa hefe pokuzuvha omu Jesus yina ku mu tompoka mokuzuvhisa.
a Jesus “kapi ga tulire nzo.” (1 Peturusa 2:21, 22) Age kapi va mu kuhwire yipo a litezurure nye age kwa ligeve mwene mokurugana mpango zaKarunga. Eyi kwa kwatera mo apa ga geve eparu lyendi mwarwetu.—Vahebeli 10:7-10.
b Tara sirongwa “Yilye a zi meguru?”