Egaununo 48

Jesus ta tundu kembo lyaJairusa nokukadingura hena Nasareta

KUTUNDILIRA korugendo rokoDekapolisi nokuverura mukadi goruhonde ntani nokupindura koufe munwaJairusa, alyo kwa kere ezuva lyoyiviyauka kwaJesus. Nye kapisi yipo ya hagerere poopo. Apa ga tundire Jesus pembo lyaJairusa a ze, vatwiku vavali makura tava mu kwama, tava zigire asi: “MunwaNdafita, tu fira nkenda!”

Pokutumbura Jesus asi “MunwaNdafita,” vagara ava kwa likidire epuro lyawo asi Jesus yige mupingwa gouhompa waNdafita, yipo nye age yige Mesiyasa getumbwidiro. Nampili ngoso, Jesus ta va ncenuna, nampo mokuheteka elituromo lyawo. Nye awo kapi va hagekere. Awo tava kwama Jesus oku ga kere ano apa ga ka hwilira monzugo, vatwiku tava mu kwama monda.

Jesus makura ta va pura asi: “Muna pura asi ame kuvhura kuyirugana ndi?”

Vena tava mu limburura nehuguvaro asi: “Nhi, Hompa.”

Makura Jesus ta va kwatadara pomeho gawo, oku ta uyunga asi: “Yi mu horokere moomu muna yi pulire.” Naruvali si, meho gawo makura taga mahuka! Jesus makura ta va ngongomekeda unene asi: “Takameseni, mwa ha yi zigauka kovantu.” Nye morwa ruhafo, tava ncenuna mpangera zaJesus, tava zi tava ka mu divisa mwa za sirongo mudima.

Eyi va tunda po vagara ava va ze, makura vantu tava retere Jesus sipuru-puru esi sa kere nompepo zondona. Jesus ta tjida mo mpepo zondona, makura sipuru-puru tasi tameke kuuyunga. Mbunga tazi tetuka, tazi tanta asi: “Yangesi ha twa kara, simpe kapi twa yi mona mo rumwe moIsraeli.”

Vafalisayi nawo yipo va kere. Kapi va vhulire kupatana yitetu eyi, nye mokudira kupura kwawo awo tava ruguruka kurundira ntundiliro zononkondo doyirugana yaJesus pokutanta asi: “Age nononkondo domupangeli gwado a tjidisa mo nompepo donondona.”

Konyima tupu zoyihorokwa eyi, Jesus ta tengura ta zi kositata sekuliro lyendi, Nasareta, ano varongwa vendi tava mu kwama. Kwa pitire po mvhura apa ga ka dingwire sinagoge zamo nokurongera mo. Nampili ngomu pomuhowo vantu kwa tetukire nonkango dendi, konyima kwa handukire komarongo gendi nokuheteka kumudipaga. Nye morwa nkenda, Jesus ta hetekere ko hena mokuvatera vamaparambo vendi vanare.

Komavango gapeke vantu ngava gogomokere kwaJesus, nye moNasareta kapi ngava wiza kwendi. Makura mEsabata ta zi monosinagoge a ka ronge. Sinzi sava va mu zuvhire, kwa tetukire. Tava pura asi: “Oku ga u gwana ukonentu ou nononkondo dokurugana yitetu hena kupi? Nani kapisi munwamuhongi goyikungu? Nani zina kapisi Mariya? Va kare vamumbya vendi nani kapisi oJakopo naJosefa naSimoni naJudasa? Nani vampanza vendi kapisi vaava twa kara nawo? Oku ga gwana nye yininke nayinye eyi kupi ko nye?”

Awo tava tede asi: ‘Jesus age muntu ngwendi nyose tupu. Twa mu mwene omu ga kulire ntani twa diva vekoro lyendi. Ngapi omu na vhura kukara Mesiyasa?’ Nampili omu va mwene unongo wendi wounene noyitetu yendi, awo va mu nyokere. Morwa kumudiva unene, nampili ekoro lyendi kapi va mu pulire, makura Jesus ta tanta asi: “Muporofete kapi ava mu paya, ntudi mositata soundambo nemekoro nemembo lyawo.”

Jesus ga tetukire kudira kupura kwawo. Opo kapi ga vhulire hena kuruganena po sitetu nampili simwe, ntudi yooyo yokukambeka vaveli vamwe mawoko va veruke. Mateusa 9:27-34; 13:54-58; Marukusa 6:1-6; Jesaya 9:7.

▪ Pokutumbura Jesus asi “MunwaNdafita,” yinke va likidire vagara wovatwiku eyi va pulire?

▪ Efatururo musinke va kere nalyo Vafalisayi kuhamena yitetu yaJesus?

▪ Morwasinke za karerere nkenda kwaJesus mokutengura a ka vatere vantu womoNasareta?

▪ Ngapi omu Jesus va mu tambwire moNasareta ntani morwasinke?