Egaununo 43

Jesus ta rongo noyifanekeso

JESUS kwa kere moKaperenaumu apa ga nyokerere Vafalisayi. Ezuva olyo Jesus kwa pwagere monzugo, ta gendi pepi nEkurudiva lyaGalireya, oku lya pongere ekurumbunga lyovantu. Yipo nye ga peramene mowato, nokuusura makura ta tameke kuronga vantu konontere dezenga kuhamena Uhompa wemeguru. Age kwa va rongere kupitira moyifanekeso, nkenye esi kuliza neyi va diva nare vantu.

Pomuhowo, Jesus kwa tente kuhamena mukuni ogu ga kunine mbuto. Mbuto zimwe tazi gwire ponzira, makura yidira tayi zi li po nu. Ano nkwawo zimwe tazi gwire poyingurumanya. Morwakupira nondandani, makura tazi kukuta. Simpe mbuto nkwawo tazi gwire momega makura tazi fu musine. Moruhura, ezi zimwe yizo nye za gwililire pevhu lyewa, tazi reta nondanda efere, ezi zimwe nomurongo ntano-nazimwe ano ezi zimwe nomurongo ntatu.

Mosifanekeso sapeke, Jesus kwa hetakanesere Uhompa waKarunga komuntu, ogu ga kunine mbuto. Makura ta rara, ta pinduka, masiku nomutenya, azo mbuto kuna kukura. A dive ko nye omu ayi gendi, mpaga. Apa za pire mbuto, ta tameke kuteza.

Jesus ta tanta sifanekeso sautatu kuhamena mugara ogu ga kunine mbuto zongwa, “ano vantu eyi va rara,” gonkore zendi makura ta wiza, ta ya kunu mau moyilya. Vakareli vendi tava mu pura asi nsene asi va ka ga pongaike mau. Age ta limburura asi: ‘Hawe, apa nomu ka dura mo wayi, neisi nomu ka dulilira noyilya. Yi sigeni tupu, yi kulire simwe dogoro nokokuteza-teza, ntani ngani tantera vatezi mokuhova tanko kupongaika mau va ga hwike ano yilya nkumwe va yi tware koutara.’

Mokutwikira nzogera zendi kumwe nemukurumbunga kezenga, Jesus ta gava hena yifanekeso yivali. Age kwa fatwilire asi: “Untungi weguru” kwa lifana nombuto, ezi ga kunine muntu. Nampili ngomu mbuto za nunupa po unene ponombuto nadinye, azo kukura, kupitakana yimeno nayinye. Azo kuyakara sitjiitji, oku yidira ayi wiza, yi ya tunge yikorogo monomutayi daso. Jesus kwa fanekesere kuhamena ekuro lyenene ano mbunga za yi kwete nawa-nawa egano.

Moruhura Jesus ta fanekesa “Untungi weguru” kohingo ezi ga gusire mukadi, ta zi paka momahemere gatatu gousura. Eyi pwa pita siruwo, hingo tazi hahesa usura mudima.

Konyima zokugava yifanekeso eyi yitano, Jesus ta rekere mbunga, makura ta zi nye kembo. Ano vapositoli vendi 12 ntani nava vapeke tava mu wizire.

Kugwanena mo uwa moyifanekeso yaJesus

Apa varongwa va wizire kwaJesus konyima zosiuyungwa sendi kemukurumbunga kezenga, awo kwa tetukire kondongeseso zendi zompe. Awo nare va mu zuvha ta ruganesa yifanekeso, nye kapisi momunene. Makura tava mu pura asi: “Morwasinke ono kuvauyungilira moyifanekeso?”

Konda zimwe kuna kara mokusikisa mo nonkango domuporofete asi: “Ame ngani zahura kana kange moyifanekeso, ngani uyunga yininke eyi ya horama kutunda petameko lyouzuni.” Nye yinzi ya hamena mo. Age kwa ruganesere yifanekeso nositambo sokuhorora eyi ya kara monomutjima dovantu.

Sinzi sovantu kapi va here kukarera Jesus ngaHompa nokumukwama, nye awo kwa mu here morwa age kwa kere musimwitili gomasanseko ntani murugani goyitetu. Kapi va here kuvadonganesa monkedi omu ava tara yininke ntani nomomparukiso zawo. Awo kapi va here mbudi zi ka va gume komutjima.

Makura Jesus ta tanta asi: ‘Yipo nye nina kuvauyungilira moyifanekeso, yeeyi awo nampili va tare, nye ngwendi kapi vana kumona, va zuvhe, nye ngwendi kapi vana kuzuvha va yi kwate egano. Awo yiwo lya tamba epumbo lyaJesaya, li sike mo asi: Nomutjima domuhoko ogu nonkukutu.’

Jesus ta twikire kuuyunga asi: “Meho geni kwa ragopa morwa taga mono, ano ga kare matwi geni, nago kwa ragopa, morwa taga zuvhu. Yosili nina kumutantera asi, vaporofete novahungami wovanzi kwa here kumona eyi muna kumona, nye kapi va yi mwene, awo kwa here kuzuvha eyi muna kuzuvha, nye kapi va yi zuvhire.”

Yosili, vapositoli 12 ntani ava va kere kumwe nawo kwa kere nonomutjima donongwa. Yipo nye ga uyungire Jesus asi: “Yeeyi one kwa yi mu pa yokukwata egano yihoramo yoUntungi weguru, nye awo kapi va yi va pa.” Morwa eharo lyawo lyokukwata egano, Jesus ta fatwilire varongwa vendi kuhamena sifanekeso somukuni.

Jesus ta tanta asi: “Mbuto yido nonkango daKarunga,” ano evhu mutjima. Ta faturura asi mbuto ezi za gwililire konontere donzira “Mudona ta ya di hakana mo nonkango monomutjima dawo, asi va ha pura ngava dire kuparuka.”

Ano ezi za gwililire pomamanya kuna tamba konomutjima dovantu ava ava zuvhu nonkango, nare vana di tambura nehafo. Nye morwa nonkango kutupu nondandani monomutjima dawo, vantu ava kapi ava kara po posiruwo somaheteko ndi somahepeko.

Jesus ta twikire asi mbuto ezi za gwililire momega, kuna tamba vantu ava ava zuvhu nonkango. Nye vantu ava kuvakoka sinka souzuni ou neyivayiwo lyemona noyilihafeso, makura tayi va dipagere nsine ntani kapi tava kuru.

Moruhura, Jesus ta tanta asi edi da gwililire mevhu lyewa, vava ava zuvhu nonkango, makura tava pungura nonkango momutjima gomuwa gokulimburukwa makura tava reta nombuto nedidimiko.

Yosili varongwa ava va paparere Jesus mokugwana efatururo lyomarongo gendi va va tungikire! Jesus kwa here asi yifanekeso eyi va yi kwate egano yipo va vhure kukatantera ko wopeke usili ou. Jesus ta tanta asi: “Nagumwe si ogu a hwameke ramba makura a zi swike yuma ndi a zi ture konhi zouro. Nani nye kuzitura pontunda.” Jesus ta gwederere ko asi: “Omu takamese mokupurakena kweni.”

Kwa va tungikire nerongo lyenzi

Jesus konyima zokufatwilira varongwa vendi kuhamena sifanekeso somukuni, awo va here simpe kudiva ko yoyinzi. Tava mu pura asi: “Tu fwatwira nye sifanekeso somau gemepya.”

Nkareso zovarongwa kwa lisigire nezi zemukurumbunga lina lya kere kezenga. Vantu vena kapi va kere neharo lyokulironga eyi ya tente yifanekeso, awo kwa va gwanene po tupu nonkango dayo. Jesus mokuhangura emukurumbunga eli lya kere kezenga kumwe novarongwa vendi ava va mu wizilire pembo ava va here kudiva ko yoyinzi ta tanta asi:

“Heteko ezi omu hetekesa, none yizo ngava mu hetekera, makura ngava mu gwederera ko hena.” Varongwa kwa geve yoyinzi kwaJesus pokulitura mo mwendi paapa va hulira, yipo nye ga va tungikire nerongo lyenzi. Jesus mokulimburura epuro lyovarongwa vendi ta faturura asi:

“MunwaMuntu yige mukuni gombuto zongwa. Epya ko lyene yiwo uzuni ou. Mbuto zongwa yiwo ava va hamena Untungi weguru. Ano mau yiwo ava va hamena Mudona. Gonkore ogu ga ya kunine mo mau, Muzonaguli, muzangu uhura wouzuni, ano vatezi yiwo vaengeli.”

Konyima zokufaturura nkenye ruha rosifanekeso sendi, makura Jesus ta singonona yitundwamo. Age kwa uyungire asi pouhura wouzuni vatezi ndi vaengeli ngava hangura mau ndi ava ava lininkisa asi Vakriste va va guse ko kwava ‘va hamena untungi.’ Ano ava ‘va hamena Mudona’ ngava va zonagura po, nye “vahungami” ava va hamena koUhompa waKarunga, ngava paime ngwendi ezuva moUhompa waGuhyawo.

Jesus ta tantere varongwa vendi yifanekeso yitatu hena. Ta tanta asi: “Untungi weguru kwa lifana nougawo ou wa horama mepya. Mugara gumwe ga u gwene, ta u horeke. Morwoyo ta zi nehafo a ka randese nayinye eyi ga wekere, ta ya randesesa ko epya olyo.”

Ta twikire ko asi: “Untungi weguru kwa lifana hena nomurandi, ogu a papara nombamba donongwa. Eyi na gwana mbamba zimwe zomulyo gomunene, ta zi ta ka randesa emona lyendi nalinye, ta ya zi randa po.”

Jesus mwene kwa fene ngwendi mugara ogu ga gwene ungawo wa horama ntani nomurandi ogu ga gwene mbamba zomulyo gomunene. Age kwa randesere nayinye, pokusiga ukaro wendi wokuzeruka meguru, a nunupe nokuyakara muntu. Apa ga ya kere muntu pevhu, age kwa ligwanekerere nomaswauro nomahepeko, ano eyi kwa likidire asi ga waperere mokukara Mupangeli goUhompa waKarunga.

Etokoro kuna kara nye kovasikuli vaJesus mokurandesa nayinye yipo va ka gwane matungiko gomanene meguru pokukapangera naKristusa ndi pevhu ngovapangerwa woUhompa. Nose ngatu gazadara ko mokulihameka moUhompa waKarunga asi mulyo unene ngwendi ungawo ndi mbamba zomulyo kupitakana nkenye eyi meparu ndi?

Moruhura, Jesus ta fanekesa “Utungi weguru,” kekwe eli va tegere lya kwete nkenye rudi romfi. Nomfi donongwa kwa di horowere moyipako, ano donondona tava di zugumine kwina. Jesus ta tanta asi yimo ngorooro ngayi kara pouhura wouzuni vaengeli ngava wiza, tava ya hangura wovadona kovahungami, nokupungwira wovadona kezonauko.

Jesus mwene ga tamekere nosirugana esi sokukwata nomfi, yipo ga zigidire varongwa vendi wokuhova va kare “vakwati wovantu.” Mepitisiro lyovaengeli, sirugana sokukwata nomfi kwa twikilire dogoro posiruwo sokukoka “ekwe.” Alyo kufanekesa sirugana sokuzuvhisa Uhompa esi asi pongaike nomfi dankenye rudi.

Nampili ngomu nomfi donondona ngava di zugimina mezonauko, tu kare norupandu asi ‘nomfi donongwa’ kuna kudipungura. Mokulikida eharo lyokulifana eli va likidire varongwa vaJesus lyokuhara kugwana ediwo nokukwata egano yininke, kapi tupu ngava tu tungika nerongo lyenzi nye hena nomwenyo gwanarunye. Mateusa 13:1-52; Marukusa 4:1-34; Rukasa 8:4-18; Episarome 78:2; Jesaya 6:9, 10.

▪ Siruwoke ntani nakupi ga uyungire Jesus nemukurumbunga kuhamena yifanekeso?

▪ Yifanekeso musinke yitano ga tanterere Jesus emukurumbunga?

▪ Yisinke sa fanekesere sifanekeso saJesus sokuhamena mbuto zonunu?

▪ Morwasinke ga uyungilire Jesus moyifanekeso?

▪ Ngapi omu varongwa vaJesus va yi likidire asi awo va lisiga nemukurumbunga?

▪ Efatururo musinke ga geve Jesus kuhamena sifanekeso somukuni?

▪ Ngapi omu varongwa va lisigire nemukurumbunga kezenga?

▪ Yilye ndi yisinke ya fanekesa mukuni, epya, mbuto zongwa, munankore, muzangu ntani vatezi?

▪ Yifanekeso musinke yitatu yokugwederera ko ga geve Jesus, ntani yinke natu vhura kulirongera ko kwayo?