Egaununo 35

Ose kuvhura kupinduka koufe!

NSENE ngatu fa, Karunga nga hara kutuvhumbura ndi?— Mugara gomuwa Joba ga yi pulire asi Karunga ga kara neharo lyokuyirugana. Yipo nye, apa Joba ga lizuvhire asi ana hara kufa, age kwa tanterere Karunga asi: “Ngo zigide nge, ame ngani ku limburure.” Joba kwa tente asi Jehova Karunga nga mu hafera, ndi nga kara neharo lyenene lyokumuvhumbura.—Joba 14:14, 15.

Jesus kwa fana ngwendi oGuhwe, Jehova Karunga. Jesus kuna hara kutuvatera. Apa mugara ogu ga verere yingondwe ga mu hundilire asi ‘sinene o yi panga, kuvhura kuverura nge,’ Jesus ta mu limburura asi: ‘Nina yi panga.’ Age makura ta verura mugara gwina goyingondwe.—Marukusa 1:40-42.

Jesus kwa lirongerere ko koGuhwe mokuhara vanona. Nare-nare poyihorokwa yivali, Jehova kwa ruganesere vakareli vendi mokuvhumbura vanonagona. Eliya kwa hundilire Jehova mokuvhumbura muna gomukadi ogu ga tekwire nawa Eliya. Ano Jehova ga yi rugene. Jehova ga ruganesere hena mukareli gwendi Elisa mokupindura mumatigona.—1 Vahompa 17:17-24; 2 Vahompa 4:32-37.

Ayo nani kapi ayi kuhafesa pokudiva asi Jehova ga tu hara unene ndi?— Age kapi a tu diworoka tupu apa tuna kuparuka. Age kutudiworoka hena nampili tuna fu. Jesus kwa tente asi oGuhwe kumona vantu vangoso ngwendi kuna kuparuka nampili awo kuna fu! (Rukasa 20:38) Bibeli kutanta asi ‘nonomfa si deedi nomwenyo si noyininke si yantani neyi si yokomeho ngayi tu gusa mo meharo lyaKarunga.’—Varoma 8:38, 39.

Apa ga kere Jesus pevhu, age ga yi likidire asi Jehova kufira sinka vanonagona. Ove kuvhura o diworoke asi Jesus kwa litulilire po siruwo mokuuyunga novanona kuhamena Karunga. Ove wa yi diva asi Karunga kwa pa Jesus nonkondo dokuvhumbura vanonagona ndi?— Tu ze si tu zogere kuhamena apa Jesus ga vhumbwire munwaJairusa gomukadona gonomvhura 12.

Jairusa kwa tungire pepi nEkurudiva lyaGalireya kumwe namukadendi ntani namunwawo gelike a huru. Ezuva limwe mukadonagona kwa verere unene, ano Jairusa ga yi mwene asi munona na fa. Jairusa makura ta diworoka kuhamena Jesus, mugara gomuwa ogu ga zuvhire gokuvhura kuverura vantu. Makura Jairusa ta zi a ka mu papare. Age ta ka gwana Jesus konontere dEkurudiva lyaGalireya, oku ta rongo vantu wovanzi.

Jairusa ta pene mombunga makura ta gwire konompadi daJesus. Age ta tantere Jesus asi: ‘Munwange gomukadi kuna kuvera unene. Kuvhura o wize o ka mu vatere ndi? Kuna kukuhundira ngano o wize.’ Poopo ngoso, Jesus ta zi kumwe naJairusa. Mbunga ezi za wizire mokuyamona Murongi goMunene nazo tazi va kwama. Konyima zapa va gendere sinano songandi, vagara vamwe ava va tundire kembo lyaJairusa tava mu tantere asi: “Munonge ana dogoroka. Yinke hena ono kurorwera Murongi?”

Jesus kwa zuvhire eyi va uyungire vagara ava. Age ga divire omu ga guvire Jairusa pokuzumbanesa munwendi gelike a huru. Makura Jesus ta mu tantere asi: ‘Gwa ha ku pwaga! Pura tupu mwaKarunga, makura munoge ta paruka.’ Awo tava twikire kugenda dogoro tava ka sika pembo lyaJairusa. Awo tava ka gwana vakaume vepata lyendi kuna kulira. Awo kwa guvire morwa kaume kawo gomunona ana fu. Nye Jesus ta va tantere asi: ‘Mwa ha lira, munonagona kapi ana fu, nye kuna rara.’

Apa Jesus ga uyungire eyi, vantu tava tameke kuzora, morwa awo va yi divire asi mukadona ana fu. Omu ono kugazara, morwasinke ga uyungilire Jesus asi mukadona kuna rara?— Sirongwa musinke ono kugazara ga here kuronga vantu?— Age kwa va harerere va dive asi nomfa kuvhura kukara ngwendi nompofu dononene. Age kwa here kuvaronga asi kupitira mononkondo daKarunga, age kuvhura kutengwidira muntu gokufa keparu ngwendi moomu natu vhura kupindura paureru muntu monompofu.

Makura Jesus ta pwagesa mo navenye monzugo, nye ta sigi mo tupu vapositoli vendi oPeturusa naJakopo naJohanesa ntani oguhwe nozina womukadona. Makura ta zi monzugo omu ga kere munona. Age makura ta mu kwata kokuwoko ntani ta tanta asi: “Mukadona, pinduka!” Poopo ngoso mukadona ta pinduka ntani ta tameke kugenda! Oguhwe nozina kwa hefe sili unene.—Marukusa 5:21-24, 35-43; Rukasa 8:40-42, 49-56.

Gazadara ko kweyi. Mokumona asi Jesus ga pindwire mukadona gwina koufe, kuvhura a ruganene vapeke yokulifana ndi?— Omu ono kugazara, kuvhura sili nga ka yi rugane ndi?— Yimo, age nga yi rugana. Jesus mwene kwa tente asi: ‘Siruwo ngasi wiza, apa ngava zuvha ezwi lyange navenye ava va kara monontoko, makura tava pwaga mo.’—Johanesa 5:28, 29.

Omu ono kugazara, Jesus kuna hara kuvhumbura vantu ndi?— Sihonena sapeke somoBibeli ngasi tu vatera mokulilimbururura. Eyi ya horokere ezuva limwe pepi nositata saNayini kulikida omu Jesus a lizuvhu kuhamena vantu ava ava guwu pehoreko.

Mbunga kwa sindikilire mukadi mokukahoreka munwendi gomugara. Pomuhowo mugara gwendi ga fire, ano konyima munwendi a huru nage ta ya fu. Age kwa guvire sili! Vantu wovanzi womoNayini kwa mu kweme apa va pwagesere mositata simpu samunwendi. Mukadi kwa lilire, ano vantu kwato eyi va vhulire kurugana mokumuhengagwida.

Mezuva olyo, Jesus novarongwa vendi kwa wizire kositata saNayini. Pepi nevero lyositata, awo kwa gwanekerere nombunga ezi. Apa Jesus ga mwene mukadi ana kulira, makura ta mu fire nkenda. Ruguwo rorunene romukadi kwa gumine Jesus komutjima. Age kwa here kuvatera mukadi.

Nkedi zaJesus zeharo zomukumo kwa ninkisire mukadi a purakene apa ga mu tanterere Jesus asi: “Wa ha lira!” Eyi ya ninkisire navenye mokumutarera nelituromo. Apa ga hederere Jesus simpu, vantu kwa lipulire kweyi na vhura kurugana. Jesus ta uyunga asi: ‘Mumatigona, tani ku tantere asi, pinduka!’ Poopo ngoso ta pinduka. Makura ta tameke kuuyunga.—Rukasa 7:11-17.

Gazara tupu omu ga lizuvhire gwina mukadi! Ngapi omu ngo lizuvha mokukatambura hena muhali goge ga fa?— Eyi kuna kulikida asi Jesus sili ga hara vantu ntani ana hara kuvavatera, ndi ngapi?— Gazara tupu omu ngayi ka wapa mokukatambura vantu ava va fa mouzuni woupe waKarunga!—2 Peturusa 3:13; Ehororo 21:3, 4.

Posiruwo oso vamwe owo ngava ka vhumbura ngava kara vantu ava twa divire, kukwatera mo vanona. Nose ngatu ka va diva, ngwendi moomu ga divire Jairusa munwendi gomukadona apa ga mu pindwire Jesus koufe. Vapeke ava ngava ka vhumbura kuna kara vantu ava va fire nomvhura mafere ndi mayovi ga ka pita. Nye Karunga kapi ngava divara morwa asi awo kwa parukire nare.

Ayo nani kapi ayi hafesa pokudiva asi Jehova Karunga naMunwendi Jesus kwa tu hara unene ndi?— Awo kuna tu harere tu paruke narunye, nye kapisi nomvhura dongandi tupu!

Kuhamena ehuguvaro lyewa lyomoBibeli lyovafe, resa Jesaya 25:8; Yirugana 24:15; ntani 1 Vakolinte 15:20-22.

[Mafano pepenuno 182]

Ngapi omu ga yi likidire Jehova asi age ga hara vanonagona?

[Efano pepenuno 184]

Yisinke atu lirongere ko kweyi ga vhumbwire Jesus munwaJairusa gomukadona?

[Efano pepenuno 186]

Yisinke ali likida evhumburo lyomuna a huru gomukadi ogu?