Egaununo 53

Mupangeli gononkondo ogu va hepere

APA ga kutikire Jesus mayovi pasitetu, vantu kwa tetukire. Awo kwa tente asi: “Yosili ogu yige muporofete ogu asi nga wiza mouzuni.” Tava hulisa asi Jesus yige muporofete gomunene kupitakatana Mosesa ntani hena asi age ngano kuvhura kukara mupangeli gononkondo ogu va hepere. Yipo nye va here kumutumba a kare hompa gwawo.

Nye, Jesus ga dimbwilire eyi va here kurugana vantu. Yipo ga hendukire va dire kumusininika. Age ta tumu mbunga zi tengure kwawo ntani ta pamperekeda varongwa va perame mowato va tengure koKaperenaumu. Makura age ta rondo kondundu a ka kanderere. Masiku ogo Jesus gelike ga ka kere ko oko.

Komeho tupu li ka toke, Jesus kondundu ta mono mankumpi ago kuna kuyerauka morwa mpepo zonene za kere ko. Mokumona asi kwa kere pepi noPaska, ano kwedi kwa geve uzera, yipo Jesus ga vhulire kumona varongwa vendi omu va kukondja nowato morwa mankumpi. Vagara kwa dugire nononkondo dawo nadinye.

Pokumona eyi, Jesus ta humburuka kondundu makura ta gendi pontunda zomema a tavakane mankumpi. Wato kwa zire konyara nokilometa ntano ndi ntazimwe ngoso apa Jesus ga ka sikire ko. Nampili ngoso, age kwa gendere ngwendi ta va pitakana. Apa va mu mwene varongwa tava litakumine asi: “Sinkisauka.”

Jesus ta va limburura nehengagwido asi: “Gu mu dame, nyame gwa ha mu pwaga.”

Nye Peturusa ta mu tantere asi: “Hompa, nsenesi nyove, ninka nge name ni gende pomema, ni wize koge.”

Jesus ta limburura asi: “Wiza!”

Peturusa makura ta tundu mo mowato, ta gendi nage pomema, ta zi kwaJesus. Nye apa ga mwene epepo tali koro, tagu mu pwaga, ta vareke kudama, makura ta zigire asi: “Hompa, popera nge!”

Ngapa katu popi, Jesus nare ana gonyonona kuwoko kwendi a mu nyangure, makura ta mu tantere asi: “O munepurogona ove, wa singanyekera yisinke?”

Kutunda opo oPeturusa naJesus tava perama nye mowato, epepo nalyo tali litura, ano varongwa kwa tetukire unene. Awo ngano va “kwete egano lyositetu sonomboroto” esi ga rugene Jesus apa ga kutikire mayovi govantu nonomboroto ntano nonomfi mbali, ngano kapi va tetukire apa ga gendere pomema nokumwenekeda epepo. Nampili ngoso, varongwa kwa liganderere kwaJesus oku tava tanta asi: “Hawe, yosili nani o MunwaKarunga.”

Pokaruwogona tupu, awo makura tava ya siki moGenesareta, ezana lyewa eli lya kere pepi naKaperenaumu. Oko yiko va ka hegekere wato. Nye apa va sikire kononkenkera, vantu tava dimburura Jesus makura tava zi mwaza mukunda, va ka papare ava va verere. Makura tava mu retere vaveli poyintali va gume nampili komukunkuro gosikoverero sendi, makura tava veruka.

Posiruwo sooso, mbunga ezi za mwene sitetu sokukutika mayovi kwa ya nongwenene asi Jesus ana tundu po. Apa mawato gamwe ga tundilire koTibeliyasa ga ya sikire, makura tava perama mo va ze koKaperenaumu va ka papare Jesus. Apa va ka mu gwene, tava mu pura asi: “Murongi, siruwoke ono wiza ko oku?” Jesus kwa va nyokerere, ngomu natu ka yi mona. Johanesa 6:14-25; Mateusa 14:22-36; Marukusa 6:45-56.

▪ Jesus konyima zokukutika mayovi pasitetu, yinke va here kumurugana vantu?

▪ Yinke ga mwene Jesus apa ga kere kondundu oku ga hendukilire, ntani yisinke ga rugene?

▪ Morwasinke ngano va dilire kutetuka varongwa yininke eyi?

▪ Yinke ya horokere apa va ka sikire kononkenkera?