Egaununo 52

Jesus ta kutike mayovi pasitetu

VAPOSITOLI 12 kwa haferere rugendo rwezuvhiso lyokulikarera moGalireya. Konyima tupu zedipago lyaJohanesa, awo kwa tengwire kwaJesus nokumusimwitira eyi ya va horokerere. Apa ga mwene Jesus asi awo vana roroka, hena vantu vanzi va wizire kwawo ntani kapi va gwene ruveze rokulya, ta uyunga asi: ‘Ninkeni tu ze nyoselike kevega lyomaporeza yipo mu ka pwizumuke.’

Makura tava perama mowato, tava zi kevango lyokoure, korwaUpumezuva waJorodana kupitakana sitata saBetesaida, nampo pepi naKaperenaumu. Nampili ngoso, vantu wovanzi va va mwene awo tava ka za, awo hena va divire oku vana vyuka. Makura tava duka konontere va ka hove, ano apa wa ka hegekere wato, vantu nare vana ya siki.

Apa va humburukire mowato nokumona mbunga zonene, Jesus tazi mu gwire nkenda morwa vantu kwa kere ngwendi nonzwi da hana musita. Makura ta verura vaveli vawo nokutameka kuvaronga yoyinzi.

Eyi lya gomboka, varongwa vendi tava mu wizire, tava ya mu tantere asi: “Evega eli mapuku, ezuva hena lina toko. Va ninka, va ze, va vhure kukalirandera nondya mwaza nomukunda nomambo.”

Nye, Jesus ta va limburura asi: “Va peni ko one yokulya.” Mokumona asi Jesus ga divire nare eyi na rugana ko, age kwa hetekere Filipusa pokumupura asi: “Oku natu ka randa nomboroto dokulya navenye ava kupi?”

KwaFilipusa kwa monekere ngwendi kapi tayi vhulika. Morwa yeeyi pwa kere konyara vagara wokuhura po-5 000 ngoso, nampo vantu wokupitakana po-10 000 kutura ko hena vakadi novanona! Filipusa ta limburura asi: “Amesi nomboroto donoranda mafere gavali nokugwaneka si, asi nkenye ogu a gwane kantau.”

Nampo mokulikida asi nokuvhura si kuvakutika, Andiliyasa ta gwederere ko pokutanta asi: “Pweli mudinkantu, ogu ana kara nonomboroto ntano doyilya nonomfi mbali, nye eyi yinke nayi kwafa vantu wokuhura apa?”

Morwa komeho tupu zoPaska mo-32 S.N., posiruwo apa aku kara upyu, yipo au kara wayi wounzi. Makura Jesus ta tantere varongwa vendi, va hingidike vantu powayi motumbunga tomafere-mafere nonomurongo-ntano-ntano. Age ta gusa nomboroto odo ntano nonomfi odo mbali, ta ligamene keguru, ta pandura Guhwe. Makura ta tetagura nomboroto ntani ta gaununa nomfi. Ta di pe varongwa vendi, awo va di gavere vantu. Pasitetu, vantu navenye kwa lire tava kuta.

Konyima zeyi Jesus ta tantere varongwa vendi asi: “Pongaikeni yintau eyi yina hupu ko, neisi nayi hepa.” Apa va yi rugene, tava zwida yikumba murongo nayivali eyi ya hupire ko kweyi va lire! Mateusa 14:13-21; Marukusa 6:30-44; Rukasa 9:10-17; Johanesa 6:1-13.

▪ Morwasinke ga paparerere Jesus vapositoli vendi evega lyomaporeza?

▪ Kupi oku ga twere Jesus varongwa vendi, ntani morwasinke va dililire kugwana siruwo sokupwizumuka?

▪ Yinke va mu tanterere Jesus varongwa vendi apa lya gombokere ezuva, nye age yinke ga rugene ko mokupakera vantu sinka?